診所職場事 【寶豬趣聞】上網乜乜乜｜珍寶豬｜經一專欄

出藥時，佢指住啲藥：「你哋啲靚藥嚟？」
唔理貴定平，食得好你，止到鼻水就係靚藥？我咁答會唔會俾人打～
我：「醫生開俾你嘅都係對應返你頭先喺醫生房度講嘅病徵，收鼻水啦，止咳啦，化痰都有啊」

撰文：珍寶豬

佢：「你哋啲藥唔會係cheap嘢嚟呀嘛？」
其實點先為之cheap？
我：「我哋啲藥都係藥廠藥嚟嘅～合法㗎」
佢指指其中一包藥：「但係我上網睇過，啲人話呢隻藥唔係咁有效喎，個藥名好似都係咁上下，你做咩咁都開俾我？」
人哋嗌你食咩你就食咩，咁你唔駛睇醫生啦，照人哋份藥去藥房執咪得囉～
我：「咁你有冇食過呢隻藥？」

佢：「印象中就冇啦」
我：「其他人覺得冇效，唔代表你冇㗎嘛，你可以食咗先睇吓點～」
佢：「即係搵我做白老鼠呀？」
…小姐嘅轉數果然好神奇，九曲十三彎都入晒～
我：「點會係呢～我只係想講上網睇到嘅同你自己嘅未必係一樣」
佢：「佢哋上網講得冇效就應該都係冇效㗎啦，我唔要呢隻呀，你轉過隻俾我呀」
我：「要轉藥嘅話，我要問醫生嘅～仲有冇邊隻藥你係上網見過冇效呀？」
佢：「一時三刻記唔起啦，總之你同我轉咗呢隻先啦」

好啦，我同醫生講完小姐點解堅持轉藥，心死嘅醫生轉咗另一隻俾佢。
我再出返去同小姐講：「小姐，醫生轉咗呢隻俾你啦」

佢一望大驚：「喂！你轉隻仲差嘅俾我嘅？呢隻上網啲人講仲冇效過頭先嗰隻喎」
咁點呀？二揀一啦。
我：「我哋係得呢兩隻咋」
佢：「唔係呀嘛？咁大間診所得兩隻化痰？」
我望望診所哀傷地回答：「都唔係好大間啫，以診所嚟講，大把大間好多…」
佢又望望診所：「可唔可以轉返頭先嗰隻？」
搞咁多嘢咪又係還原基本步～