太古

太古A太古B有咩唔同 如果要買揀A定B好 | 龔成信箱

投資

廣告

今日龔成信箱,不少讀者想為未來作打算,應如何實行投資計劃,亦提及熱門的股票以及投資心態等問題。

撰文:龔成 |圖片:網絡圖片

1.太古A & B

太古A太古B有咩唔同 如果要買揀A定B好 | 龔成信箱

龔sir 你好,仲有一個問題想問,就係太古A 同太古B 既分別,同埋如果要買,買邊隻好D?唔該

龔成老師:

這公司分為太古A(0019)以及太古B(0087),有兩個上市編號,所代表的都是太古公司的股票。

這是過去一些歷史問題,其後已禁示,有些企業受其他人追擊,大股東怕控股權不保,於是發行面值較低,但投票權一樣的股票,令他們能以相用資金得到更大的控股權。

雖然A、B股所擁有的投票權一樣,但當中所代表的價值不同,太古B是太古A面值的5分1,所以其所佔有公司資產、盈利、股息,亦只是太古A的5分1,而股價亦大約是太古A的5分1。

由於太古A是恆指成份股,而太古B不是,因此基金都會買前者,令股價出現略高的溢價,因此小投資者買太古B,一般會較為著數。(對照龔成信箱:Q4906)

2.加按

香港銀行已維持低利率已很多年,眼見物業不斷升值但又未見頂,本人有打算將現有物業加按,套現而另覓投資機遇。

請問如果將加按物業的錢買入三數隻本港籃籌高息股是否好的投資?

因為我覺得股票是除了收息,最大價值應該是低買高賣賺差價。龔成先生你覺得這個方向是否好?

及有什麼需要注意?

龔成老師:

你加按,等如加大借貸,這筆資金可用作投資各工具,只要回報率比利率大,理論上就值得做。另一點要考慮的,是你的負擔能力,加按後,你要確保自己供款順利,而借一半的風險不算大。

現時利率不高,但有上升的情況,因此,這刻這行計算,算是有利有弊,時機不算最好,但都可進行。

借貸投資,我認為可以進行,但不是胡亂進行,最好等有機會出現先,這如同一張「王牌」,要好有信心先進行。以現時的市況,我又未見到這個明顯的機會。

因此,你以借貸,再買入優質股,賺差價不是正確概念。長遠增值才是正確方向,即是借現金,買資產,長遠增值,然後慢慢還貶值的現金,而你擁有資產。

另外,由於這是「王牌」,所以在時機上,未必最好。即是你可以做,但不用急著做。(對照龔成信箱:Q4901)

3.MPF

龔成老師,您好! 一年前我先開始玩股票, 有人教我買688, 3311, 但係佢教我短抄, 之後我不斷睇書, 其中一本係你50隻優質潛力股, 開頭睇覺得講到咁簡單, 無跟你買.

之後又上左某導師ge堂, 佢地教人睇技術及基本面買倍升股, 教人點係牛三賺好多錢, 但經歷左一年時間, 我發覺佢地教ge係理論上會贏的方法, 但實際操作難度好高, 心態亦都要好強先可以有佢地講ge 效果.

例如mpf, 佢地教人只買恆指追縱基金, 有兩個方法每年賺10 – 20 %, 十年複式累積會達1000萬以上, 不斷做20年,就可以財務自由, ?返mpf 出?早d退休.

就咁係上年年中, 阿sir 會同學生講個市, 成日都話會跌,最後一擊, 入完貨等爆升, 之後獲利, 等熊市一年後才再買, 咁樣無論股票同mpf 都會賺好多.

就係咁, 唔係太多經驗ge我就將之前草左10年ge mpf 變成保本基金,等個市跌, 點知越等越升, 其他同事無轉過mpf 哥d越升越有, 我個心就有d唔舒服,

到而家恆指無之前咁平了, 就越唔敢買, 買左都好短線, 賺少少就放, 不斷短抄. 近排睇左好多你解答讀者的問題,覺得你的一套是一般人都易操作的, 不會需要睇住個市, 感覺安心點的.

請問你可以教我一套用mpf累積成財務自由的本金嗎? 我是澳門住的, 過香港上堂不太方便, 但若有合適的也可以過來一兩次.

