診所職場事 寶豬趣聞 特別服務 上集
佢：「診所呀嗎？」
我：「係呀～」
佢：「你哋有咩服務呀？」
醫生，你可以提供到啲咩服務呀？我淨係答佢『診症』嘅話，好似唔夠勁揪啊～ 點算好點算好！我係一個好員工！
我：「我哋嘅醫生會睇傷風感冒咳肚屙便秘周身骨痛等等，會開藥啦，會轉介啦，會了解你需要幫你揀適合你嘅身體檢查～」
佢：「哦…」
我咁落力…居然只換嚟一個字『哦』，我好傷心。
我報仇：「嗯」
佢：「哦…仲有冇其他呀？」
我：「或者先生有啲咩需要呢？可以講出嚟睇吓我哋有冇呀？」
佢：「特別嘅小手術呢？」
點特別法呀？人哋整雙眼皮，你想整十眼皮呀？人哋想整高個鼻，你想割埋個鼻，佛地魔咁？好出眾喎～
我：「不如講清楚係邊啲小手術呀？我哋都有雞眼，粉瘤呢類嘅小手術嘅～」
佢用氣音講咗啲嘢，我：「唔好意思，我聽唔到，可唔可以講多次啊？」
佢：「忍術」
搵忍者亂太郎新丁啦，新丁～有人搵你呀。手術同忍術兩樣嘢嚟喎…
我：「….先生，我哋診所嚟，冇忍術學」
佢：「我講嗰度嘅忍…」
遲鈍的我：「邊度呀？」
佢：「姑娘，你係咪性騷擾我呀？」
我幾時性騷擾你呀？你過度幻想呀？
我：「我冇呀，我問你邊度咋？」
佢：「梗係我嗰度啦」
哦！你想講性能力呀嘛？隔住個電話唔駛怕醜啊～我又唔知你係邊個。
下回續
其他也很值得細閱的寶珠趣聞，還有以下四則。
【寶豬趣聞】咁我發燒你哋醫唔醫我呀
有日，一位小姐氣來氣喘嚟到診所。
佢問我：「姑娘？」
我：「係～請問有咩事呢？」
佢：「我好似潮熱呀」
小姐，我睇你個樣都最多係三十尾咋喎～咁快更年期？
我：「一係我同你登記先啊，一陣有咩可以同醫生講啊」
小姐同我好似處於不同空間，佢繼續自己講：「我覺得自己忽冷忽熱咗大半日㗎啦…係咪潮熱呀？係咪提早收經呀？」
我：「唔駛咁緊張住～睇咗醫生先啦，我而家同你登記，同你探埋熱先呀」
身分證顯示二十頭，哇，好彩頭先我冇衰多口講句『你三十幾四十邊有咁快更年期呀』，如果唔係真係火星見啦…
探熱後，38.4度。輕微發燒啊～
我：「小姐，你有啲燒啊～」
佢：「吓？但係我冇病冇感冒咳喎」
我：「有時可能係感染咗一啲病毒或者細菌，身體知道要抗敵，所以提高體溫嘅～又或者你頭先跑過嚟？體溫都可能會高啲啊」
佢：「咁即係我唔係更年期呀？我會唔會燒壞腦呀？」
我：「係咪更年期都需要檢查咗先知嘅，至於燒壞腦就…唔駛太擔心啊」
38.4度就想燒壞腦？
佢：「我而家M到緊，檢唔檢查得？」
小姐，你有月經又點更年期呀？你覺得你流嗰啲係咩呀？
我：「你如果想做婦科檢查嘅，就等月經完咗，乾淨晒之後先過嚟做～而家唔做得㗎」
佢：「咁我發燒你哋醫唔醫我呀？」
醫…冇其他病徵嘅，醫生咪開份退燒藥俾你～之後就收你二三百咁啫。照顧到你心靈上身體上嘅需要，都係醫生榮幸嚟。
發燒其實好普遍，因為呢個係身體自我保護機制。
【寶豬趣聞】諗得嚟你籮柚爛啦
有日，一位先生嚟到診所。
佢：「姑娘，你哋醫生係男定女呀？」
我：「男醫生嚟啊～」
佢：「男醫生呀…嗯…」
我：「要唔要同你登記睇醫生？」
佢：「你俾我諗諗」
我：「好呀～」
佢行埋去一邊坐低咗思考吓究竟睇定唔睇。
一思考就成十分鐘了。
佢又行埋嚟問：「你頭先係話男醫生呀？」
我冇老人痴呆：「係呀」
佢：「嘖」
你做咩『嘖』呀？男醫生有咩問題呀？你唔歡喜咪出去搵個第二個囉？實有間有女醫生㗎！
我：「有冇啲咩幫到你呀？」
