上車盤要500萬 月入4萬買樓無望？3招搞掂！ | 置業入門 | 香港樓市2018
上車盤都要5、600萬，好多儲緊錢的朋友都大叫絕望！
朋友： 顛架！幾十年樓、300呎上車盤都要500幾萬！
筆者： 仲不斷有人追價，不斷創新高，真係唔明佢哋諗乜…
朋友： 咪係囉，9成按揭都上唔到，今次真係絕望啦！
筆者： 你之前都好積極儲錢架！
朋友： 儲鬼咩，好辛苦儲到5、60萬，以為做到9成…
筆者： 而家冇啦，500萬樓最多做8成…
朋友： 咪係囉，點追？
筆者： 都唔係嘅，有辦法嘅~~
朋友： 有咩辦法呢？
筆者： 你屋企住緊層樓係早年買落架嘛…
朋友： 係丫~~
筆者： 你同女朋友感情又穩定，準備結婚嘛…
朋友： 係丫~~
筆者： 咪係囉，好多方方法，可以好快買到！
月入4萬 每月儲2萬
就以朋友的情況為例，月入4萬，即使每個月可以儲2萬，都要4至5年時間才可以儲到這筆錢。
辛苦啲…儲錢都唔緊要，最慘是4至5年後當你儲到這筆首期，樓價係咪仲係500萬？如果到時樓價升到上600萬以上，咁就慘啦！
8成按揭都借唔到，最多只能做6成按揭，首期又要倍翻！咁搞法真係追一世都追唔到，唔絕望就奇啦！
買樓的門檻不斷提高，但市場上的買家仍然不斷追貨創新高，錢從何來？
第一招：屋企有樓…翻按！
今天市場上最常見的一招，就是父幹、母幹！
當然也有很多情況是阿哥、家姐幫手，總之就是一家人齊心！
父母不需要很有錢，只要他們年青的時候有買樓就夠了！幾十年前買一層樓可能只是幾萬、十幾萬，今天都已經升到5、600萬了！
而且重點是，早就已經供完了。只要一家人從詳計議，將已經供滿的物業翻按，即是重新再向銀行申請按揭，要套現1、200萬出來給子女做首期並不困難。
其實我們很多投資者，過往都是這麼做，買樓、升值，然後就加按，再買。
不過現在有15% 辣稅，冇呢支歌仔唱，既然如此，何不幫幫家人？當然借錢要衡量自己的還款能力及風險，作為子女的，如果父母翻按自己的物業幫你買樓，記得要自己還，別樣父母增加生活壓力啊。
第二招：翻按唔到…挾份！
當然不是每個家庭都有Full Paid樓可以翻按，例如有些朋友一家人是住公屋，或者未補地價居屋的，這一招未必用得着。
若然如此，不如考慮一下跟家人，或者朋友挾份買。
最公平公正的方法是聯名買入，缺點是兩個人都會成為有樓人士，如果期間要再買樓，就不是首置了！
就要俾15%辣稅！所以如果選擇聯名，就要揀一些3、4年內不會買樓的親人、朋友。
當然，挾份買樓並不是容易的事，利益當前，莫講話朋友，就算家人都有機會反面，看看市場上那麼多爭產個案就知道！
正因如此，在物色合作夥伴的時候要份外小心。
如何保障自己，保障各人的利益，也是一門學間。
首選當然是父母，其次是關係良好的兄弟姊妹。
關係穩定的男女朋友也可以，反正都一齊儲錢準備結婚，不如快快手手買樓先，最少大家有共同目標，比較容易溝通，買樓之後也可以一起住。
以朋友的個案為例，一個人的積蓄有幾十萬，如果跟女朋友合力，每人有幾十萬，那距離目標就近很多了！儲多二、三十萬就搞定，兩人齊心，隨時儲多一兩年就已經儲到！
至於一般親戚、朋友，就要自己觀察、小心，因為大家各有自己的生活背景，有不同的目標，出擊之前，要非常清楚地溝通清楚，如何挾份呢？
買入之後誰住呢？誰供樓呢？幾時賣呢？賺錢之後利益又如何分配呢？最好白紙黑字寫清楚，免得將來爭拗。
第三招：先求賺錢
例如…鍥而不捨400萬！雖然400萬樓是少，但不是沒有，如果你遇上仍然有水位的，400萬以下的物業，雖然面積可能會比較細，環境也不太好，不要緊！
只要借到9成按揭，先買下來，屈就自己住上幾年，待幾年後樓價升了，賺了錢，再換樓！
又例如…先到大陸走一轉，賺了錢再戰香港！
又例如…研究吓非住宅，挾份買樓最公平的方法，其實是投資者以往經常用的公司名義，然而在BSD推出之後，公司名義買住宅就要付重稅，不過非住宅仍然可以，例如車位、工廈等，入門不貴，百多萬都有交易，按揭最多借4成，200萬的物業計算，首期120萬左右，3、4個朋友，每人3、40萬就可以起行了！
幾個朋友開間公司，每個人按自己的股權比例投票就是了。
當中涉及不少法律細節，往後有機會再詳談！
最緊要記住…方法總比困難多！等、儲…唔係辦法！
