診所職場事 【寶豬趣聞】好學唔學（上回）｜珍寶豬｜經一專欄

撰文：珍寶豬（funnyclinic）｜圖片：電視截圖、unsplash

診所內嘅兩個家庭

其中一位小朋友A，佢都一樣手拎住部電話喺度玩。小朋友B見到自己手上咩都冇，開始坐立不安咁款，佢拉拉媽媽衫袖：「媽媽，我都想玩呀」
B媽媽對眼冇離開過部電話：「你問爸爸拎呀，媽媽睇緊嘢呀」

小朋友B走去爸爸隔離又問：「爸爸，我可唔可以玩電話呀？」
B爸爸一樣冇望過小朋友：「唔得呀，我打緊機呀」
小朋友B好失落咁坐咗喺爸爸隔離，兩手空空唯有玩手指踢踢腳。

唔借電話俾人玩嘅小朋友

過咗陣，小朋友B忍唔住行去小朋友A度望吓佢玩緊咩。
望咗陣，小朋友B開口問A：「可唔可以俾我玩陣呀？」
A是拒絕的，仲走去匿喺個三角位自己玩。
B行返去同媽媽講：「媽媽，佢唔俾我玩唔俾我睇呀」

媽媽對眼繼續冇離開過部電話：「人哋唔同你分享自私精都冇計㗎，咪由得人哋玩多啲變白痴仔囉」
哇，你係咪自摑緊呀？你係咪白痴仔自私精呀？

竟然罵小朋友係⋯⋯

B行過去A度指住佢：「白痴仔」
A媽媽聽到之後抬頭望望邊個係白痴仔，當佢發現原來係自己小朋友俾人話，佢即刻企起身喝住小朋友B：「你話邊個呀？」
B天真無邪用手指住A…

A媽媽：「邊個教你咁講嘢㗎？你知唔知咩叫禮貌呀？」
B再次天真無邪指住佢自己阿媽…
A媽媽行過去B媽媽前面：「阿太，你個仔話我個仔係白痴仔喎，你平時咁教細路㗎？」
B媽媽專注睇電話冇反應。
下回續。