筍盤

十幾年炒樓經驗分享 想賺錢 先教你何謂筍盤 | 香港樓市2018 | 樓市入門

樓市

廣告

以下對話是Anthony sir跟朋友討論如何買到筍盤。要買到,首先要學會甚麼為之「筍盤」!Anthony sir作詳細分析。

撰文:1%Anthony |圖片:新傳媒資料室

買筍盤第一步…知道咩叫筍!

真人真事.試過無數次…

朋友: 「我都好想買樓呀,平平哋有咩筍盤介紹呀?」

筆者: 「有冇話鍾意邊區?」

朋友: 「冇乜所謂,市區就得,最緊要有升值潛力。」

筆者: 「觀塘丫,你熟呀,最近收到個盤幾筍。」

朋友: 「响邊架?幾錢呀?」

筆者: 「XX大廈,YY街,198萬,兩房啱上車。」

朋友: 「好似吊腳咗少少。」

筆者: 「如果唔係就唔會咁平啦,呢口價賺硬架!」

朋友: 「麻麻地,仲有冇呀?」

筆者: 「AA花園丫,大屋苑、方便、山景,有間220萬。」

朋友: 「呢個屋苑我聽過,抵咩?」

筆者: 「樓景都賣240萬,抵架!相熟代理彈俾我架。」

朋友: 「我之前都有朋友住嗰度,好似唔係好值。」

筆者: 「……咁一係你周圍睇睇先丫,做嘢先,再幫你留意。」

朋友: 「係啦喎,記得幫我留意啦……」

最後…當然冇咗件事啦!

幾年後,兩個盤都升咗超過一倍,跑贏大市!

朋友仍然都未上車,同學識貨買咗,賺咗超過兩球~~

有冇筍盤介紹?…你係咪知道咩叫筍先?

不經不覺,筆者買賣物業已經十幾年,再加上身邊的同學、戰友齊齊拍住上,經歷起起跌跌,睇樓無數,買賣無數,也在各區建立了一定的相熟經紀網絡,要搵有一、兩成水位的筍盤唔難。

問題是…個個都話想買筍盤,你係咪知道咩叫筍盤?

印象比較深刻的一次在2010前…

筆者在今天的何文田站附近其中一幢單幢樓,早已買了兩個單位,一個是鳳凰樓層,全公園景,另一個是頂樓連天台,前面遠眺遊輪碼頭,後面全公園景。忽然有業主劈價,一個實用270呎的兩房,連550呎平台,向公園的特色單位,只需130萬!

筆者通知身邊朋友,大大話話講咗俾十幾個朋友知,講到口水乾,一個又話驚泡沫,一個又話驚供樓辛苦,最後只有一個朋友半信半疑地買下來,現在這個單位要500萬了!

最近都有!基本上年年都有!

就在2016年樓價急挫的時候,又有朋友問…有冇筍盤介紹?
當時一些上車屋苑例如金獅花園、河畔花園等等都插水,300萬樓下就有交易,筆者不是沒有跟朋友說,但是朋友反應還是一樣,又話細、又話驚繼續跌,甚至有朋友覺得我跣佢!嘥鬼氣!

還是投資兵團的同學戰友識貨,一呼百應,一口氣就搶下多個2字頭筍盤,好似搶錢咁,甚至樓都唔睇就買,當日270、280萬買入的,今天都已經衝破450萬,直指500萬了!有些個案在電視節目及新書都有分享,不贅。

點解?筍盤都唔要?

係呀!事實上絕大部份人根本唔知道…甚麼是筍!

絕對不容易!如果平時沒有睇樓,沒有研究,是不會懂的!

如果由零開始,沒睇過十區、八區,每區沒睇過十間、八間,沒有細心分析研究,是不會理解的。

可能有朋友會說…嘩!咁咪要睇成一百幾十間?

是的!要成為專業投資者,就要有心理準備啦。如果唔係,又點會有足夠的數據,知道甚麼是筍?甚麼是伏?

沒辦法…筍盤會先跟同學戰友分享,因為大家知道甚麼是筍!

至於其他朋友,尤其冇睇樓的朋友問…有冇筍盤介紹?

其實講都唔會明,抱歉了~~

延伸閱讀:

39歲退休要靠被動收入 朝朝瞓到十一點都得

太古城上月最新放盤叫價是多少?

太古城上月最新放盤叫價大約…各區樓市買賣詳情請看

九龍區有哪些大型屋苑放盤呎價最低?

九龍區不少受歡迎的大型屋苑呎價對比上月都有回落…各區樓市買賣詳情請看