我的mpf 現有70萬, 本人36歲, 希望45歲左右就可以達至財務自由, 不用和一般OL一樣上班,越做越老,越老越要做。

另外,本人跟老公也有一物業, 我有一車位,月收入4萬五,裡面很大部分已被供款佔去,流動可用的每月的錢有1萬左右。

感謝您,我越看書,越看個市,越想著之前的導師教的一套,就越怕我是白浪費了時間,希望你可以指點一下。感謝您!

龔成老師:

我不評論其他導師的方法,但如果係我,我會先睇睇全球,最賺錢的幾位投資人、經金經理,佢地用咩投資方法。

無論是巴菲特、彼得林區等,佢地都唔會短炒,唔會估大市走勢,佢地買股票就是買企業,慢慢等企業增值,當中的財富自然得益。

我一直都反對將強積金轉來轉去,好多人以為估到個市點走,但實際操作根本好難,而強積金是超長線的投資,唔會有人轉來轉去。

強積金會簡單地運用人生財富分配法,即是年輕時,將大部分資金投資在高增值類別,中年時,一部分增值,一部分保本,年長時,大部分保本。我地唔會轉來轉去,只會用這模式分配,每過幾年調整比例一下,慢慢因年紀大,同埋財富漸多,而將資金轉到保守組合裡。

強積金只是退休計劃的一部分,只能在我地退休時,令我地更有財富,同時增加被動收入。我明白你想快速退休,但財不入急門,增值都要時間,我地一定要在風險與回報間取平衡。

因此,你可利用每月儲蓄,如果你本身每月可儲一萬,其實都可善用這筆資金,合理增值,月供股票是一個好方法,你可以進行。現時大市不平,你最好用「一邊買入,一邊儲現金」的模式進行,買入優質股,長期增值,如不懂就選盈富(2800)。

至於你持有的$70萬,都可好好利用,但暫時最多只能動用$30萬-$40萬,買入平穩增值股,分注進行。餘下資金先持有現金,等機會。

這段時間,你盡力增加你的投資知識,睇多d書,賺多d投資大師的投資方法,學下睇年報,你會有得著的。(對照龔成信箱:Q4902)

4.供多層800萬樓

龔成老師好:一直都有睇你既FACEBOOK,今次第一次向您指教,十分感謝!

我與先生月薪共九萬多,上年花紅比較好,有90多萬(一般則40萬左右)有一自住樓2015年中旬買入,買入價500萬現升至約650萬,六成按,月供1萬1左右,仍欠銀行290多萬元; 其它資產有現金160萬,股票60萬。

平日消費不多,供樓,父母家用,保險等約3.5萬。想盡快多買一層約800萬既樓,改善生活。向您請教該如何投資?謝謝!

龔成老師:

如果你在2015年買入物業,那就不用太心急買入第2個物業,因為這會令你在同一週期買入太多物業,會有集中性的風險。

買入等2個物業計劃可以,但不用太急,不用刻意定時間表。

這段時間,你可以保持財富增值,善用$160萬現金作投資,但由於股市不平,最好只動用其中一部分入市,同時要作分注買入的策略,慢慢滾大資金,同時,到樓市合適時才買入(因為你已解決了自住問題,所以不用急入市),反而用等機會的策略入市,會對你更有利。

你亦可利用月供股票(由於月供的買入價會長期平均,所以這部分進取少少都可以),保持將財富增值,我相信你會慢慢累積到相當資產。

我地最重要是做好財富分配,雖然買入價格都是重點,但最重要的,是你的資產分配如何。當你買入第2個物業,你的資產就會較集中在物業中,你試試寫下資產負債表,會發覺物業比例太多,其他資產比例太少,不夠平衡。所以,你應該等你各方資產較多,才買入物業,會較好。因此,第2個物業計劃可進行,但不用急,一邊滾大資產,一邊等機會入市會較好。(對照龔成信箱:Q4903)

5.投資有成果

成哥,我已上了你的股票堂,同時我已經買了你6本書翻看了好多次,你帶給我知識真是一生受用!不知如何再報答成哥!

我會介紹朋友上你堂,本人想如果早6年認識你,已經肯定財務自由了,因為樓市及股市已經反映,現在希望股市及樓市再發生之前幾年同樣升幅,直闖財務自由之境,謝謝成哥!

