救命資金遲遲未到位 樂風周佩賢一念之差｜凍鏈茶專欄

出身公屋，父親任職裝修判頭，大學畢業之後，周佩賢毅然向父親借貸二百五十萬，購入銅鑼灣一間舊樓，翻新後僅三個月以三百萬元售出，成功賺取人生第一桶金。那嗰年頭，仍有不少人相信「細樓翻新」可以致富，而佢唔單止相信，仲行得好前。

有所謂「乜sir」者叫股東們撲水

其後，佢創立樂風集團，主打「輕資產」，喺市場集資，搵投資者共同發展。此舉吸引唔少專業人士，據知包括前永亨銀行老細馮鈺聲、富衛集團首席行政區域總監、香港河源社團總會執行主席李尚仁等。早年低息環境之下，投資者個個都希望以小博大，賺取高息，甚至夢寐以求晉身發展商之列。

然而世事無常，事與願違。高息環境突如其來，令多個樓盤淪為銀主盤。據了解，物業 One Bedford Place於今年2月淪為銀主盤之前，其實曾經有具實力同埋誠意嘅潛在買家出現，投資者原本抱著一絲希望，盼望全身而退、攞返本金。奈何買家遲遲未有兌現，周佩賢一方面要向投資者不斷伸手要錢還息，另一方面，每一次「科水」，藉口層出不窮，而且全部附帶極高利息。群組之中，有所謂「乜sir」者，更叫股東們召集親朋戚友，動用信用卡、加按物業、借取私人貸款撲水。

焦慮纏身 諗點解頭頭碰着黑

有幾次，更聲稱係資本增資（capital call），令股東誤以為唔注資，股本便會被稀釋。豈料後來又改口稱股本不變，當作借貸處理。當投資者拒絕再注資時，周佩賢喺WhatsApp 群組中屢遭言語逼迫，令佢自己都深感自責。權宜之計可能係啱，亦可能係錯，但佢身邊嘅人都肯定佢絕對冇惡意，只係買家資金遲遲未到位，佢就俾焦慮纏身，諗點解頭頭碰着黑，一念之下做咗傻事。回看樂風旗下多個旗艦項目——Elize PARK、One Bedford Place、Upper Prince —— 樓盤名字皆帶有英式影子。如果周佩賢生於八、九十年代英殖時代嘅香港，當時經濟起飛，只要你肯拼搏、有眼光，便能力爭上游。以佢才智與能力，理應能夠安然渡過難關。可惜時不與她，造化弄人。近幾年輸給市場之人多不勝數，周佩賢係其中一個被時代巨輪輾過嘅身影。願安息，也願仍在市場中掙扎嘅人，能安然渡過。