大陸睇牙醫費用｜深圳洗牙 補牙 杜牙根 植牙價錢一覽
點解愈嚟愈多香港人北上睇牙？
除咗價錢吸引，深圳牙科市場近年發展迅速，除早年已打入香港市場嘅連鎖品牌外，亦有愈來愈多本地連鎖口腔診所開始主打「港人專屬」服務，例如安排廣東話醫護人員、提供口岸接送，甚至設有香港客服電話。加上福田、羅湖口岸出關後步行數分鐘即達多間診所，交通往返方便，令北上睇牙由「小眾」逐漸變成主流選擇。
大陸睇牙醫費用一覽：香港 vs 深圳價錢比較
由於香港同內地嘅牙科收費均由個別診所自行釐定，並無官方統一價目表，以下比較數字為市場調查參考價（各項目「起」價，實際收費視乎診所、醫生資歷及選用物料而定）：
| 治療項目 | 深圳牙醫收費（起） | 香港牙醫收費（起） |
| 洗牙 | ¥200 | HK$600 |
| 補牙 | ¥180 | HK$600 |
| 拔牙 | ¥200 | HK$600 |
| 脫智慧齒（簡單／非手術） | ¥500 | HK$2,000 |
| 脫智慧齒（複雜／手術） | ¥1,500 | HK$4,000 |
| 杜牙根 | ¥500 | HK$3,500 |
| 植牙（每隻） | ¥5,000 | HK$15,000 |
| 傳統箍牙 | ¥15,000 | HK$35,000 |
| 藍光美白 | ¥980 | HK$4,800 |
資料來源：市場調查整合（MoneySmart、格倫菲爾口腔資料）。以上數字僅供參考，實際收費請以個別診所報價為準。
深圳牙科診所官方收費實例
以連鎖牙科品牌深圳鵬程口腔醫院官方公布嘅價目表（2026 年 4 月起適用）為例，可以睇到更具體嘅項目收費：
| 類別 | 項目 | 官方收費 |
| 洗牙 | 超聲波拋光洗牙 | ¥49.9–78 |
| 洗牙 | 超聲波噴砂洗牙 | ¥88–128 |
| 補牙 | 美國 3M 納米材料 | ¥140–580 |
| 補牙 | 美學樹脂補牙 | ¥580–999 |
| 拔牙（顆） | 恆牙殘牙 | ¥200–400 |
| 拔牙（顆） | 阻生智慧齒（簡單） | ¥1,000–1,500 |
| 杜牙根（顆） | 前牙 / 大牙 | ¥1,280–1,980（全包） |
| 牙周病治療 | 1 期至 4 期 | ¥1,880–8,880 |
| 植牙（烤瓷冠） | 韓國／德國／法國特價植體 | ¥1,880–3,980 |
| 植牙（烤瓷冠） | 瑞典／瑞士植體 | ¥4,980–6,980 |
資料來源：深圳鵬程口腔醫院官方收費標準。留意上述部分為診所限時優惠價，非固定劃一收費，實際以診所公佈最新價目為準；預約前建議先向診所確認最新報價及是否適用優惠。
北上睇牙要留意咩？
睇牙前要留意保險保障
一般醫療或旅遊保險未必涵蓋牙科治療，部分保險公司近年推出專門承保跨境（包括大灣區）牙科診療嘅保險產品，保障範圍多分為保健治療、基礎治療、複雜治療及意外治療等類別，並設有年度保障上限及自付比例。如打算長期北上睇牙，出發前建議先向保險公司查詢相關產品嘅保障範圍、自付比例及索償安排，避免治療後先發現唔受保。
常見問題
大陸睇牙醫係咪真係平好多？
根據市場調查資料，深圳牙科收費普遍比香港平六至八成，尤其係植牙、箍牙等高成本項目差距更明顯。不過實際差價視乎診所、醫生資歷及選用物料而定，建議貨比三家。
點揀信譽好嘅深圳牙科診所？
建議選擇有連鎖品牌背書、資質齊全（持有《醫療機構執業許可證》）、明碼實價嘅診所，並可參考其他求診者評價，避免被「低價」廣告吸引而選擇無牌黑店。
大陸睇牙需要幾耐時間？
簡單洗牙、補牙一般 10 至 60 分鐘內可完成；植牙、箍牙等複雜療程則需要分階段覆診，療程可長達數月至一年不等，出發前應向診所了解完整療程時間表。
香港嘅醫療保險受唔受保大陸牙科治療？
一般醫療保險未必涵蓋牙科，即使有牙科保障嘅計劃，亦未必包括內地診所嘅治療。出發北上睇牙前，建議先向現有保單嘅保險公司查詢清楚保障範圍，或考慮專門承保跨境牙科治療嘅保險產品。
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
