診所職場事 寶豬趣聞 空肚抽血 下集

不過我哋呢度夜晚八點半後就會閂燈閂冷氣～可能有少少焗…」
我會帶走晒我啲零食，你想食嘢嘅唯有奶吓地板奶吓枱面啦陰公。

佢：「我今晚唔可以抽咩？」

我：「化驗所收血有限時限刻㗎～佢哋都早過我哋收工。我哋唔會將你啲血留過夜～所以我哋都係將抽血檢查嘅安排晒喺朝早～」

佢：「即係就算而家我話抽都唔得呀？等都唔得呀？」

我：「你可以等～喺度等到聽朝九點半都得，我哋鎖門咋嘛，醫生房入面有張診症床可以俾你攤吓嘅」

不過嗰張萬人斬床嚟…坦白講，我就唔會想攤上去啦。今晚一於ONE NIGHT STAND啦！

佢聽到心慌慌，退後咗幾步：「今日真係唔做得呀？」

我：「係呀，因為你食咗嘢呀～你大小便嗰啲就可以交咗先。」

佢：「聽日係咪第一個就睇我？」

我：「冇問題呀，醫生一返嚟就同你抽血，我都唔會想你餓咁耐嘅」
佢：「我食少少嘢啫，搞到我又要嚟多次，係真唔係㗎其實？」

你估我暗戀你，喺度製造機會見多你幾次咩…

我：「真嘅，我都冇必要呃你啫」

佢無奈離開。

第二朝，佢好乖咁空肚嚟。

如果錯過咗上集，依家即刻睇返：空肚抽血 上集

有日有位小姐要做身體檢查，需要空肚抽血嘅…

登記時，我問小姐：「噚晚十二點後有冇食嘢呀？」

佢擰擰頭：「十二點咁夜冇食啦，我唔食宵夜嘅…」

再講：「今朝七點食咗早餐」

我抬頭望住佢：「噚日醫生同同事應該有提你十二點後唔可以進食啊？今朝要空肚抽血嘛？」

佢：「係呀，有講呀，我知呀」

我：「咁你頭先話七點食咗早餐？食咗咩呀？」

佢一臉不屑，覺得我問嚟都多餘：「早餐囉？唔通食風食空氣呀？」

我：「咁你食過啲咩飲過啲咩呀？」

佢塊臉黑過鑊屎：「飲咗奶茶，食咗火腿通粉，仲有多士囉」

我：「吓…咁今日唔可以抽血啦，你聽日要空肚過嚟呀～」

佢：「點解呀？」

我：「因為要空肚抽血呀，唔可以食早餐㗎，夜晚十二點後就唔可以食嘢～」

佢：「而家幾點呀？」

我：「十點」

佢：「我七點食㗎，咩都消化晒啦。再講，你抽血喺個胃落針㗎咩？我食嘢關你咩事呀？」

…..如果係咁計嘅，我想喺你個腦度落針先。嚟～伸個頭埋嚟姨姨度。

我：「唔得㗎～你聽日空肚再嚟啦，如果唔係啲指數根本唔可以真實反映到你身體狀況，驗嚟都冇用～」

佢：「你咪抽落啲囉？」

腳趾尾夠唔夠落呀？

我：「我哋淨係抽手嘅，而且血係全身走㗎嘛…你都係聽日再嚟啦，總之今晚十二點後唔好再食嘢啦，抽完血先去食早餐就啱㗎啦」

佢：「啱你個死人頭！今日抽唔到我唔走㗎啦！」

更多寶豬趣聞：自我復原

電話響起～
我：「你好～乜乜診所」
佢：「姑娘呀，我想問呢…我係咪要睇醫生呀？」
…嗯。打嚟第一句冇前因冇後果就問呢啲，好啦，你要睇醫生啦～
我：「嚟睇呀，七點前嚟到就得㗎啦」
佢猶疑：「一定要睇㗎？」

我：「覺得唔舒服嘅就嚟睇啦～」
佢：「會唔會唔睇都可以自己好返㗎？」
我：「我個人建議就係俾醫生睇睇最穩陣嘅」
佢：「但係人應該有自我復原能力㗎嘛？」

我唔可以再做倒米大王！

我：「俾醫生睇吓就穩陣啲咁囉～」
佢：「姑娘，其實你知唔知我咩事呀？我好似未講呀？」
我：「係呀，你冇講。不過就算我知你咩事，我都冇得喺電話度俾任何醫療意見你，因為我唔係醫生嘛～所以都係會叫你嚟睇醫生㗎咋」
佢：「我以為你點都會俾到少少提議」
嗰少少既卑微嘅提議就係：你嚟睇醫生啦。
我：「我提供返個應診時間俾你呀？」
佢：「唔駛啦，我都冇諗住嚟睇嘅其實」

我：「咁既然我冇嘢可以幫到你，我收線㗎啦～」
佢：「我覺得我唔睇醫生都可以好得返」
我：「嗯，好呀，祝你早日康復，BYEBYE」
佢：「喂？喂？」
我：「請問仲有咩事呢？」
佢：「如果我小便痛咗幾日，仲會痛幾多日呀？」

呢啲有得計㗎咩？

我：「小姐，我建議你即刻嚟睇醫生，小便痛可以引起其他問題～唔好再拖啦，都幾日啦，身體係自己嘅，唔好咁對自己啦」
佢：「我知呀，但係我都好信自己可以自我復原，不過我想知仲有幾多日痛啫」
我：「你再咁拖落去，一陣搞到腎炎呀～快啲嚟睇啦」
佢：「我小便痛又點會關個腎事…姑娘，你係咪搞錯咗啲嘢呀？兩樣嘢嚟㗎～」

我：「都係成個泌尿系統嚟㗎～真係唔拖得㗎，你就算唔睇我哋都睇其他醫生啦」
佢：「點會有關係呀，同你傾唔埋欄啦，你都冇學識嘅」
嘟。
…個腦同個人都分得好開吓喎。

延伸閱讀：

【寶豬趣聞】我返 Part Time 遇到呢位大姑

【寶豬趣聞】消毒藥水