剩得3舊水，糧尾點樣過?

假如有一日，你偶然發現，喺距離出糧仲有成個禮拜嘅時候，原來只係剩返三百蚊用…… 你又會點樣好好利用呢三百蚊呢？

憑藉我上一次糧尾個人經驗，我可以話畀大家聽，300蚊過一個禮拜係一啲都唔難，仲係可以有Social Life架添。

其實我本身唔係咩大洗嘅人，但因為上個月我有一位深交嘅朋友有啲財務上困難，基於義氣同信任，我將我嘅積蓄奉上畀佢渡過嗰一個難關，結果我喺出糧前得返300蚊，慶幸嘅係小弟冇女朋友，財務上比較自由奔放。

一日三餐點解決？

喺嗰段緊縮日子，我嘅早餐只有兩款：麥皮或者隔夜飯。前者只係約$1.2一日，我食咗4日，後者就$0之餘仲令媽媽好開心。有一日請爸爸媽媽飲咗半個早茶，點解係半個就下文再交待，只係大約用左$100。所以七日嘅早餐總開支係$104.8。

午餐呢，我一如以往喺5日嘅返工日子入面有3日都係帶飯，剩餘2日就因為唔想向同事賒數嘅關係，我放棄咗同同事食，我選擇咗咬便利店嘅三文治同牛奶，因為驚唔飽我仲喺屋企帶咗隻烚蛋返嚟食，咁樣每日大約$18。如果仲係唔飽，我就會向有份夾錢嘅公司零食箱埋手…… 嗰吓真係好羨慕嗰啲有免費無盡零食提供嘅公司。而其餘兩日假期我都係喺屋企食。所以七日嘅午餐總開支係$36。

晚餐嚟講我就不嬲每晚都返屋企食。嗱我唔係好似嗰啲為咗買樓慳屋企人咁食屋企，但我不嬲都畀半份糧做家用，同埋畢業前已經答應咗父母「返屋企食晚飯」係default setting嚟，所以基本上無咩大問題。所以七日嘅晚餐總開支係$0。不過如果你係無飯家庭中嘅主角，我真係恭喜你呀，可以向練仙進發喇～ YO！捱餓啫，洗乜驚呀？

一個星期喺食嗰方面嘅總開支=$140.8。

交通可以點慳？

我住沙田，喺中環返工，平時不嬲都搭170，即係交通費平均$32一日。

而我因為太擔心自己真係一個仙都無，所以諗咗個耗時比較耐嘅變態返工搭車法。

我改為由沙田搭東鐵去紅磡，一程係$5.9，跟住行半個鐘去尖沙咀搭小輪過中環（一程$2.5）。咁樣來回計，我每日只係花咗$16.8，幾乎係原來嘅一半。比平時早咗咁多起身、行多咁多路、又曬多咗太陽，嗰個禮拜真係覺得自己健康咗LOL。

返五日工、兩日假期喺屋企過，結果七日總共喺返工嘅交通上花費咗$78.1。

Social Life

出咗嚟做嘢就知要約齊人食飯係幾咁難，所以我都無選擇推咗朋友嘅約會，但就坦白講咗我財困緊所以要緊縮開支，咁好彩我嘅朋友都幾體諒我，肯揀啲平價餐廳去食同埋就我location，咁當然佢哋咁體諒我，我當然就負責搵餐廳同諗活動啦。好彩佢哋約咗喺星期五收工後見，咁我又唔洗畀額外錢搭車。

我啲朋友都住九龍，當然我無叫佢哋嚟沙田搵我啦，但我就約佢哋去尖沙咀等，再行去紅磡開餐HAHA！一來唔洗額外車費，而且紅磡區價廉物美嘅選擇都比較多。結果嗰一餐飯我哋平均都係食咗$50。

本身朋友們都好想唱K，咁我就弱弱地提出咗個建議話，不如買啲零食，上去住紅磡嘅某君家中用我之前買落嘅K歌神器唱過夜啦。點知佢哋竟然對呢個建議好滿意！咁喺零食開支上我哋每人大概係$25，因為咁啱有朋友升職所以佢為大家嘅酒水埋咗單，所以佢都變相慳咗筆，大家又飲得開心，佢就更加高興啦。

所以呢，邊個話要慳錢一定要放棄朋友架？不過你係需要慳錢嗰個嘅話，咁你就要預咗出返多啲力諗哂去邊度食同埋玩囉，而唔係一味嗌貴威脅唔出嚟要人就你囉！

加埋我第二朝搭東鐵返屋企嘅$5.9，即係喺五日返工嘅日子我洗咗$199.8，竟然仲有$100蚊剩！

放假嗰陣，諗住橫掂毒留家中都唔會洗咩錢，所以我喺其中一日假期請爸爸媽媽落樓下飲茶，仲好開心同佢哋分享我呢個禮拜同糧尾搏鬥嘅經歷，不過粗心大意嘅我結果只係換嚟佢哋嘅擔心多過開心～ 本身諗住碌卡請佢哋飲茶嘅我，就不被允許請客，但喺我堅持之下，佢哋都收咗我半餐茶錢$100，所以我嘅七日總開支就係$299.8喇:)

如果你想質疑點解我唔一早碌卡過活，答案係我唔鍾意先使未來錢，不過諗住第二日就出糧同埋見係爸爸媽媽，就無所謂啦～～～