假如我是蔡英文?陶傑豪言:我一上台主動跟全部邦交國斷交!台灣寧要民主 無本事賺中國錢|經一拆局

「香江第一才子」陶傑接受《經濟一週》今期的封面故事訪問時,第一個談論的問題就是蔡英文連任的分析。他認為擺在蔡英文眼前的當前急務就是面要對內地的打壓,但他對台灣未來經濟發展充滿信心,認為在美國總統特朗的加持下能打破過往經濟劣績,更形容為「幾乎係坐喺度都可以發達」。陶傑又指台灣人寧要民主,無本事賺中國錢。而國民黨則因過往太依懶大陸資金,難以轉型,500多萬的鐵票只會愈來愈少。

撰文:SmartED編輯部| 圖片:新傳媒編輯室

國民黨鐵票只消不長

陶傑指出,台灣今次的選舉形勢很清楚,500多萬是國民黨的鐵票。為甚麼蔡英文會多了200多萬支持呢,很多都是中間的游離票,還有就是當初高雄有50萬覺得被韓國瑜「搵咗老襯」。上次韓國瑜氣勢如虹,證實是泡沬來,所以再過多5年,這500多萬的鐵票,只有縮而不會增長,但每一年的首投族(成年合資格的新選民)會愈來愈多,而這班人不會再投國民黨。

除非國民黨有一個結構性的轉型,惟箇中出現結構性問題而無法轉型,形容國民黨就像癮君子毒癮太深戒不掉毒品:「因為佢哋攞大陸啲資金攞得太多,攞到佢哋根深蒂固已經再冇辦法令佢轉型。」。

台灣邦交國僅剩15個 陶傑:斷咪斷囉

現時台灣的邦交國僅被斷剩15個,陶傑坦言失去邦交國非絕路,更稱:「如果我係蔡英文,我一上台主動全部斷交!不過會以另一種形式再重新建交。」他反問,蔡英文成功連任全球不是有60多國發表賀電嗎?當中大部分與台灣並無邦交關係;又例如美國駐台協會,其本質就是大使館,駐台代表全來自美國外交部,故此縮減邦交國根本不是問題。

「所謂嘅邦交只是兩個方塊字,加加埋埋嗰幾劃,個面係咪咁重要呢?斷咪斷囉,有啲嘢叫置之死地而後生,你話台灣邦交國只有10幾個,一年少過一年,咁佢係咪滅亡咗呢?佢喺呢個世界嘅地位係咪低落咗呢?好明顯就唔係囉。」

假如我是蔡英文?陶傑豪言:我一上台主動跟全部邦交國斷交!台灣寧要民主 無本事賺中國錢

稱大陸不斷封殺台灣 不如派兵攻打

陶傑批評大陸心胸狹窄,他舉例說:「波特王、周子瑜,有眼畀你哋睇。我係台灣人、我喺呢度享受自由民主價值觀、我有屬於自己嘅Facebook,然後我喺自己地方表達一啲言論同觀點,我唔係去大陸講喎!我喺台灣講,我見人講人話,咁都唔得?然後全民封殺!」

續接還有NBA、亞仙奴事件,陶傑反問:「呢啲市場錢我邊有本事賺?唔係我(台灣)唔受你玩,係你(大陸)一腳踢我出嚟。」故此台灣唯有自建東亞文化經濟圈,卻又遭大陸反對。「如果咁都話唔得嘅,咁不如你派兵打仗啦。打埋沖繩、福岡,咁咪仲好?全個東南亞都係你嘅咪好好?」若非這樣,就應讓台灣開拓其生存空間。

蔡英文獲美國信任 可打破過往經濟劣績

除外交外,蔡英文還要處理當地經濟問題,過去4年蔡英文都被批評未能振興台灣經濟,陶傑認為錯不在她。由於自冷戰時代開始台灣經濟受制於美國與中國間之關係,加上美國允許中國加入世貿組織,令西方製造業、汽車業及某些電子科技全部搬到中國發展。故此受制全球化格局下,陶傑認為任蔡英文再厲害也無空間發揮:「唔到佢作主,(正如)水向低流資金都到咗大陸。」

不過到了2019年,由於美國總統特朗普鼓吹資金離開中國,全球生產鏈正被打破及改造,過去一年不少已進軍內地的外資撤廠,令台灣有望趁機吸納:「受惠國有泰國、越南、甚至是寮國(老撾)、緬甸,而台灣定必係之一,其中之一。」

他更揚言,就算內地抵制台灣亦沒用,因為2020年是西方開始抵制中國,現在世界的潮流是decoupling,即與中國脫鈎。「脫到幾多就唔知,但起碼有相當的資本外流中。台灣作為一個擁有2,300萬人口的島,承接返呢個大潮流出來的波浪、水花,應該十年八載都接唔晒。」

「依家做總統嗰個幾乎係坐喺度都可以發達,大前題係要美國信得過,而蔡英文就是美國信得過嘅總統。」

到目前為止有日本鈴木汽車廠、韓國的三星集團和現代汽車、台灣最大的玻璃製造廠更回流台灣,陶傑相信之後會有更多台商退出大陸市場後回歸。他更形容,假設未來四年蔡英文更不濟都能創出經濟成績:「嚟到第二任,蔡英文幾廢都好,因為美國帶頭開綠燈及『吹雞』,再加上好多台商退出大陸市場,自然會回流台灣。所以就算佢幾廢都好,都會創造一些經濟成績。」故陶傑其對台灣未來經濟發展有信心。

關鍵詞
經一拆局