大孖沙趁亂玩私有化 趕做跌市撈底王｜凍鏈茶專欄

合和同會德豐率先行動，成為步入熊市之後，最早玩私有化嘅本地大孖沙。雖然嗰時恒指已經跌到去23,000點，但係都未算絶佳時機，相信真係無人估到如此低處未算低。

華置(0127.HK)係兩年前出價4蚊私有化，不過因為唔夠過半數股東支持通過，未能闖關。甘比話私有化係「給予小股東一個沒有流動性風險下套現的良機，以免他們有機會承受更大損失。」，佢無講錯，的確宜家華置股價得返$1 .7。

之後到舊年十月，個市跌到去15,000點，朱太嘅金利豐同細劉嘅利福國際就先後出手。朱太出價$0.3，較公布前金利豐每股$0.203元有溢價48%，雖然金利豐資產都因為市淡而大縮水，但揸住成過百隻殼，山大斬埋有柴，朱太出價仲要比資產淨值$1.5166折讓約八成，都咪話唔辣，然而朱太一出手，又點會唔成事呢？