【經一專欄】診所職場事 【寶豬趣聞】幾十歲人張醫療卡 |珍寶豬

【經一專欄】診所職場事 【寶豬趣聞】幾十歲人張醫療卡 |珍寶豬

經一專欄診所職場事】有日一位小姐嚟到~佢行到埋嚟淨係一味望住我…
我:「睇醫生嘅麻煩俾身分證明文件我登記啊」
佢遞出一張醫療卡。
我:「你未喺度睇過嘅係咪?呢張卡我哋唔收㗎~如果你要睇嘅,我哋可以開返收據俾你」

撰文:珍寶豬

 

佢立即發爛渣亦得,得咗:「我做咗幾十年人都唔知會有診所唔收我張卡囉」
凡事總有第一次,驚喜嗎?有破處嘅感覺嗎?
我:「係呀我哋唔收啊~如果你要用醫療卡最好打返電話上去問客戶服務附近有邊間診所收~」
佢:「你對眼咁細係咪睇唔清呀?我張卡唔係cheap嘢嚟喎」
你個人cheap嘛。人身攻擊係唔要得嘅行為啊!
我:「我哋唔係張張醫療卡公司都有合作嘅,唔關cheap唔cheap事嘅~」
佢:「我嚟到你話唔收,我可以點呀而家?」
一係你扯,門口嗰邊~一係就拎銀包出嚟俾錢。仲有咩揀呀?

我:「我哋可以開返收據俾你~你睇完就俾現金」
佢:「喂,你望吓我」
嗯,望咗,唔係太美麗。
佢:「我都唔細啦可?」
已經唔係唔細咁簡單啦。
佢:「我真係未聽過未見過亦唔知道會有一間診所係唔收我張卡囉!我張卡大公司嚟喎」
我:「小姐,我哋的確係唔收你張醫療卡,如果你真係想用嘅,你去搵返啲收你張卡嘅診所睇啦~又唔係得我哋一間診所」
佢驚訝我趕客而不作出任何挽留:「你講呢句就得啦,免費我都唔會嚟呀」
收皮啦,我哋醫生都唔會免費睇你啦,幾十歲人都唔化~

The user will never see this