股票月供好定現金買入好 想投資理財賺多啲
問 1：
成哥，見好多人都話又就快有金融危機？你覺得會唔會呀？而家做月供股票同用現金買入有無問題？如果無我過兩日就會去銀行處理，唔該哂成哥！
另外我想問你的股票班，因為夜晚要番兼職，我要睇時間夾，報名有無限期架？
龔成老師答：
暫時睇唔到有金融危機出現，不過股市的確不算平，就算有所回調都不出為奇，但我地所進行的，其實是財富分配，是一個長期策略，無人知遲D股市會升跌，但我地都可作出平衡分配。
月供股票只要長期進行，價格就能有效平均，因此只要優質股+長期，就可以開始了。
股票班報名，會以先到先得的形式進行，因為爆滿就會停止報名。當然，爆滿後又會再開新班的。（對照龔成信箱Q3516）
問 2：
你好，現在08226可以入市嗎？
龔成老師答：
樹熊金融集團（8226）主要從事證券經紀、放貸業務、證券投資、商品貿易、服裝配件貿易及生產及貿易ＬＥＤ數碼顯示產品。其實做得有D雜（本身生意啊算大，仲要咁多業務，即是每項生意都好細，同埋可能有d亂）。
如果睇翻財務報表，生意唔穩定，而每年的營業額都唔夠$1億，間公司都唔細。另外，佢已經連續多年出現虧損情況，我睇唔到佢有咩業務上的投資價值，而睇資產負債表，亦見唔到佢有咩吸引的資產，所以未見有投資價值。（對照龔成信箱Q3515）
問 3：
想問下老師點睇2689
同埋27銀娛應該點部署,
因為岩岩入市不久，想學下野
Thanks!
龔成老師答：
玖龍紙業（2689）質素不錯，有長線投資價值，近年的盈利大升，帶動股價都升唔少，但留意，這企業有受大環境影響的情況，業務情況略有被動，但本質都不錯的，只要不是訓身投資就無問題。
銀河娛樂（0027）是不錯的優質股，同時增長潛力不差，有長線投資的價值。雖然現時股價不算平宜，但長線發展仍在，可繼續持有。（對照龔成信箱Q3517）
問 4：
龔sir你好，想問2380近期跌左，同埋要供股，需要走嗎？謝謝！
龔成老師答：
中國電力（2380）中短期的經營情況，的確略有轉弱，中期業績中的盈利都跌了不少，同埋佢為左收購若干清潔能源項目公司，將會進行供股，市場凡見到這類集資行為，大多會有短期的股價不利影響。
不過，這股長期是有質素的，盈利亦不會持續下跌，如果之前已買，繼續持有無問題，同時可供股，但就不要額外再買入，你預佢中短期表現都未必太好。（對照龔成信箱Q3518）
問 5：
恒地囤左最多農地，咁算唔算潛力股？
龔成老師答：
恆地（0012）的資產有潛在價值，但要釋放需要，同時佢未身已需規模好大，股價就算受惠這些因素，都不會爆升，最多會平穩上升，而恆地不差的，長遠有投資價值，現價可分注。
不過，我地有時唔會太貼d消息，例如早前施政報告，公布前市場估有農地相關政策，因而令恆地炒起，公布後發現無料到，股價又落翻。我地唔好太貼d消息，同埋好主觀預期市情的發展。（對照龔成信箱Q3519）
問 6：
老師，閱文集團上一年賺左3000萬人仔，老師點睇？
龔成老師答：
閱文集團我不認識，我只知近睇科網概念有d熱炒情況，不少科網公司都有無限的想象，同時，亦帶動不少分柝及高估值上市的行動。
我只能說，自己衡量風險。這些公司在高增長的同時，不要忘記行業結構不穩，以及高估值問題，但我其實不太認識，所以我不會投資。（對照龔成信箱Q3520）
問 7：
老師，你較早前提及過中國生物製藥同福壽園，是潛力股嗎？
龔成老師答：
中國生物製藥（1177）是有質素的潛力股，可惜由2016年出的《50優質潛力股》推介到而家，股價已升了一倍，現價已經不平宜了，未必是好的買入時機。
福壽園（1448）都是有質素的潛力股，雖然股價都不算平宜，但近年升幅相對較少，股價的偏離程度相對較少，但最好的買入位在$4.5。（對照龔成信箱Q3521）
問 8：
成哥，點睇恆指ETF(2833)或恆生H股(2828)? 見兩隻派息都幾好
建唔建議加入資產組合內?謝謝你
龔成老師答：
雖然兩隻都可以投資，都可加入組合內，但與其投資恆指ETF（2833），不如投資盈富（2800），因為2833及2800都是追蹤著恆生指數的，但盈富的成交比較活躍，買賣差價會較少的。
至於2800同2828的分別，2828是投資中國類的股票，2800則是中國與香港的組合，兩隻都可投資。（對照龔成信箱Q3522）
問 9：
你點睇眾安？
一手試唔試得過
龔成老師答：
