月入15,000 真係儲到錢買樓？

今個星期最爆的地產新聞，估唔到係富二代教人儲錢買樓。話說香港超級富豪劉鑾雄的公子、華人置業(00127)主席劉鳴煒，近日以青年事務委員會主席身份接受前有線主播張寶華訪問，談及年輕人難上車的情況，立即引來網民「圍插」。

富二代教基層儲錢欠說服力

睇番段訪問，論點其實冇乜問題，問題應該係出自人。

「假如你現時月入15,000元，如果依家洗盡晒，願唔願意作出一啲犧牲？睇少啲戲、去少啲日本？」

「就算樓價跌番落嚟，如果你唔願意改變個人消費習慣，儲多啲錢，樓價跌幾多你都係冇首期。」

「你願意犧牲幾多儲首期？願意犧牲500元？定係犧牲3,000元？我哋上一代願意犧牲好多，呢一代就有好多消費需要。」

以上論點其實很正路，然而不應該出自超級富二代口中。裝修師傅教裝修、廚神教煮餸、股神教炒股、歌神教唱歌……是甚麼專業，就教甚麼，一個從來沒有需要儲錢的富二代，如何教人儲錢呢？如何令人信服呢？主持人都唔知係咪有心跣佢。

主持又問：「係咪好似你咁做就可以買到樓？」
劉公子無正面回答：「唔想誤導人，只係唔準備好自己，就算樓價跌都冇用！如果睇唔到樓市跌就唔準備，點做都做唔到，就洗晒佢算啦，呢啲心態唔正確，就算樓價跌都買唔到。」

不如研究吓，月入15,000元儲唔儲到錢買樓？儲錢買樓，還是由我們這些基層出身的小投資者分享比較務實。

筆者在電視台工作的時候，月入12,000元，可以俾3,000元家用，自己再儲3,000元，因為當年筆者沉迷炒股，除了節衣縮食，還有秘撈收入，再儲起來做子彈炒股，兩、三萬元的股票戶口，很快就變了十幾廿萬元，可惜不敵金融風暴，輸晒！

月入15,000元 儲唔儲到首期？

年青朋友絕望，因為條數咁計：每個月3,000元，一年才36,000元，十年360,000元……以300萬元樓計算，首期連雜項支出要50萬元左右，最少十幾年先可以儲到首期，如果到時樓價再升，咪又唔夠首期。

筆者之所以話儲到，因為條數唔係咁計。難道一世都是月薪15,000元？人會進步，依家行行都請唔到人，升職、加薪、跳槽、秘撈，好快就有20,000、30,000元，再加上投資回報，例如股票、基金，要平均每月儲10,000元或以上並不困難。

以身邊的同事、同學來看，只要有決心，平均三年左右就可以儲到首期。如果男女朋友、兄弟姐妹同心，可以更快，一年左右就可以達標。別說不可能了！要多少個例子？筆者絕大部分同學都做得到。

月入15,000元能通過壓力測試嗎？

如果只有15,000元當然做不到，如何做到？方法之一，當然是升職、加薪、跳槽。方法之二，與你的伴侶、家人一起買，一個人15,000元，兩個人就是30,000元了。

重點是，方法總比問題多。看到困難的時候，只會高呼不可能，當然做不到。看到困難的時候，想辦法解決，就會有可能。

最重要是看，身邊的人是否做得到。如果個個都做唔到，無話可說，是社會的錯。如果好多人做得到，偏偏自己做唔到，係咪應該重新思考呢？

P.S. 筆者絕對不撐劉公子，事實上，他不應該回答這些問題，他生於大富之家，確實沒有資格去教年青基層如何儲首期，甚至不應該去負責青年事務工作，因為他不會明白大部分年青人想要甚麼。然而，年青人也應該要有正面思維，不要輕言放棄。