【凍鍵茶專欄】美國減息推恒指上28000點
廣告
恒指從年頭嘅18,671點（1月13日）一路飆升到近日高位27,058點（9月18日），足足有四成幾升幅，簡直係牛市嘅代表！依家大家都等緊，年尾能唔能夠突破28,000點，甚至升到30,000點。港股有別於美股，美股長升長有；而港股過去十年，大概經歷咗三次大牛市，各有其前因。
2015年：滬港通開通，市場憧憬A股將會納入MSCI指數，帶動資金流入，令市場信心大增，恒指曾經攀上28,588點。
2018年：美國量化寬鬆環境下，不斷印銀紙，締造零息時代，投資者追逐股票同埋房地產，當時美匯指數只有89，恒指一度谷上33,484點。
2021年：疫情後期復甦，美國重啟量化寬鬆（QE），刺激經濟，港股受惠於全球資金流動，恒指攀上31,183點。
不過，每次牛市嘅原因都唔一樣，以前嘅大環境可以話無咩指標性。然而，數據就唔呃人。過去幾次大牛市，一個月銀行同業拆息都唔超過1％，但依家雖然美國開始減息，美國利率仍然高達4％以上，香港一個月同業拆息亦超過3％，而今年九月本港銀行體系結餘只有540億港元，與以往牛市時幾千億相比，仲有好大距離。
港股現時的嘅市盈率約為13倍仍然偏低，不過仍然較以往平均市盈率12倍高些少，但仍未算貴。而美匯指數相對過往89-90左右，現時96屬偏高水平。如果美國今年內持續減息，美滙指數再下跌嘅話，今年內恒指就有望升上28,000 點。
都係嗰句，牛市莫估頂。
