租樓

「租樓等於幫人供樓」被批思想守舊 網民:香港人唔揸樓咪無資產囉!

樓市

廣告

香港一直流傳著「有錢要盡快上車,租樓等於幫人供樓。」的民間智慧。不過近日有網民在討論區提出,在加息周期下,租樓等於幫人供樓的概念現在已不合時宜。

網民:好多人覺得租樓蝕底

網民認為,雖然香港樓價貴,但租務回報「喺唔做劏房嘅情況下一直都好低」,又指出按揭利率只是約2%,而租務回報亦是約2%水平。

網民表示:「租客付出租金其實同利息相約,變相同借錢買樓供息唔供本一樣,但同時租客係唔需要比差餉、印花稅、管理費、承擔投資、租務風險,又有機會用租金增加免稅額,好似好多人都覺得租樓係蝕底。」

租樓
(圖片來源:政府新聞處)

以前香港人渴望置業而非租樓

帖子一出即引起網民熱烈討論,有網民認為,從前香港人渴望置業而不是租樓,大前提是過往樓價不斷飛升,如今樓價居高不下,卻不如以往年年有得升。

甚至有意見認為,如今堅持置業的人,思想仍然停留在過往十數年,樓價幾何級升幅嘅夢幻日子裏面。

  • 「呢句野係有時限。十幾年前有首期一定會買樓,因為樓價係一架『車』一直向前跑。租樓等如潑出去嘅水,有出冇入。」
  • 「而家樓價唔會再爆升,依家買樓仲有可能係摸頂接火棒;租樓會更安全同彈性,隨時想幾時轉身都得。」
  • 「覺得今時今日租樓唔抵嗰班根本係唔理性,思想仍然停留喺過往10幾年樓價幾何級升幅嘅夢幻日子裏面。」
  • 「2018年之後,好多樓嘅樓價都只係平穩,租金更加唔好講,租金回報兩厘都冇。」
租樓
(圖片來源:政府新聞處)

香港租金負擔不算高

有網民和議,相比起以升至巔峰的樓價,香港的租金比例上已算溫和,而且買樓置業要支付的往往不只樓價,還有裝修、差餉、印花稅、管理費等林林總總支出亦非常「襟計」。

  • 「九龍灣淘大15000蚊兩房 375呎。點會租唔到?除非你又要新又要地點好就腳。」
  • 「其實裝修都係業主承擔,舊樓唔裝都好難租得出同埋會反映係租金上。」
  • 「經紀好鍾意自欺欺人,乜嘢雜費都唔計,印花稅,經紀佣金,利息開支,管理費差餉地租,全部都唔計,然後話回報有 2.5%。」
租樓 圖片來源:《金都》電影劇照
圖片來源:《金都》電影劇照

唔揸樓就係無資產?

不過亦有「上車派」網民表示,只租不買等於無資產,有能力的話,在香港買樓永遠不會錯:「咁你咪租一世,睇下會點?唔好唔記得租金長遠點都會死。」

  • 「分別就係你無資產。」
  • 「邊有人會租樓㗎?你租等於每月扣錢,但你你供樓等於每月儲錢。咁都有得比?」
  • 「長遠唔買都係輸硬,老咗瞓邊?」

中原租金指數見底回升

中原黃良昇指出,2022年6月份中原城市租金指數CRI最新報112.10點,按月升0.44%。

租金見底回升,擺脫早前連續3個月於111點低位企穩的局面。租務宗數顯著上升,租賃旺季順利來臨。展望第三季租務持續暢旺,下半年CRI上望去年高位116點水平。

各大租務交投活躍屋苑租金

實呎調整租金
港島
囍匯 53.7元/呎
太古城 36.4元/呎
海怡半島 34.6元/呎
杏花村 34.4元/呎
九龍
海逸豪園 36.3元/呎
將軍澳中心/將軍澳豪庭 33.6元/呎
美孚新村 30.7元/呎
麗港城 28.8元/呎 28.8元/呎
新界東
沙田第一城 38.1元/呎
名城 32.3元/呎
嵐山 29.7元/呎
新界西
尚悅 27.2元/呎
映灣園 24.3元/呎
嘉湖山莊 22.9元/呎 22.9元/呎

立即加入經一Patreon共肥計劃

限時尊享85折! 全年訂閱慳更多

全新訂閱計劃內容將全面升級!尤其美股當炒、加密貨幣新興起,經濟一週特別搜集業內專家撰文分析,深入淺出拆解脈絡。


經濟一週Patreon限時尊享85折!訂閱經一Patreon後,更同時能閱覽投資名家專欄與分析,及投資專題報道。

圖片來源:《金都》電影劇照、政府新聞處