同事 辭識 離職 老闆 Farewell飯 拎著數 討論區 網民熱話

同事食4,000蚊Farewell飯 老闆鬧無家教 打工仔:抵鬧 人cheap無得醫!|網民熱話

社會熱話

廣告

【同事.Farewell飯.網民熱話】近日不少網民都在討論一單天價「Farewell飯」奇聞,話說有離職同事食「Farewell飯」,10個人去飲茶,最後飲咗成4,000蚊,嗰位離職同事仲俾老闆鬧「無家教」。

撰文:Smart ED編輯部|圖片:unsplash、電視截圖、討論區截圖|資料來源:討論區

同事離職食Farewell飯

討論區就提到,嗰位離職同事本身份人好識搵著數,「平時返工都周圍𢱑著數,乜都要拎得大份過人」。平時同啲同事食飯,都剩係會嗌自己鍾意食嘅嘢,所以呢餐「Farewell飯,本身同事已經不存厚望。

呢餐「Farewell飯」去咗飲茶,呢位離職同事一去到已經拎張點心紙狂嗌嘢食,仲要嗌到成枱貴價特點。老闆嚟到之後,都俾成枱嘢食嚇親,仲問咗句「食唔食得晒?」 到最後食剩成枱餸,呢餐飯10個人食,埋單要4,000幾蚊。

見到食剩成枱嘢食,老闆都好勞氣,話個離職同事:「你到底有冇家教?叫到成枱餸又食剩咁多?」嗰位同事聽到之後,塊面即刻谷到紅晒。

網民:老板鬧得好!

唔少打工仔都企喺老闆呢邊,認為離職同事實在「抵鬧」,直言「老板鬧得好」、「無衣食,就抵比人鬧的」。有人認為離職同事嘅做法「好cheap」、「人cheap無得醫!」。

錢都唔係問題,食唔哂浪費食物簡直係大嘥鬼

同事佔小便宜 留壞印象?

另有網民提到,離職同事一去到就係咁叫嘢,其實一齊食飯嘅同事應該要阻止,「等於變咗幫兇?錢以外,浪費亦唔係咁好。」

除老闆遲出現外,其他管理層唔出聲?一見唔對路就即時截住呢個人啦,仲比佢係咁點野食?

有打工仔就話,呢個行為唔止自私、拎著數,而且浪費食物係「無衣食」嘅行為。有人就話,離職同事貪埋呢啲小便宜,留畀人一個唔好嘅印象,即使有好嘢都唔會益佢!