醫生

診所職場事【寶豬趣聞】透氣|珍寶豬|醫生

職場

廣告

【診所職場事】有日一位女士睇完醫生…

拎藥時,佢問我:「姑娘,頭先我有啲嘢唔係咁好意思問醫生,我可唔可以問你呀?」
咁得意嘅,有專業嘅醫生都唔問,反而要問個阿姨?

撰文:珍寶豬

我:「問啲咩啊?我可以入去幫你問返醫生呀」
佢耍手擰頭:「千其唔好問醫生!我唔想影響觀感,女人嘢女人嘢!」
觀感?首先我要訪問醫生對你有咩觀感啊…
我:「哦?問啲咩啊?」
佢:「我呢…下面咪成日發炎嘅,係咪我有問題呀?」

…呢啲好明顯要問醫生喎?
你問個掃地嘅鬼知你有冇問題咩~最多咪叫你『打掃得乾淨啲』。

我:「呢啲問醫生好喎?我幫你問啦?一係你再入去見見醫生呀?」

佢好大反應:「唔駛唔駛唔好呀,你答我得啦」
我:「我唔係醫生,好難答到你呢啲…」
佢:「咁我應該問邊個呀?」
我:「醫生囉」
佢:「除咗醫生呢?」
我:「一係你搵個女醫生呀?咁冇咁尷尬啊你」

佢:「會唔會係我成日著緊身牛仔褲太焗呀?」
我:「都有影響嘅,你換啲透氣啲啦」
佢:「透氣即係鬆身嗰啲?」
我:「裙又得,褲唔好太緊太貼,啲料透氣就好」
佢:「但係我慣咗…」
我冇出聲。
佢問:「照著唔拉褲鏈得唔得呀?都有位出風呀?」
請問你下身有咩位識出風呀?唔拉褲鏈唔係仲奇怪嗎?你點解可以諗到咁叻叻…