酌情批員工放1小時年假｜請假太多接警告信 事主圍爐取暖反被鬧累街坊
廣告
公司年假（AL/Annual Leave)乃員工福利，有公司以人情手段處理例假，批准員工請「1小時例假」。該公司有員工請得太密，思疑因此觸怒老細，而慘食warning letter 警告信。他在網上撰文吐苦水，結果圍爐取暖失敗，被網民一片負評怒插。
「人事部又話太多紙」
事主在社交群組撰文，題為「我點請假都俾人話，大家評吓理！」，之後他娓娓道來故事：
「公司可以每小時請假，照扣AL，例如朝早有事遲到，可以請9-10am(1小時)，不過咁就要係WhatsApp谷講。」
「話說我喺谷請得多，腦細唔高興，話影響其他同事，畀咗封警告信我，笑咗乜自己扣假都唔得？乜又預知到自己請一個鐘？」
事主繼續責備公司：「之後，我事先遞紙請假，人事部又話太多紙喎，增加佢哋工作量，真係好有趣嘅公司。」
網民聲討：
帖文出街不足一天，速成為網上熱話。事主原本以為網友撐自己，豈料卻被群眾聲討。
- 其實你朝早吓吓要請一個鐘係點解？因為遲到囉！你公司有呢個制度其實好包容，for 真係有事需要行開一陣嘅同事唔駛請半日假咁多，但就比你咁利用！咁大個人自律吓啦。
- 呢間公司個人事部真係唔得呢啲人死，一個AL分24小時去扣遲到
- 一日一張紙，仲要每次出糧計返落糧單度邊日扣幾多個鐘…
- 如果我係同事都幾討厭你，公司諗住開呢個制度俾人有時行方便，你就abuse 左，成日攞嚟當成遲到嘅遮醜布。咁喺公司管理角度來講，好簡單啫，有投訴，咁咪唔俾囉，變返一請請成日，你其他同事真係多謝你唔少。
- 如果你日日都遲到然後都話扣假就算，我諗唔止腦細，你啲同事都唔多like囉
- 好明顯當老奉遲到
- 誠信是十分重要。我地全team人都覺得佢係一個靠唔住既人囉…根本已到左佢返唔返工都唔重要。
- 所以公司出得信俾你，證明你已經唔重要。
雖然事主被網民鬧爆，不過仍有人支持事主。網友勸事主：「Cap底對話 搵報紙同上勞工處啦。」
- 規矩HR定，定咗又搬龍門。一係就改公司守則唔俾人一個鐘請，或者寫明限制一定次數。唔好玩釋法，唔like某人就warn人咁低莊。
- 話明可以一個鍾咁請有咩可能又反口話請太多唔請得
- 我以前想請大假，冇一次批，又唔係同自己部門同事撞假，d假用到我走都用唔到，用假早走都唔得，
- 其實都係一個excel做到既野，將日做曬做時(10日大假轉做90個鐘)，實際唔會用幾多時間去做，係多左張紙做 filing, 除非間公司成千人，日日都有成百個人請一個鐘遲到假…
勞工資訊：年假的發放
根據《勞工法例》，僱員的有薪年假的發放，是由僱主在徵詢僱員後指定放假日期。如果僱主無合理解釋而不讓員工放年假，可被檢控及罰款。
在受僱每滿 12 個月後，僱員須於隨後 12 個月之內放取應得的有薪年假。僱員可以選擇接受款項代替部分年假，但祇限於超逾 10 天的年假部分。
年假日期應由僱主在徵詢僱員或其代表後指定。僱主須至少在假期開始的 14 天 前以書面通知僱員年假的日期；如雙方同意，可以較短時間通知。
違例與罰則
僱主如無合理辯解而不讓僱員放年假，可被檢控，一經定罪，最高可被罰款 5 萬元。
僱主不支付年假薪酬給僱員，可被檢控，一經定罪，最高可被罰款 5 萬元。
以上均是勞工法例有關放年假的規定，年假的安排均經由僱主及僱員雙方同意下安排。而事主今次是想注銷已經批准的年假，理論上，也是需要在雙方同意之下才會成功更改安排。
圖片來源：FB@奴工處、Unsplash@marvin meyer、Unsplash@ Jason Goodman
