港府借碧桂園唱好家族辦公室 「伏了」｜凍鏈茶專欄
廣告
中國房地產龍頭碧桂園（2007.HK）債務危機持續，火燒連環船，市場不斷幫金融機構計數，睇睇究竟邊個最受牽連。《彭博》就透露，貝萊德、安聯、富達同滙豐有機會持有碧桂園美元債券。大孖沙方面，有傳唔少富豪都買咗佢嘅債，連當年四叔同碧柱園創辦人楊國強係順德同鄉、仲俾佢連累帳面蝕七億條舊債都被人數返出嚟。不過今日睇返，四叔算係走得快好世界。
相反，早前以為碧桂園喺內房股中脫險，因而投資碧桂園嘅，就有我哋嘅特區政府。今年三月，政府宣佈成立家族辦公室服務網絡，打造蓬勃生態圈，持續支持本地同埋全球家族辦公室喺香港落戶或者擴展業務。同時財經事務及庫務局加投資推廣署今年三月就搞咗個論壇為名，撲水為實嘅「裕澤香江」（Wealth for Good in Hong Kong）閉門式高峰論壇，當中亦請咗碧桂園非執董、國強公益基金會黨委書記、理事長陳翀出席論壇。陳翀係碧桂園主席楊惠妍個老公。呢個國強公益基金本來係楊國強2013年喺老家順德成立，不過今年六月，國強公益基金會已經喺香港成立咗擔保有限公司，註冊埋香港嘅慈善機構。
圖片來源：經一編輯部
