因網上言論被政府炒魷 遂零資本借10萬創業、4年開16分店 阿布泰CEO:成就可超出想像

疫情之下,有說零售正面臨寒冬,生意難做。逆市中,阿布泰國生活百貨的第16間分店仍於4月中在沙田禾輋廣場開張。當初,老闆林景楠被政府辭退,從銀行借來10萬元資金,和太太在一間位於九龍城的60呎小店打拼,到今天阿布泰國生活百貨擁16分店,營業額過百、甚至過千萬。他說:「阿布泰嘅出現係咪一個意外,我就唔夠膽講,但我覺得阿布泰係香港人嘅精神,呢個正正代表住我同香港人其中一個奮鬥嘅過程。由零開始,亦都可以建立到大家未必能夠想像到嘅成就出嚟。」

撰文:經一編輯部|圖片:新傳媒編輯室

疫情未有影響生意 考慮加緊腳步多開分店

訪問這天,新店熙熙攘攘,熱鬧不已。林景楠說,疫情對他們的生意影響不大,因為店內售賣的主要是日用品、食品和必需品,而網上銷售亦由佔總銷售額3%,上升至10%;他們甚至延長營業時間,其中兩、三間店提早一小時開店:「因為有班客為咗避開人潮,早咗出街。」

上文:成本價賣500萬片口罩、泰國買地種田防搶米潮 阿布泰創辦人:為香港好,因為我哋係香港品牌

他說,開分店的決定早在他們計劃之中,擴充大計似乎未有受疫情所礙:「可能嚟緊會開得密啲,因為見到市場上可以選擇嘅位置會多咗,所以亦我哋會考慮開多少少。」

他說,阿布泰國生活百貨主要針對本地客戶,因此過去一年來的挑戰對他們影響不大:「香港嘅零售業喺過去10、20年都係針對住遊客,又或者內地客。面對種種唔同嘅因素,社會運動又好、疫情都好,其實係個警號,畀百家百戶去諗諗,其實係咪過重偏向咗一個方向呢?」

因網上言論被政府炒魷 遂零資本借10萬創業、4年開16分店 阿布泰CEO:嚟緊再開密啲!
逆市中,阿布泰國生活百貨的第16間分店仍於4月中在沙田禾輋廣場開張。

被辭退、零資本 借10萬東山再起

阿布泰現時有16間分店,遍佈港九新界。產品種類由最初以美妝產品,逐漸增加至零食、生活百貨。他坦言當初開業沒有特別計劃過,只是朝著目標進發——在香港零售業創造泰國產品的銷售潮流。他說:「香港零售競爭非常之大,阿布泰點解可以喺咁嘅競爭入面突圍而出,而唔係跟住其他人尾巴去走,去創造一個新嘅潮流,與眾不同就係其中一個成功原因。」

他們白手興家的故事,一切回到2016年說起。他說:

「每個成功男人背後都有個女人,我個女人已經出現咗就係我太太。」

2016年,林景楠和泰籍太太結婚,誕下女兒。太太來港生活,便在九龍城租下60呎小店舖位開店,由她打理;當時的貨物種類單一,憑幾款草藥球、美妝產品便開業,「當時係諗住左右鄰里有啲泰國人可以照顧下太太。」同年,他因網上言論被政府解僱,離開海關關員崗位。他自覺做過政府工難重投職場,加上當時被解僱原因,更覺難找工作,便乾脆和太太一心做好小店。

一腳踢貼食物標籤、送貨、傾代理

林景楠和太太一起創業,從無到有,一路走來靠他們親力親為;由到泰國採購入貨、駕貨車送貨,到為產品加上食物標籤均由他們一手一腳完成。分身不暇,連女兒也近乎在那60呎的舖位長大。創業以來,他們都是邊做邊學。他從銀行借來10萬元,3萬元用在租金和鋪位開支,餘下的7萬便用作買貨。

他倆親自到泰國找當地品牌洽談代理權。他還記得,當時有朋友托他在泰國買一款蛇毒美顏面膜,後來成第一個獨家代理的品牌:「我唔會用啲sleeping mask,我都唔知咩叫蛇毒,真係蛇嗰啲毒嚟㗎?問完先知原來係技術名嚟嘅,就咁樣去慢慢了解產品。」

早期,他們主要售賣美容和保健產品,靠著太太的親和力和區內泰籍熟客的支持,一日的營業額平均都有一兩萬。

很快,一年後,他們再向銀行借貸,便在大埔超級城開第一間分店,是短期的展銷位:「好處係避免咗裝修,直接買個貨架上貨已經可以經營。相比直接開舖嘅話,每間舖頭至少慳到大約30至50萬嘅開業成本。」之後太太和女兒留在九龍城,林景楠則在大埔顧店。

因網上言論被政府炒魷 遂零資本借10萬創業、4年開16分店 阿布泰CEO:嚟緊再開密啲!
現在的阿布泰國生活百貨售賣的不止是美容產品,更有各款泰式小食。

入舖後生意不升反跌 立即重新採購貨物

如是者,他們開始聘請員工再開第3間分店,到大約7、8間分店,他們便租長期舖位入舖,「裝修都要40、50萬,我自己當初都嘩一聲,咁鬼貴。」先要面對高昂的裝修成本,後來還出現生意不升反跌的難題。

