龍蝦出手，誰能留手？大企阿里、滙豐擁抱AI 削成本︳凍鏈茶專欄
廣告
全城都AI，連國家同政府都話要方位轉型，這場科技洪流已勢不可擋。早前騰訊推出「龍蝦」，惹來滿城風雨，人人自危。話說回來，一般ChatGPT或者DeepSeek 都只係幫幫手做執頭執尾，但新貴OpenClaw卻非等閒之輩——屬真正嘅AI智能體，似senior級員工，可以直接接管電腦，打開瀏覽器、下載文件、整理表格，自動化執行複雜任務，真正披甲上陣。
不少大企業早已磨刀霍霍，為削減成本做好準備。據聞阿里旗下幾間子公司，近日要求員工每人交一份報告，列舉自己平時邊啲工作用AI協助，從而做得更快更有效率。報告寫得出色，年尾Bonus自然水漲船高；相反，唔交報告Bonus就化為烏有。表面看來係恩威並施，實則人人心中有數：今年你俾我Bonus，不過係提早預繳「遣散費」。唔洗問AI都知道，呢批員工好快會被AI取而代之。
唔單止阿里係咁，HSBC亦不遑多讓。內部早已試行俾AI審核合規文件、篩選客戶名單，甚至幫手撰寫報告。以前要三五個分析師通宵達旦嘅工作，如今一隻AI「員工」幾下手勢完成，而且零出錯、唔抱怨、唔使額外福利，真係點會夠AI鬥？
講到底，呢場變革已成定局，打工仔只可以各安天命。有人自強不息，與AI共舞；有人掩耳盜鈴，眼不見為乾淨。不過歷史話俾我哋，每一次科技革命，淘汰嘅都是固步自封之輩。與其坐以待斃，不如主動出擊，至少，喺AI徹底取代你之前，你仲可以將嗰份AI報告寫到天花龍鳳，拎埋今年個Bonus先。
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
