低薪保安員勇救億萬富豪一命 借機攞「百萬賞賜」失敗：連一句多謝都冇！
廣告
保安員勇救車廂住戶，竟然想借機攞著數？網上討論區上有自稱當豪宅保安的網民發文，憶述自己早前拯救一位豪宅住戶性命，但「點知一句多謝都冇」因而深深不忿，話題更引起一眾網民熱議。
保安救豪宅住戶攞報酬
擔任保安員的事主早前於香港討論區以「我係做豪宅保安，我救咗戶主條命，有冇可能問佢攞番幾百萬賞賜」發文，某日發現有豪宅住戶在沒有開冷氣的密閉車廂入睡，眼見對方「車內訓著差啲死」，隨即拍打其車窗，但對方卻「一句多謝都冇」，因此氣憤地表示「總之就唔叫醒佢等佢死喺車廂度」。
樓主提到，「拍醒佢開車門時，佢係好驚慌chok住條氣同我講冇事呀冇事呀，一句多謝都冇，我份人工萬幾去救你呢個億萬富翁，真係唔抵冇下次」。
網民：愈有錢愈姑寒
相關帖文隨即引起熱議，有網民留言：「冇可能！愈有錢愈姑寒，唔會多謝你，反而窮會感恩。」
- 「可能佢輸到爆廠諗住喺架車度自殺，點知畀你撞破咗搞到自殺唔成，依家佢死唔去仲要孭住幾億債，真係多謝你」
- 「你擾人清夢，唔收投訴已好彩」
- 「你份糧包咗，that’s all。你唔救，你會收warning letter同被人炒。」
- 「救人一命勝造七級浮屠，不要貪心。」
- 「人工包埋喎。」
- 「報酬同損失係正比，唔可能係幾百萬，千倍槓桿。」
- 「做保安見到有個賊入屋你阻止，唔通你又問個業主攞返錢咩？」
- 「你厚多士啊！」
- 「哇！你好貪錢！」
- 「積咗德，個天會以另一種形式回報你，自己唔好去討。」
較早前，有求職網站公佈數據指，本港保安員平均月薪為17,000元。另外，根據不同的保安職責，大致分為4個保安工作類別：
- 甲類：只限「單幢式私人住宅建築物」而無須攜帶槍械彈藥執行的護衞工作
- 乙類：就任何人、處所或財產提供的、無須攜帶槍械彈藥執行的護衞工作(但並非包括在甲類之內者)
- 丙類：須攜帶槍械彈藥執行的護衞工作
- 丁類：安裝、保養及 /或修理保安裝置及 /或 (為個別處所或地方 )設計附有保安裝置的系統
圖片來源：unsplash@liskozac、unsplash@bkotynski
