【高盛大摩警告隨時推爆油價見 100 蚊】特朗普：「由得油價升」

白宮幕後「救火」：急謀釋放戰略儲備

雖然大老闆口講唔驚，但白宮幕僚實際上已經急如熱鍋上嘅螞蟻。據報白宮幕僚長 Susie Wiles 及能源部長 Chris Wright 正緊急同石油巨頭高層開會「撲火」。 內政部長柏根（Doug Burgum）更透露，華府正全方位考慮救市方案，包括：釋放緊急戰略石油儲備（SPR）、豁免混合燃油要求，甚至破天荒允許美國財政部直接落場交易石油期貨！加上早前宣佈嘅「國家資本包底買保險」，可見美國正動用一切金融及行政手段，試圖㩒住隨時失控嘅通脹預期。

華爾街大行潑冷水：美軍護航難救大局，最悲觀睇 $100！

特朗普想靠美國海軍護航嚟穩住市場？華爾街大鱷即刻出嚟潑冷水！高盛全球商品研究聯席主管 Samantha Dart 一針見血指出，每日經過霍爾木茲海峽嘅油輪數量極度龐大，市場對美軍能否提供全面保護「信心不足」。數據拆局： 避險資金瘋狂湧入期油市場。紐約 4 月期油單日爆升 8.5%，突破 81 美元創逾年半新高；倫敦布蘭特期油亦升近 5% 報 85.41 美元。 大行預測： 高盛警告，如果霍爾木茲海峽封鎖持續五個星期，布蘭特期油隨時會突破每桶 100 美元大關！摩根大通亦發表報告「補多刀」，指若封鎖持續，衝突爆發第 8 日每日產量將減少 330 萬桶；目前伊拉克因缺乏出口通道，已經被迫每日減產近 150 萬桶。供應鏈斷裂嘅殘酷現實，正一步步推高油價嘅天花板！