【三代跳水天后】離開跳台後邊個最識「上岸」伏明霞贏一個身位︳凍鏈茶專欄

伏明霞嘅「上岸」，係一次性套現。正值花樣年華23歲之時，顏值同名氣都喺頂峰，四塊奧運金牌揸手，佢揀咗嫁大佢26年嘅梁錦松，將自己最值錢嘅光環，一次性兌換成家族嘅安定生活。今年48歲嘅佢生咗兩仔一女，同前財爺住喺半山愛都大廈近廿年，仲有一個單位係伏明霞用嚟收租當「家用」。上月伏明霞再斥資7,000萬買多個低層四房單位，聽啲八卦鄰居講，係俾鄉下來港嘅年邁父母住，方便照顧。低層雖然冇海景，但女婿「有景」咪得囉。

伏明霞老公身家據報超過15億港元，佢嘅KPI就係守住呢筆錢，等仔女長大。三個仔女都係讀國際學校，大女梁司渝已經23歲，次子和幼子分別就讀港大同埋理工。長女早於18歲時亦已「置業」，以$8,580萬購入半山御花園單位，並已接手梁氏家族慈善基金工作。

郭晶晶嘅「上岸」

郭晶晶嘅「上岸」，無伏明霞咁chill，雖然嫁入豪門，但都要「貼地」經營自己個名。「郭晶晶」呢份工唔易做，要考國際裁判牌，入世界泳聯，要做公益，間中都要搵埋議員老公出鏡拍下 YouTube。

雖然忙碌，但據聞郭晶晶退役十五年，做代言都收入超過5,000萬，賬面計仲好搵過十幾萬月薪嘅議員老公。始終霍家政治地位行先，錢唔算最多，但面子就冇得輸。一家五口住淺水灣祖宅，三個仔女讀嘅都係國際學校，大仔霍中曦已經升中，學費一年幾十萬起跳。

全紅嬋「上岸」選項未有

全紅嬋呢？佢連一個「上岸」嘅選項都未有。19歲，傷病纏身，佢喺鏡頭前喊住講「接受唔到咁肥嘅自己」。佢今年3月先至接到第一個個人代言，據報代言費1000萬人仔，但扣完稅同分成，佢本人袋落袋嘅只有200萬左右，只係伏明霞一個單位嘅零頭。