WhatsApp Group 12個犯眾憎行為 你唔會有做過啩
其實用 WhatsApp 都有幾多避忌，尤其係Group Chat，筆者就總結了以下12個 WhatsApp Group大忌，盡量唔好犯喇~
1.咩都要錄音
有時WhatsApp group有成十幾個人，未必個個Message都關你事，如果每個錄音都成分鐘，邊個會想聽!? 一兩秒講咩「好啊」或者「OK」呢類打字啦好嗎!?
2.乜都擺上Group講
有時Whatsapp group可能只為工作需要，又或者係為gather成大班人，但唔使乜都擺上group講嘅。無人想知你今日做咗咩同食左乜，下下幾百條Message都咪話唔煩!
3.成日已讀不回
已讀不回friend都算，做正經嘢時唔應公司大group真係好乞人憎。有時你可能叫同事send返啲重要嘢比自己，同事只會藍剔咗但零回應，都唔知佢收到定收唔到。
4.成日Hea覆機
已讀不回都算，最嬲係Hea覆人! 如果只係應「哦」、「嗯」、「好」呢類，真係「唔覆好過覆」! 如果同事成日「哦」你，你都唔知可以點覆佢，同埋會覺得唔多有禮貌。
5.做話題終結者
「話題終結者」係結束對話嘅人。有時喺Group開咗個topic傾，明明一開頭氣氛都好好，唔知點解硬有啲人一出聲就會全世界Dead晒air，即時完左個對話，搞到成個氣氛勁Odd。
6.成日打千字文
正常無人想睇一大堆文字，試下列出重點，同事都睇得舒服啲。再唔係就直接打電話講可能仲直接易明!
7.半夜搵人
如非必要，就唔好夜媽媽先send message俾人啦！每個人都想有覺好瞓啫! 臨瞓睇到message都勁大壓力，又點會瞓得著呢？！當然有緊要事就另計啦! 但小事就唔好半夜三更搵人，都唔知應唔應你機好!
8.避免離題
夾好時間，齊晒腳集中傾重要話題，盡快傾好，唔好嘥大家時間講其他話題。
9.斷斷續續發炮
係group入面你一言，我一語，好容易你講嘢時會被人打斷。唔連貫咁send message，唔單止係朋友，連同事都睇得辛苦。好好利用早前添加嘅回覆功能，可以避免呢個問題。
10.亂Add人入Group
Group入邊嘅人最好都係識嘅，唔係只會製造更多潛水員，講咩話題都唔上水，咁不如一開頭就唔好add佢啦!
11.隨便Quit Group
Quit group總係有原因，撇除技術上如轉電話、換卡等原因，你自願Quit group前禮貌上都應該講聲「我走喇！」，否則會被人覺得你串，唔重視其他人。
12.Del廢Group唔同人講聲
用左whatsapp 咁耐，總有D荒廢左好耐嘅group，如果你覺得已經再無價值留低，Quit group前都有禮貌地say bye bye！