眾安（6060），我不認識，所以我不投資。
我只知佢現時盈利好少，但市場估值好高，即是股價中大部分的價值，不是來自現時的業務價值，而是來自市場給予的「概念價值」，這類股有可能好有潛力，但我不懂分析，所以不投資。只知將來股價有好大上落。（對照龔成信箱Q3523）
問 10：
老師，何時入市呢個問題 真系諗唔通
原本計劃下年1月開始
但睇住個市甘升法 又怕摸頂入市
龔成老師答：
我相信無人知股市幾時見頂見底，無人知之後的走勢，因此，我地所做的，不是預測，而是有效的財富分配。因此，我地唔可以完全無貨，而是因應市況的平貴，都有適當的分配。（對照龔成信箱Q3524）
問 11：
我想請問你 關於隻371 北控水務 你有咩睇法？
見佢每年既利潤都有20-30%增長 同埋經常好過預期…內地政策上都有受惠…你覺得稱唔稱得上係一隻潛力股？手上有7%持貨 想睇下現價值唔值得再加注？ 感謝
龔成老師答：
北控水務集團（0371）是一隻優質股，本身擁有一得生錢的系統，近年生意有不錯的增長，盈利上升都幾快，不過，行業未必能長期快速增長，我會用平穩增長去形容這股。這股可長線投資的。
現時市盈率17倍，只屬合理，不算平宜，要加注都可以的。（對照龔成信箱Q3525）
問 12：
龔成，你會唔會出一本書，有D簡單例子，教下我地依方面經濟與股票相互影響同知識，永遠都係睇你d例子先明
龔成老師答：
我要諗諗，因為一本書涉及太多野，研究下市場同可行性先。（對照龔成信箱Q3526）
問 13：
龔成老師，你好，我現在持有藥股2隻, 460同2348，想問下你對我現時所持有股份的意見。謝謝!
460 $4.54 入市，2348 $5.065 入市，應否繼續持有
龔成老師答：
藥業股有潛在但都有風險，四環醫藥（0460）之前有d麻煩野停過牌，就算2016年度的年報，核數師的意見為「保留」，雖然近年生意與盈利都保持上升，但財務數據不能100%盡信，若你持有過多，要減少，但若不算多，那繼續持有都可以，反正市盈率不算太高，處合理水平。
東瑞製葯（2348）的潛力較一般，近年的生意有放緩情況，而盈利亦不穩定，不過佢的經營現金流多年保持正數，股本回報率亦不低，生意模式算是不差，只是前景較為一般。
以現時的市值計算，估值不算高，企業平穩，你有守的空間，有機會見到買入價的。（對照龔成信箱Q3527）
問 14：
不過仲有個問題，如果想買收息股，合和公路，其實需唔需要理會股價？依家不斷創緊新高。定係不理會 隔一段時間就入一手
龔成老師答：
收息股都有平貴之分，其中一個方法是分析股息率，以衡量平貴，合和公路（0737）是不錯收息股，近年的特別股息不少，所以股價不斷創新高。
如果以穩健來說，$4.5是較合理的買入價位，如要分注買入，最好等回至$5以下才開始。（對照龔成信箱Q3528）
問 15：
請問3333?睇？
本人31.45買入，請問值得長期持有嗎？
龔成老師答：
中國恆大（3333）其實我不太懂分析，佢近年的確好賺錢，這是由於中國樓市興旺，但其實樓市開始有泡沫，如果樓市逆轉，會對內房股有好大的影響。
另外，恆大的負債比率極高，無事就無事，有事可以大件事，我對這類股有保留。我不敢睇少佢的賺錢能，但同時這股潛在風險不低，所以，自己平衡風險。（對照龔成信箱Q3529）
問 16：
成兄，大市升了不少，仍有那些好股買得過呢？
龔成老師答：
因為唔少股票現時都不平，仍然睇好但不算太貴的，可以考慮：中銀（2388）、金沙（1928）、港鐵（0066）、長建（1038）、港燈（2638）、盈富（2800）。（對照龔成信箱Q3530）
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要3天以上才能回覆，若然是較複雜的提問，起碼要7天才能回覆，希望各位能諒解。
編按：龔成是於公屋長大的80後青年，畢業後於銀行從事投資相關工作，雖然月薪僅萬多元，但因為理財及投資有道，只花五年時間，於28歲已累積到100萬元資產，目前淨流動資產有數百萬元。著有暢銷書《80後百萬富翁》、《80後2百萬富翁》及《財務自由行》，並出任創富課程導師。
facebook專頁：https://www.facebook.com/80shing
個人網站：https://80shing.skx.io/–
延伸閱讀：
2018年牛氣沖天 恒指再創十年新高
