Lalamove 老細億萬炒樓背後有盤算? ︳凍鏈茶專欄
廣告
樓市叫做回暖返少少，華懋尖沙咀新盤「瑜意」上月全個盤160伙即日清袋，最誇張係Lalamove創辦人之一鍾永良，一擲超過7,353萬連掃12伙。鍾永良近年密密掃入多伙新盤單位，包括2024年9月以約4,290萬元大手購入英皇地產發展嘅跑馬地One Jardine’s Lookout 7個單位；其後分別於2025年11月、今年3月於二手市場增持該盤兩個單位，合共斥資約6,505萬元。唔夠兩年，總投資近1.39億—— 沙士嗰陣佢已經炒過一轉，唔通真係咁睇好後市？
Big 4會計出身
鍾永良喺倫敦讀書、Big 4會計出身，數口一定精到冇朋友。當佢自己荷包腫脹，但Lalamove條數就愈來愈走樣。多次衝IPO嘅Lalamove 2025收入21.39億美元，但毛利率三年跌足10%，抽佣率同變現率不斷跌，估值由130億美元縮水至95億美元。
早幾年搞初創外賣App Plum
鍾永良早幾年搞初創外賣App Plum，投資者先發現中伏：公司用天價租佢自己名下嘅甲廈，分別使用上環嘅中銀集團人壽保險大廈同埋中環南豐大廈，兩間商務中心Compass Office都係鍾永良本人嘅私幫生意。佢哋運輸又用返自己投資嘅Lalamove車隊，成本疊到天咁高，盈利影都無，左手交右手，錢就左袋搬右袋! 最後多輪集資一共籌到470萬美元（約3,900萬港元），三個月後，Plum宣稱資金只餘600萬港元，要即時裁員止血。盤數靚唔靚唔重要，最重要係自己條數靚。呢招叫「自己生意養自己資產」，你話佢錯？又冇犯法，只係投資者喊都無謂。公司還公司，個人還個人，對會計佬來講，從來都係兩個標準。
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
