黃仁勳欽點! 台積電之後，下一隻亞洲股王誰屬? ︳凍鏈茶專欄

黃仁勳同台積電(TSMC)掌舵人張忠謀（Morris Chang），舊年一月就喺台灣一間街坊小館撐枱腳，仲一齊「掃街」。之後台積電股價就坐火箭，由$100 美金一支箭衝上而家$300美金！你話Jensen 除咗搞掂自己盤生意外，連啲「關連股」都俾佢點石成金。

Jensen 都好識做，當被記者問到美國政府可能入股台積電嘅傳聞，佢笑笑口咁講：「台積電係人類史上最偉大嘅公司之一，邊個諗住買佢股票，都係醒目投資者嚟㗎！」

黃仁勳又一次示範咩叫「識做關公」！佢老哥十月底踩去韓國，其中一個行程，就係同三星電子太子爺李在鎔、現代汽車大班鄭義宣，喺首爾隊炸雞。餐飯埋單咪最多一千幾百，好符合佢平民作風。

之但係，佢蒲一蒲頭，帶嚟嘅經濟效益邊止咁少？直頭係「雞犬皆升」呀！佢食雞唔單止帶挈韓國股市多隻雞肉相關股標升，仲要帶埋生意去同韓國總統李在明會面，拍心口話英偉達會全力加碼投資韓國，包括泵水供應26萬塊圖形處理器(GPU)俾韓國政府同企業，幫佢哋起「AI工廠」。更重鎚係，英偉達宣佈同SK 海力士集團 (000660.KS / 07709.HK)拍住上，喺韓國起最大AI工廠，預計2027年尾搞掂，落重本裝超過5萬粒GPU，實食冇黐牙咁鞏固SK海力士喺全球AI供應鏈嘅話事權。

睇嚟黃仁勳食餐飯，又幫大家「貼中」下一隻亞洲股王啦！經呢趟南韓之旅加持，SK海力士(000660.KS)股價自八月以嚟已實現超過一倍嘅驚人漲幅。