診所職場事 【寶豬趣聞】要當媽了（上）｜避孕｜珍寶豬｜經一專欄

撰文：珍寶豬（funnyclinic）｜圖片：電視截圖、unsplash

小姐好耐都冇姨媽到⋯

醫生令你的姨媽消失了嗎？定係醫生係你姨媽呀？但係醫生男人嚟…咁即係…
我：「通知醫生？定係你想睇醫生呀？你對上一次經期係幾時呀？」
佢：「其實我都唔係好記得自己對上一次經期係幾時，淨係記得對上嗰次有已經係熱天嘅事」
我：「咁一係同你驗孕先呀？」

佢：「我哋有食藥唔會有bb㗎」
我：「安全起見都係驗咗先啦，如果你要睇醫生搵係咩事冇經期到，第一樣驗嘅都係驗孕先，你去洗手間留少少小便先呀，留喺個樽度就可以㗎啦。同埋你俾埋你身份證我先呀～」

有食避孕藥就唔會有BB？

佢拎出身分證，好唔情願下行去洗手間邊行邊講：「驗嚟都冇用啦，明知冇嘅」
轉頭佢拎返個樽返嚟，驗完之後…
有喎。

我行返出去同佢講：「你等等呀，坐坐先呀，轉頭入房見醫生呀」
佢：「冇呢，都話咗冇bb㗎啦，我哋有食藥有咩可能有呀，有嘅我咩都得！」
真係咩都得？俾晒副身家我好唔好？

避孕藥都唔係100%

我唔出聲，由得佢自言自語，始終呢啲嘢由醫生講會恰當得多。
當小姐入到房時，我入去跟症。

醫生同佢講：「係有咗嘅」
『呀！！！有咩可能呀？我哋有食藥㗎！』，小姐一時之間接受唔到大嗌了。
醫生問：「你食咗幾耐藥呀？避孕藥都唔係100%」