點解新樓多數用浴缸?盤點企缸、浴缸優缺點 網民:企缸係生存,浴缸係生活

點解新樓多數用浴缸?盤點企缸、浴缸優缺點 網民:企缸係生存,浴缸係生活

現時,大部分新樓均配有基本裝修、傢俬、電器等。業主收樓後,幾乎都能馬上入伙。日前,有網民於討論區內發文,想知道為何新樓永遠使用浴缸,而非企缸。帖文一出,引起網民熱議浴缸和企缸的優缺點。

撰文:經一編輯部|圖片:Unsplash、連登討論區

樓主:點解啲新樓咁鐘意用浴缸?

日前,有網民於連登討論區以「其實點解啲新樓咁鐘意用浴缸而唔係企缸」為題發文,認為大部分人都會喜歡乾濕分離的企缸,但新樓大部分都是浴缸,想知道是否因為成本低,而詢問網民意見。

點解新樓多數用浴缸?網民熱議優缺點:企缸係生存,浴缸係生活
圖片:連登討論區

用浴缸成本較低、感覺更加高貴?

帖文一出,引起網民熱議。有人解釋,新樓使用浴缸的主要原因是為節省建築成本,且與企缸相比感覺更加高檔。

  • 「諗住高貴啲,同埋等啲人覺得浸浴同企起度沖都得。」
  • 「因為浴缸高檔啲,可以浸,又可以企,正好多。」
  • 「做企缸要做好個防水,成本好好多,為咗慳成本浴缸係平好多。」
  • 「全部都浴缸,咁起樓嗰陣時就可以偷工減料,由原本預30年唔漏水變到得10年。」
  • 「企缸起樓成本貴啲。你唔使檻入去,因為地下預留咗空間收埋啲喉同隔氣。」

網民:企缸係生存,浴缸係生活

有網民力撐浴缸,直言優點多,最重要的是可以浸浴放鬆,享受生活,但企缸反而做不到。

  • 「浸浴舒服好多,而且開成缸水沖涼係買新樓嘅人先畀得起錢。」
  • 「浴缸浸浴好正喎,唔識享受人生先用企缸。」
  • 「企缸係生存,浴缸係生活。」
點解新樓多數用浴缸?網民熱議優缺點:企缸係生存,浴缸係生活
有網民指,「唔識享受人生先用企缸」。(圖片:Unsplash)

網民:企缸做到嘅嘢有咩係浴缸做唔到?

有網民則認為,浴缸供用家選擇浸浴或者淋浴,揚言「企缸做到嘅嘢有咩係浴缸做唔到?」

  • 「點解會鍾意企缸,想浸下都唔得?」
  • 「唔明點解鐘意企缸,我一定揀浴缸,除非有屋企有老人家。企缸做到嘅嘢,有咩係浴缸做唔到?」
  • 「企缸可以整花灑頭喺頂,浴缸一樣可以…浴缸唯一係對老人家同細路出入無咁安全,但對一個成人完全無問題。」

「有浴缸唔等於一定要浸浴,佢有個位畀你放花灑,你可以照企喺度沖涼。另外,就係一定有個位預咗畀你放浴簾,所以正常係唔會滴到水出去,至少我用咗20幾年都未試過。

屋企夠位多數都係整浴缸,因為浴缸有齊企缸嘅功能,而用家有得揀,可以揀浸浴或者淋浴,但係如果整企缸你只有淋浴呢個選擇。當然個壞處就係如果有行動不便嘅屋企人可能就會驚要跨一下會整親,」

點解新樓多數用浴缸?網民熱議優缺點:企缸係生存,浴缸係生活
有網民則認為,浴缸供用家選擇浸浴或者淋浴。(圖片:Unsplash)

浴缸比企缸更能防漏水?

有網民甚至提出,浴缸防漏水的性能比企缸好。

  • 「其實浴缸防漏水性能係好過企缸。浴缸一件過,漏水嘅可能性細過用雲石或瓦仔砌嘅企缸。」
  • 「感覺上浴缸又無咁易漏水,浴缸企缸一樣做防水層,但浴缸除咗邊位同去水位唔會漏水。就算漏,下面都有防水又有排水口,但企缸就成個地下直接沖水,點都容易啲掛。」

網民撐企缸:浴缸好危險!

不過,部分力撐企缸的網民則表示,浴缸有安全隱患,特別容易「仆親」,尤其對老人家來說特別危險。

  • 「安全性浴缸一定做唔到。」
  • 「擒嚟擒去唔會仲危險咩?放張凳仔係企缸,加埋防滑,感覺好啲。」
  • 「啲舊公屋原裝有浴缸,不過有老人家真係危險。」

「浴缸企係度沖,就算有浴簾都會搞到外面濕晒,同埋總係覺得好易仆街。就算係浴缸有幾何浸浴呀?高嘅人浸落去腳都伸唔直。」

點解新樓多數用浴缸?網民熱議優缺點:企缸係生存,浴缸係生活
部分力撐企缸的網民則表示,浴缸有安全隱患,特別容易「仆親」。(圖片:Unsplash)

企缸比浴缸方便?

又有網民則認為,浸浴是一件麻煩事,加上清潔浴缸浪費時間,直言「企缸快靚正」。

「其實用浴缸幾唔方便,成日要跨過去,屋企有老人家都易跌親。唔請工人,自己又要擦乾淨。一年有幾可真係浸到,香港個都市節奏咁急速,收工返到黎,嗱嗱聲沖完就訓啦!」

  • 「有幾何日日開水浸?企缸快靚正。」
  • 「浸浴好麻煩,浴缸要洗,浸一兩次好快就唔再玩。屋企又唔係大,正正經經要個企缸算啦!」
  • 「浸要等,浴缸又要洗得密,出入要檻腳,企缸乾濕分離易搞過浴缸。」
  • 「沖涼浴缸一定好過企缸,但係要成日洗缸嗰下慘,清潔好麻煩。」
  • 「我由細到大屋企都用浴缸,用咗20幾年,自己搬咗出嚟後用企缸,爽好多。真心唔鍾意浴缸,好麻煩。」
  • 「除非有人日日清潔,如果唔係真係完全唔想掂到個浴缸。」
點解新樓多數用浴缸?網民熱議優缺點:企缸係生存,浴缸係生活
有網民則認為「企缸快靚正」。(圖片:Unsplash)

企缸較能做到乾濕分離兼慳位

又有網民指,企缸比浴缸慳位,且能做到乾濕分離,因此會選擇企缸而非浴缸。

「浴缸可以配浴簾,但擋水無企缸加浴屏好。當然,浴缸都可以裝浴屏,但真係無咁襯所以乾濕分離方面企缸係優勝少少。」

  • 「企缸漏水嘅機會細啲。」
  • 「慳到嘅位夠擺一部洗衣機。」

浴缸定企缸?網民:個人喜好

不過,有部分網民認為,企缸和浴缸各有優缺點,應視乎個人喜好而決定,沒有絕對的答案。

  • 「個人喜好,無話邊個好啲。浴缸無工人姐姐又要洗得辛苦,有工人姐姐又唔想同佢用同一個浴缸。同埋有啲新樓嘅浴缸,如果細到連腳都伸唔直,唔知整嚟做乜!」
  • 「不嬲都一個浴缸一個企缸,想用咩咪用咩,有咩好煩?」
點解新樓多數用浴缸?網民熱議優缺點:企缸係生存,浴缸係生活
部分網民認為,企缸和浴缸各有優缺點。(圖片:Unsplash)

關鍵詞
樓市點睇