龔成老師:

學習總要有過程的,經歷也是一種。

只要你有選股技巧,之後的財富也能保持增值,財務自由只是時間問題!我地唔會期望股市及樓市之後點升幅,因為這是被動的,反而會主動地創造,令我地能財富倍增的投資機會。

保持學習,多睇年報,加油!(對照龔成信箱:Q4904)

6.財富增值

你好龔成老師

我今年25歲,做左三年半野,剛出黎做野時聽左個保險朋友講,簽左月供3000既儲蓄保險,供二十年,而家無得後悔

暫時月入大概兩萬
手上資產有現金30000

股票: 700 一手、1336 3手
每月除左供儲蓄計劃 ,可以再儲多5000-6000

求指教增值財富既建議。多謝你

龔成老師:

儲蓄保險是防守性工具,雖然都有購買的價值,但不用太多。

現時的$30000,可暫時持有現金,因為市況不平,留來等機會仲好。但現時你每月可儲約$5000,其實可以做月供股票,你去銀行問下就得,可考慮將其中的$3000-$4000去做,供盈富(2800)及其他股票,長期月供就可以,就算現時不算平,但由於價格會平均,所以風險不高。這是最好的財富增值方法。

其餘的錢,暫時儲現金先,等跌市才買貨,策略會較好。(對照龔成信箱:Q4905)

7.中國移動(0941)

老師,你點睇隻941?

龔成老師:

中國移動(0941)本質唔錯的,但佢本身已經好龐大,增長力唔高,唔可以預佢股價有太大的增值空間。但整體上,無論是長遠發展,平穩增值上,都是正面的。

佢遲d將會有較大的資本開支,去發展5G技術,所以現金流會較弱,因為資本開支會幾大,甚至會影響派息,這無可避免對佢的中短期股價有影響,但長期仍正面的。(對照龔成信箱:Q4907)

8.月供

成哥。我媽媽今年55歲,10年後退休。

我每個月都比2000蚊家用佢,但想想錢放在銀行都是會貶值,所以想幫她做銀行月供股票,我想個2000蚊全部供比亞迪(1211),不知道有沒有問題?

還是全部月供(2800)盈富基金好?

或者你有沒其他建議?

龔成老師:

以佢的年齡,不適合投資潛力股如比亞迪(1211)。

不同人生階段有不同的策略,如果每月投資$2000,可以一半收息,一半平穩增值。月供股票是可行的策略,盈富(2800)可以供$1000,另外$1000可供收息股,例如港燈(2638)、置富(0778)、香港電訊(6823)、工行(1398)等,長期地進行月供,就可以了。(對照龔成信箱:Q4908)

9.加息與金沙

想問,加息對金沙長線來說係咪影響都好大?

龔成老師:

加息對企業一定有影響,但對金沙(1928)影響又唔算好大,當市場加息時,借貸成本就會增加,負債較多的企業,融資成本就會因此而大幅上升,但金沙負債唔算多,所以問題不大。(對照龔成信箱:Q4909)

10.10萬買咩好

龔sir,我有10萬現金係手,想試下買股票。

暫時心水係港燈,盈富同領展,你有無咩建議我可以點分配,定還是月供比較好,我30歲,每月收入約15000

龔成老師:

現時市況不平,但如果你手頭無貨,都可以入翻少少股票,你可以將其中的$3萬-$5萬,用於投資股票,其餘的持有現金,到大跌市才動用。

這$3萬-$5萬,你可以以分注買入的模式,投資穩健股票,盈富(2800)會較適合你,因為這是一個組合,風險較平衡,對新手來說是較好的。

另外,如果你每月到儲到錢,都可以用月供方式投資(上述的繼續進行,同時並行月供)。例如你每月能儲$5000,你可以月供$3000,由於這部分買入價能有效平均,所以可選平穩增值股+潛力股,因為以你的年紀,仍可投資增值力較強的股票,只要供款時間夠長,就能將買入價平均,風險有效減少。(對照龔成信箱:Q4910)

編按:龔成是於公屋長大的80後青年,畢業後於銀行從事投資相關工作,雖然月薪僅萬多元,但因為理財及投資有道,只花五年時間,於28歲已累積到100萬元資產,目前淨流動資產有數百萬元。著有暢銷書《80後百萬富翁》、《80後2百萬富翁》及《財務自由行》,並出任創富課程導師。

facebook專頁:facebook.com/80shing

個人網站:80shing.skx io/

延伸閱讀:

90後有$9萬積蓄 想用$6萬投資錢搵錢

太古A太古B有咩唔同 如果要買揀A定B好 | 龔成信箱