診所職場事 寶豬趣聞 落咗單要水嘅小姐 珍寶豬

【診所職場事|寶豬趣聞】落咗單要水嘅小姐|珍寶豬

職場

廣告

有日一位太太登記完坐喺度等睇醫生。

佢坐坐吓就大聲嗌:「有冇水呀?」
低頭做緊嘢嘅我冇理佢,因為我唔知佢係咪同緊我講嘢。
佢隔一陣再大嗌:「我杯水呢?」
我抬頭望望佢:「你係咪同緊我講嘢呀?」

撰文:珍寶豬funnyclinic)|圖片:電視截圖

「唔係俾錢包服務㗎咩?」

佢:「我頭先落咗單要水㗎喎,喺邊呀?」
埋邊水機自取呀醒目女。
我:「水機喺角落位,你可以自己去拎,側邊有水杯」
佢:「自己嚟㗎咩?」
唔通我射俾你呀~
我:「係呀,就喺呢度咋嘛」
佢望望水機方向,再同我講:「你行出嚟斟俾我啦,室溫水呀」
我啋你都有味。
我:「你有咩唔方便自己過唔到去呀?」

佢好坦誠:「冇㗎,唔係俾錢包服務㗎咩?」
我哋如果有加一收費嘅話,應該ok嘅。
我:「唔好意思,你俾嘅錢係診金同藥費,如果你冇咩行動上唔方便嘅就自己去斟水啦」
佢『嘖』咗我一聲,眼超超咁睥住我行去斟水,我見佢咁就繼續低頭做嘢。
突然佢『哎呀』一聲,我抬頭望,佢懶係驚訝咁講:「哎呀,唔好意思喎,我唔小心倒瀉水喎」
係呀,實係唔小心啦你。
我:「唔緊要,你坐去另一邊先啦,我轉頭出嚟拖拖佢呀」
佢:「快啲呀,如果唔係跣親我,賠到你工都冇呀」
你要作賤自己我都冇辦法嘅…
我:「你坐去另一邊坐定定就唔會跣㗎啦,你坐低啦,我轉頭出嚟」

佢:「我唔可以企喺度等你出嚟㗎咩」
大家都幾十歲人,可唔可以唔好玩小學雞嘢呀…
我:「可以呀,你鍾意啦,唔好周圍行就得㗎啦」
結果,佢係咁周圍行,係咁踩到成間診所地板都係黑腳印…但係冇跣親,應該係下盤夠穩。

延伸閱讀:想要「過時」病假紙嘅先生|珍寶豬

延伸閱讀:喺殮房出返嚟嘅小姐|珍寶豬

診所職場事 寶豬趣聞 落咗單要水嘅小姐 珍寶豬
圖片:電視截圖