診所職場事 寶豬趣聞 被HIGH死的太太 珍寶豬

診所職場事【寶豬趣聞】被HIGH死的太太 上集|珍寶豬

職場

廣告

【診所職場事】有日有位太太嚟到診所~

佢行埋嚟用唔咸唔淡嘅廣東話同我講:「姑娘,你可唔可以幫我九我老公呀?」
我一頭問題:「救你老公?你老公咩事呀?佢喺邊呀?」
佢:「唔係九呀,係九~~(佢拉長尾音)」

撰文:珍寶豬
…你拉長完尾音都同樣係九啊….
我:「咁呀…你一係寫俾我呀?」
佢拎起筆眼仔碌咗兩碌,哄個頭埋嚟問我:「九點寫呀?我一時唔記得」
啊啊啊啊~
我:「唔係救呀?拯救個救喎?你個九係咩九呀?」
佢:「九佢呀」
…可能我領悟力太低~我真係悟唔出個正字呀~醫生,我想返去讀多幾年書,呢度可唔可以交俾你?
我:「九佢啲咩呀?」
佢:「九佢臭呀!HIGH死我啦!」

請問這是咸濕故事的發展路向嗎?我唔想知你有幾HIGH呀大佬~
我:「臭?邊度臭呀?你老公臭你又點解好high呀?你對臭味有濃厚興趣?」
佢死魚眼望住我:「姑娘你講緊乜呀?」
我自己都忍唔住笑:「其實我都唔係好知自己講緊乜,我都係估估吓~如果你可以寫到俾我睇應該有幫助…」
佢又拎起筆,諗咗陣,動起筆:「嗱」
我望住白紙上,一個好細嘅字…『死』,嗯~我想拍拍你膊頭鼓勵你,我知你盡力了。
我:「哦?死呀~邊個死咗呀?」
佢:「我呀!」
嗯,日光日白真猛鬼,請保持鎮定,只要唔表現出驚慌樣,佢都耐我唔何~戲教嘅!

我:「嗯~你死咗呀?你知唔知自己而家喺邊呀?你會唔會去錯咗地方呀?」
佢望望四周:「診所呀你係?」
我:「係呀,咁你嚟診所係咪睇醫生呀?」
佢拍枱表現出好焦急嘅樣:「我同你講咗好耐啦!你究竟明唔明我講緊乜呀?我俾我老公HIGH死啦!」
啊!HIGH!普通話:害!害死!
這鬼真猛啊。

延伸閱讀:

診所職場事 【寶豬趣聞】 牙醫

 

【診所職場事】上回講到小姐終於發現自己張身分證漏低咗喺診所~佢懷疑我KEEP住佢張身分證係有不軌企圖…我對灰灰白白淨係得個頭嘅相冇興趣啊。
我:「小姐,你冷靜啲,你張身分證我已經幫你收起咗喺櫃桶,你可以隨時過嚟拎返啊」
佢:「你留起咗我張身分證,你冇俾返我,仲要我過嚟拎?我過咗對面海啦,你拎返過嚟呀!」

撰文:珍寶豬
我:「喺登記後我有親自俾返張身分證你㗎,係你走嗰時擺低咗佢喺櫈上面」
佢:「我就唔會過嚟㗎啦,我呢幾日都唔得閒囉,我都明你呢啲打工仔懶過積㗎啦,你一係就同我掉去郵筒囉」

我:「寄返俾你?你會唔會過嚟拎安全啲呀?」
佢:「就咁掉落去得啦,佢哋自然會送」
送去垃圾桶嗎?
我:「咁呀…一係你俾地址我啦,我同你寄掛號啦」
佢:「唔駛呀,你就咁成張掉落去得㗎啦!」
我:「吓?地址呢?」
佢:「我咪話咗佢哋自然會送囉,你有冇聽我講嘢㗎?」
我:「我有聽…係唔明點解唔駛寫地址就會送到去你手上啫」
佢:「我香港公民嚟㗎」
我知,如果唔係你點會有身分證。

我:「所以?」
佢:「政府有我地址有資料㗎嘛!見到我唔見咗嘢仲唔擒擒青俾返我呀?記得掉去郵筒呀!我唔得閒同你講呀!我已經俾你玩殘㗎啦」

嘟。
收線後,我拉出櫃桶望住小姐張身分證發呆。
同事問我:「做咩呀?佢幾時嚟拎呀?」
我:「佢叫我就咁掉落郵筒喎」
同事:「咪制呀!有咩事張身分證唔見咗,佢入你數㗎啦」

於是,我閂返埋個櫃桶。
小姐喺一星期後嚟到診所發爛渣,話打咗好多次電話去郵局都冇人覆到佢張身分證去咗邊…
我拉出櫃桶…surprise!佢爭啲想一巴打爆我個咀。

延伸閱讀:

診所職場事【寶豬趣聞】成為有錢人 下回

 

【診所職場事】電話響起~
一位小姐都未等我講開場白,佢已經爆我:「我張身分證係咪喺你度呀?你留住我張身分證有咩企圖呀?你有冇搞錯呀?留住我張身分證做咩呀你?吓?」

撰文:珍寶豬

等我講返上晝嘅事先…
一位小姐嚟登記,我:「得㗎啦,你坐低等等啊,身分證俾返你先呀」
佢一手拎住電話,一手拎住身分證,行埋去坐低等睇醫生。
睇完醫生拎完藥離開診所,我望望出面嘅櫈,發現佢張身分證貼貼服服咁喺櫈面上。
於是我打俾佢:「喂?係咪乜小姐呀?」
佢:「唔駛呀」
嘟。佢技巧純熟地收咗我線。
我再打過去:「喂?你張身分證…」

我都未講完,又嘟咗我了。
咁我唯有等佢自己發現…

就係咁,佢就爆我:「留住我張身分證做咩呀你?吓?」
我:「乜小姐係咪?你張身分證漏咗喺度之後我有即刻打俾你㗎~」
佢:「幾時呀?咩時辰呀?WHEN呀?」
又唔駛咁激動嘅,就算你用三個問法,都只不過係問緊同一樣嘢啫,我都唔會答你三句。
我:「今日上晝十一點半,打咗兩次俾你」
佢:「我冇聽過你電話喎!而家幾點呀?三點八呀!你留住我張身分證咁耐去做咩呀?有咩不軌企圖呀?」
我份人冇咩創意動力㗎咋,人哋唔提吓我,我都唔願郁嘅。你突然提到不軌企圖就勾起晒我啲動力,我好想即刻去隔離影印舖叫佢放大你張身分證個樣,放大到4000%貼喺診所門口…『如發現此人,請與本診所職員聯絡』。