診所職場事 寶豬趣聞 要求 大大粒 藥丸 珍寶豬

【診所職場事|寶豬趣聞】要求要大大粒藥丸嘅小姐|珍寶豬

職場

廣告

有日一位小姐睇完醫生,我出藥俾佢。

我:「呢度每日四次,每次一粒…」
我未講完,佢就一句劈埋嚟:「呢啲咩嘢嚟㗎?」
藥呀,唔通係薯條呀?
我:「藥囉?有咩問題?」
佢:「我頭先咪講咗要大大粒囉!」

撰文:珍寶豬funnyclinic)|圖片:電視截圖

小姐想要大到吞唔到嘅藥丸?

點先叫大粒呀?點先係你心目中嘅大大粒呀?
我:「都好大粒啦喎…」
佢:「我要啲大到吞唔到嗰啲呀!」
你要嚟自殺的嗎?我而家有理由懷疑你想自殺!
我:「我哋冇啲咁大粒嘅藥啦,啲藥吞唔到又點食呢,一定係要俾人吞到㗎喎!」
佢一手掃開枱面上嘅藥:「我唔係要呢啲呀!我要俾錢嘅點解要硬食呀?」

唔喜歡硬呀?不如試吓軟呀?我哋都可以開晒藥水俾你㗎!
我:「醫生係根據你嘅情況去處方俾你嘅,呢啲藥都啱你個情況食㗎啦,如果你話真係要大粒到吞唔到嘅,我哋真係冇呢啲藥。」
佢:「咁我講咗要大大粒㗎嘛,頭先喺房佢(醫生)又話OKOK」
我拎埋其他藥做對比:「醫生真係盡量開俾你㗎啦,你望吓,我哋其他藥係咁細粒,對比起你嗰啲真係算大粒㗎啦,你望吓呀」
佢望一望:「入埋晒啲細細粒嘅藥,咁鬼小家㗎你哋」
我下次要求藥廠整啲光酥餅SIZE藥俾你呀好冇呀?
我:「藥要易吞㗎嘛…太大粒難吞嘅話好辛苦㗎,病都已經好辛苦㗎啦…我哋真係盡量俾你㗎啦,你返去食咗啲藥先啦!」

佢唔忿氣拎錢出嚟找數:「幾百蚊買啲咁細粒嘅返去唔抵㗎嘛!幾百蚊買到好多斤米啦!我今次喉嚨夠腫!如果唔係你呢啲藥,我應該一下過就吞得晒㗎啦!」
…我望唔望你喉嚨腫到得返一條線好呀?

診所職場事 寶豬趣聞 要求要大大粒藥丸嘅小姐 珍寶豬
圖片:電視截圖