診所

診所職場事 寶豬趣聞 底底有味

職場

廣告

電話響起~

我:「你好,乜乜診所」
佢:「姑娘,我有啲尷尬嘢想問,你唔好叫我去診所呀,我唔去㗎」
OH!YEAH!唔嚟診所睇醫生即係運桔啦,CLOSE FILE!

我:「我喺電話度只可以話你知應診時間,其他問題我唔答㗎啦~」
佢:「吓?你個電話用途係咁㗎咋?」
仲有我成日用嘅叫外賣功能囉。
我:「係呀~有啲咩事都係要過嚟問醫生睇醫生嘅」
佢:「咁你唔可以同我傾吓計㗎?」

三九唔識七,我哋有咩好傾,傾吓今日天氣乾唔乾燥呀?
我:「我返緊工㗎~唔方便傾閒計嘅」
佢:「唔好啦,我真係有啲嘢想問你㗎!」
我:「問我冇用㗎~嚟問醫生啦,我俾唔到咩意見你㗎」

佢:「唔好啦,我想問呀,我想問底褲點先會冇尿味咋」

我知。唔好著喺原先嘅位置就可以了,例如你可以試吓笠喺頭度,如果你咁著都有尿味…真係神仙都救你唔到啦。
我:「….呢啲勤清洗啦」
佢:「我有沖涼㗎!」
我:「咁去完洗手間之後清潔得乾淨啲啦…」
佢:「我有呀!我有抹㗎!係佢自己失驚無神就滴少少出嚟,有時有,有時冇,都唔知幾時先有,幾時先冇,我成日喺人面前除褲好尷尬㗎嘛!」

唔好喺陌生人面前隨時除褲啊!就算係俾人被迫除,都記得要大嗌唔好呀!
我:「泌尿問題喎?一係你就嚟睇醫生啦~我都答唔到你可以點做。」

佢:「你唔好成日嗌我睇醫生啦好冇呀?你咁樣我哋點傾落去呀?」
我:「嚟睇醫生啦。」

嘟。被CUT線了。
早知我一開始就狂LOOP『嚟睇醫生啦』。

【診所職場事】寶豬趣聞其他四篇精彩文章。

診所職場事 寶豬趣聞 媽媽癲咗 上+下集

有日一位太太嚟到。
佢都未入晒個門口就大聲叫:「我個仔喺出面呀!」
我以為有啲咩事,就即刻彈起身:「做咩呀?暈咗呀?」
佢:「行緊嚟呀」

哦。即係好似古時皇帝咁,總會有人大嗌『皇~上~駕~到~』。
我安靜地坐返低。
佢行埋嚟:「我個仔就嚟到㗎啦」
我:「有冇帶身分證明文件?」
佢:「細路嚟咋喎」
我:「冇帶唔緊要,學生手冊都OK,如果都冇就你寫返佢啲資料俾我啦~」

佢拎出手冊:「我要寫封信喎」
我邊登記邊問:「寫咩信啊?轉介?」
佢:「你可唔可以望住我講嘢呀?」
我停止登記,用雙眼感動佢:「係~寫咩信呀?轉介呀?轉介去邊呀?」
佢:「你咁樣知唔知好冇禮貌?我係客人嚟㗎,你喺度做㗎。」

嗯,所以我停晒所有工作,喺度陪你傾計啦。
我:「請問小姐你要寫咩信呀?」
佢:「學校話我個仔發燒,話而家係咩流感高峰期,叫我帶佢睇醫生。」
我:「哦?係呀?咁我繼續登記㗎啦」

佢:「只不過我覺得冇需要囉,你寫封信證明佢冇事,學佢就一定要照返㗎啦」
我:「明白~一陣睇咗醫生先。如果佢真係冇事冇燒嘅,可以寫嘅。」

佢:「佢係有燒㗎喎。」

…..咁你即係要我哋造假呀?
我:「有燒嘅話,我哋寫唔到㗎,話時話,你頭先話個小朋友行緊嚟,咁耐嘅?佢唔舒服有冇大人陪佢行嚟㗎?」
佢:「唔駛理佢,你寫咗封信俾我先,我轉頭就要同佢返去學校㗎啦,我有俾書簿費㗎,邊可以郁啲就話接返佢走㗎」

上回講到太太想個仔即刻可以返得學,要我哋寫封證明佢冇事。

我:「要睇完醫生證明佢真係冇事先可以寫嘅~如果有唔舒服有燒,最好留喺屋企休息啦,返學好易傳染俾其他人㗎」
佢:「佢傳俾人咪好囉」
我:「…..」

佢行出門口大嗌:「行到嚟未呀?扮咩死呀又?」
佢對住我又大嗌:「登記好未呀?」
佢再行返埋嚟:「寫封信幾錢呀?」

我:「我哋診金連藥就係三百蚊,如果寫一封信,我哋係唔需要額外加錢嘅,不過當然要醫生認為係有需要寫先會寫。」
佢:「三百?」
我:「嗯,係呀」
佢:「駛唔駛咁貴呀?我唔要藥,唔要醫生睇我個仔都得㗎喎!」