佢：「我唔想要男醫生呀」
醫生夠想日日睇靚女，日日談笑風生春風起不知幾爽。
我：「咁你出去睇吓其他診所有冇女醫生啦～我呢度得一個醫生咋」
佢：「你俾我諗吓」
男醫生唔會喺你諗諗吓期間變成女醫生呀，就算變到，都會係女版鄭中基。你要嗎？
我要，我要打鑊佢。
佢又再行埋嚟。
我:「係咪睇醫生呀？」
佢：「我想俾人睇籮柚㗎～」
我：「男醫生咪啱囉」
佢：「唔怕尷尬咩？」
我：「醫生日日見唔少啦，仲邊有尷尬」
佢：「我尷尬呀～」
你搵女醫生睇就唔會尷尬啦喎？
我：「大家男人，你有佢又有，有咩好尷尬呀～你睇就登記啦」
佢：「你唔好迫我啦，你俾我諗吓先啦，你而家好似迫我賣春咁」
唔好諗啦，諗得嚟你籮柚爛啦…
【寶豬趣聞】你做乜又CUT我線呀
電話響起～
我：「你好，乜乜診所」
佢：「你哋聖誕係幾時呀？」
個個聖誕都一樣㗎啦～有分你定我咩～
我：「係咪想問聖誕假期開唔開啊？而家仲咁早，未知啊，正路就逢紅日就放嘅～」
佢：「唔係呀，我想你哋知你哋聖誕咋」
你講乜呀…我唔明嘅？
我：「年年聖誕都12月25㗎啦～唔係咩？」
佢：「我唔知你哋係咪呀嘛，如果唔係我打嚟做乜喎」
我：「哦…我哋都一樣係12月25，同普羅大眾一樣啊」
佢：「咁醫生呢？」
我：「醫生都係平凡人～」
佢：「佢個聖誕呀！」
救命….
我：「都係12月25…小姐，其實我有咩幫到你呀？」
佢：「我打嚟問嘢係咪唔得㗎呢？」
我：「我唔係咁嘅意思，只係我想知我有咩幫到你…」
佢：「你幫到我嘅，你就唔會坐喺度聽電話啦！你都冇嘢幫到我！」
嘟。
既然幫你唔到，收你線好正常吧，合唔合理先？
佢再打嚟：「你做咩CUT我線呀？」
我：「小姐你話冇嘢幫到你嘛～冇嘢幫到你咪收線囉？」
佢：「我都未問完！」
我：「請問小姐仲有咩想問啊？」
佢：「你哋拜嗰個聖誕係拜邊個呀？」
乜耶穌係拜㗎咩？
我：「唔好意思呀小姐，我哋並無任何宗教信仰～」
佢：「咁你更加冇嘢幫到我啦！」
嘟。
佢再打嚟：「你做咩又CUT我線呀？」
我：「我以為我哋嘅對話已經完畢…」
嘟。
今次係佢收我線，佢再冇打嚟了。
【寶豬趣聞】我返 Part Time 遇到呢位大姑
冇返兩個月工食到山窮水盡，最近我又返工啦～
搵咗份兼職嚟吊吓命…返工前，我有諗定打招呼對白『大家好，我叫阿豬呀，多多指教』。
點知，我返工嗰日天氣不佳，我喺診所門口等班大姑(即係階級比我高的姑娘)開門。
一位大姑返到嚟口黑面黑望住我，再由上而下由下而上咁掃視我一輪。
佢：「嘖，你係新嚟嗰個Part time呀？」
我：「係呀」
佢：「嘖，第一日返工就搞風搞雨啦你，真係煩死人」
對唔住啦，我篤小便係大篤啲嘅。
我冇出聲，只笑笑。
開門後，佢帶我入藥房。
佢：「你叫咩名話？」
我：「我叫阿豬呀」
佢：「有冇英文名呀？中文名好娘呀」
我：「….」
佢：「冇呀？咁叫阿rain啦！你一嚟到就落雨，好襯你呀」
我係邊個阿rain呀？小背心嗰個定對眼好細嗰個？點解要幫我改名呀？小學生嗎？
佢：「做咩唔出聲呀？唔鍾意呀？定係啞呀你？」
我想安安樂樂打份工：「唔係～今日我做咩位呀？登記？」
佢：「你搞晒啲清潔先啦」
我：「好呀」
拖完地吸完塵，發覺仲係得佢一粒大姑喺度，我：「今日係咪冇其他同事啊？」
佢：「得我同你」
我好興奮呀真係。
佢：「你唔想對住我嘅，而家扯囉」
頂你個制。
好，我坐低，我係唔走呀，你咬我籮柚呀？
