我住將軍澳去大埔返工 鍾意大埔5大好處 | 網民熱話

我住將軍澳去大埔返工 鍾意大埔5大好處 | 網民熱話

【大埔・網民熱話】我住咗將軍澳好多年,雖然好多人彈將軍澳,但我就非常鍾意自己住果區。由將軍澳出發其實去好多地方都好方便,返工亦係,不過,我曾經有好幾年時間走咗去大埔工業村返工,做到間公司話要裁員我先至無做,而家返北角,近好多。

撰文:不覊 | 圖片:unsplash、新傳媒資料室

將軍澳出發返大埔 轉車轉到暈

諗返起果時返大埔,查實由將軍澳出發,真係都好鬼遠吓,坐車轉車轉到頭都大埋。我多數坐MTR去到鑽石山轉巴士,又或者去到九龍塘轉火車。

由於公司位於大埔工業村,搭巴士(74x或者75x)去到廣福村再轉26號小巴就到。

有時候晏咗起身,都要肉痛啲打的入去。如果遇到相熟同事就最好啦,可以幾個人分車錢,但如果單頭人,真係幾肉痛。

雖則話返大埔路途遠,但返咗幾年,其實自己對大埔幾有感情。你可以話我份人樂觀啦,好多時候都只係睇好的一面,其實,咁樣做唔係更好咩,至少自己會開心啲。

講返大埔,點解話自己鍾意呢?嗱,你可以唔認同,但我真係覺得有唔少好處。

將軍澳 大埔 北角 打工 街市 轉車 巴士 網民熱話
圖片:新傳媒資料室

1 大埔人好

唔知點解,總係覺得住大埔的街坊好親切友善。試過初初返工唔太識路,響街問路啲人至少會應我答我,有啲仲好詳細指點方向。

講起上來,真係都幾多謝佢哋。而且,我去親啲小店買嘢食嘢,佢地都好親切,唔會黑口黑面。

2 大埔街市食嘢正

雖則入咗工業村,但因為公司食飯時間比較彈性,我會同啲同事出返墟吃飯,打的都係幾份人分,唔算貴。

至於至愛,當然係大埔街市啦,熟食中心幾乎檔檔都好吸引,都唔洗我介紹啦,無論小菜、粉麵、茶記都好好味。好似蘇記奶茶,世記豬扒,欽記魚蛋。。。諗起都覺正。

3 行街市超鍾意

除咗去大埔街市食嘢,你咪睇我男人老狗,食完LUNCH我最鍾意行大埔街市,因為超多嘢睇超多嘢買,林林總總,時間唔覺唔覺就過,真係可以幫自己減吓壓。

街市有檔賣有機菜嘅,好多少見嘅菜蔬菜,有唔少鍾意煮嘢食捧場客,就算係一般人都會「唔賣都睇吓」。

將軍澳 大埔 北角 打工 街市 轉車 巴士 網民熱話
圖片:新傳媒資料室

4 周圍環境好

大埔勝在多小店,啱唔鍾意行倒模商場嘅人。我之前間唔中要返星期六,下晏放咗工,都會留喺大埔周圍行吓,行吓海濱公園都唔知幾過癮。

5 走入大尾篤 BBQ

唔係講笑,星期六放工,我真係會約埋啲同事入大尾篤燒嘢食同放紙鳶,環境一流舒服,真係幾開心。

大尾篤一帶除咗BBQ,仲有泰菜、盆菜,冬至時老闆仲訂食盆菜同大家開心吓。

查實做人為咩啫,如果成日都怨天尤人,唔開心咪又係辛苦自己,不如樂觀正面諗嘢,人就自然開心啲,我鍾意大埔、鍾意將軍澳,真的話。

將軍澳 大埔 北角 打工 街市 轉車 巴士 網民熱話
圖片:unsplash

相關文章