短期展銷位比起長期舖位更易接觸客人,原來入舖後要吸引客人是另一門學問:「產品種類唔夠多,困喺細舖嘅時候,啲客未必會入到嚟。」於是,他和太太隨即到泰國重新做採購,添置日用品、快速消耗品,以吸引顧客再三光顧。迅速變陣,在於他們不願坐以待斃;他說,假若一直堅持只賣美容產品,或會失敗收場:「面對住市場上嘅狀況,我會坐以待斃定係即時改革,採購新類別產品、轉換新嘅營商模式?」

當此路不通,便隨即改變計劃;擁抱變化,是他們營商最重要的心態,他說,若抱持的心態差,便會覺得是朝令夕改:

「因為生活上所有嘅時時刻刻,秒秒鐘變化萬千,我哋做生意嘅就係要敢去嘗試,作出變化先可以追得到市場上嘅節奏。」

因網上言論被政府炒魷 遂零資本借10萬創業、4年開16分店 阿布泰CEO:嚟緊再開密啲!
林景楠當初被政府炒魷,與太太努力打拼,東山再起。今天,林景楠是阿布泰國生活百貨的老闆。擁抱變化是他的經營之道。

經營成本高昂 將存倉成本轉在泰國

他說,經營至今,面對最大的困難依然是資金流和高昂的經營成本:「香港零售最大嘅困難都係成本,因為大家都避免唔到租金嘅問題。」除分店避免再選租「清水舖」,避開重新裝修的龐大開支,他亦參考同業的營運手法,盡量減低成本:

「我聽得多成功人士嘅分享,再套用返去經營模式入面,取長補我嘅短,所以我公司嘅經營模式一直都係取百家之大成。」

倉存租金為例,他得知已故的759阿信屋創辦人林偉駿,採取先計算和分配貨物,在貨櫃抵港後便直接分發至各分店,避免中間倉存的成本。他無法如林先生一樣,每次都將抵港貨物直接送遞予全港分店,便稍微修改策略,先以較低價錢在泰國建立貨倉,之後才直接運到香港,將倉存成本轉在泰國。

因網上言論被政府炒魷 遂零資本借10萬創業、4年開16分店 阿布泰CEO:嚟緊再開密啲!
加入政府前,林景楠曾任超市經理。他說:「而家禾輋分店成間細嘅超市仔,係複製返過往嘅經驗,用最有限嘅空間去擺到最多嘅貨。」

有血有肉的公司 與顧客、員工齊上齊落

即使由小店擴展至現時規模,他們一直保持公司運作人性化和決策上的彈性,希望讓人覺得阿布泰是「有血有肉的公司」,自言較其他大集團多份人情味:「阿布泰其實由我同太太兩個人,一手一腳去經營上嚟。基本上由第一個客開始,慢慢累積落嚟。」

就如,客戶想買任何的泰國產品,可向他們查詢,採購團隊亦會採納意見,「因為係小店起家,營運模式、服務、銷售都比較彈性啲,一啲大型連鎖店可能未必做到嘅嘢,我哋都會去處理。」

與員工之間的相處亦如是,他視下屬為工作夥伴,最初聘來的員工,現在仍為阿布泰的業務打拼。他說:

「因為公司成功營運,都需要佢哋一齊共同進退落去,齊上齊落係一個最重要嘅因素。」

每日落舖、試行直播 繼續親力親為

現在,他倆夫妻依然事事參與,亦不時親自落舖觀察。「我每日都會落舖去行,睇吓門市發生緊啲咩問題。」

例如,早前阿布泰引入泰國新鮮生果,縱然帳目上的銷情看似不錯,也靠落舖才發現問題:「啲師奶喺度講,『嘩咁鬼貴!又唔靚又盛』。咁可能只係一兩日,點知我幾日內去唔同嘅舖頭睇,原來好多師奶都係咁講,我就會去睇返究竟發生咩問題。」他親自比較過超市、果欄後,發現競爭力確不如人,便選擇暫停售賣,等待有合適的舖位和人才處理新鮮食品銷售才重啟計劃。

因網上言論被政府炒魷 遂零資本借10萬創業、4年開16分店 阿布泰CEO:嚟緊再開密啲!
現在,他仍事事參與,不時親自落舖觀察:「我每日都會落舖去行,睇吓門市發生緊啲咩問題。」

最近,他開始試行直播銷售,訪問當日亦不忘和攝影師交流收音咪的配置,「見到個大趨勢,大家都走緊直播,我哋都開始做緊。因為直播效果就係人性化,我覺得人性化好緊要,從KOL或者主播口中講件事出嚟演繹,信任度會強啲、感覺係真實啲。」未來,他將與家人定居泰國,繼續和太太主力在當地做採購工作。

回望4年,你會怎樣形容阿布泰過去幾年的成長?「我覺得同香港⋯⋯」他頓了頓,再說:「政治啲嚟講啦,阿布泰嘅成長,同香港人思想上嘅覺醒其實都幾一致,大家可以意會一吓。」

上文:成本價賣500萬片口罩、泰國買地種田防搶米潮 阿布泰創辦人:為香港好,因為我哋係香港品牌

相關文章:「疫」市請被裁司機揸紅Van 前汶萊交通規劃師搞App發展「網約小巴」有客先埋站

相關文章:Casetify手機殼撼贏女人街平貨衝出國際 憑CEO追求極致夠挑剔:至少造50樣本研最佳手感、PPT字體執到正