唔睇醫生嘅,你不如叫隔離生果舖睇你個仔呀?
我:「嚟得診所嘅,就個個都係睇醫生嘅…咁診金係一定有。」
佢抬頭向天搖幾搖,再望住我講:「真係人都癲」
你一早癲咗啦,你唔係唔知呀嘛?好明顯吓喎。
佢:「咁嗰三百你袋幾多呀?你分到幾多呀?」
我:「吓?」

佢:「你嗰份我唔俾㗎啦,因為你乞我憎。」
我:「我哋唔係咁計嘅…你睇咗醫生先啦,都要小朋友冇燒冇病先可以寫到信證明佢返得學嘅。如果係會傳染人嘅,就留喺屋企抖下啦!」

佢:「我都廢事同你講啦,個個傳染人都要留喺屋企嘅話,啲愛滋佬唔會周街走啦,你哋唔寫就算啦,我唔求人㗎,我都有尊嚴㗎!」
愛滋呢,就唔會透過空氣同飛沫傳染嘅…而且唔該你唔好下下乜佬物佬咁難聽。
佢行出門口大嗌:「你死得未呀?未死得就行過對面嗰間啦!呢間食屎㗎!」

最應該食屎嗰個係你啊。

【診所職場事】【寶豬趣聞】發燒

診所職場事 寶豬趣聞 姨姨的腳趾

(電視截圖)

咁我發燒你哋醫唔醫我呀

有日,一位小姐氣來氣喘嚟到診所。

佢問我:「姑娘?」

我:「係~請問有咩事呢?」

佢:「我好似潮熱呀」

小姐,我睇你個樣都最多係三十尾咋喎~咁快更年期?

我:「一係我同你登記先啊,一陣有咩可以同醫生講啊」

小姐同我好似處於不同空間,佢繼續自己講:「我覺得自己忽冷忽熱咗大半日㗎啦…係咪潮熱呀?係咪提早收經呀?」

我:「唔駛咁緊張住~睇咗醫生先啦,我而家同你登記,同你探埋熱先呀」

身分證顯示二十頭,哇,好彩頭先我冇衰多口講句『你三十幾四十邊有咁快更年期呀』,如果唔係真係火星見啦…

探熱後,38.4度。輕微發燒啊~

我:「小姐,你有啲燒啊~」
佢:「吓?但係我冇病冇感冒咳喎」
我:「有時可能係感染咗一啲病毒或者細菌,身體知道要抗敵,所以提高體溫嘅~又或者你頭先跑過嚟?體溫都可能會高啲啊」
佢:「咁即係我唔係更年期呀?我會唔會燒壞腦呀?」
我:「係咪更年期都需要檢查咗先知嘅,至於燒壞腦就…唔駛太擔心啊」
38.4度就想燒壞腦?
佢:「我而家M到緊,檢唔檢查得?」
小姐,你有月經又點更年期呀?你覺得你流嗰啲係咩呀?

我:「你如果想做婦科檢查嘅,就等月經完咗,乾淨晒之後先過嚟做~而家唔做得㗎」
佢:「咁我發燒你哋醫唔醫我呀?」

醫…冇其他病徵嘅,醫生咪開份退燒藥俾你~之後就收你二三百咁啫。照顧到你心靈上身體上嘅需要,都係醫生榮幸嚟。

發燒其實好普遍,因為呢個係身體自我保護機制。

【診所職場事】【寶豬趣聞】我啲屎起角喎

電話響起~

我:「你好~乜乜診所」

佢:「喂?」

我:「係~乜乜診所」

佢:「可唔可以問嘢呀?」

唔可以呀,BYE~

我:「請問先生想問啲咩呀?」

佢:「我啲屎起角喎」

起角喎?我有興趣知係咩角~45度角定90度角?定係犀牛角呀?
我:「…不如嚟睇醫生呀?」
佢:「起角都要睇?」
其實係我想知點起角法~
我:「擔心嘅可以嚟睇吓嘅」
佢:「但係我冇痛冇見紅呀

我終於按捺不住了:「咁點解你知佢起角呀?」

佢:「我見到囉!」

我:「點起角法呀?」

佢:「起角咪起角囉,你係咪玩嘢呀?」

診所職場事 寶豬趣聞 姨姨的腳趾

(電視截圖)

我真心想知嘅:「隻角有幾大呀?」
佢:「姑娘呀?」
我:「嗯?做咩?」
佢:「你係咪有病呀?」
我:「吓?」
佢:「你係咁問,你唔覺核突㗎咩?」
我:「唔覺呀~又係你問先嘅,你一係嚟睇醫生啦」
佢:「我都係想問下咁嘅樣有冇咩問題啫」
我:「醫學上嘅問題你都係問醫生啦,嚟睇醫生啦~」
佢:「姑娘呀?」
我:「係~」
佢:「你連呢啲都答我唔到就唔好聽我電話啦,你聽完我講又一味叫我睇醫生,我打嚟唔係想聽呢啲㗎!

我:「我哋診症時間係上午十點至下午十二點九,之後就係三點半至七點九」
佢:「你冇嘢呀?」

我就梗係冇嘢啦,而家係你啲屎起角,又唔係我起角~
我:「有需要嘅請喺診症時間內登記,仲有咩幫到先生?」
嘟。

延伸閱讀:

【寶豬趣聞】我返 Part Time 遇到呢位大姑

診所職場事 寶豬趣聞 底底有味