中女 退休開支 優質股 龔成信箱

中女為退休開支作準備 月供5隻優質股 諗得過|龔成信箱

投資

廣告

【優質股 】今日龔成信箱,不少讀者想為未來作打算,如何實行投資計劃,亦提及熱門的股票以及投資心態等問題,當中包括增持、收息股、月供股票、對沖基金、回購,以及博彩股等提問。

撰文:龔成 |圖片:新傳媒資料庫、unsplash

1.優質股

你好,想問 683 嘉里建設算唔算優質?見跌左好多想做月供。及我喜愛佢樓盤都優質

另外,本人月供股票組合已更新為
$2500 匯豐 0005
$2500 電能 0006
$2500 盈富基金 2800
$2000 中國人壽 2628
$2000 金沙中國 1928

中女作退休儲備,剛起步

之前亦高位購買了易鑫,雖然由$10跌至唔夠3蚊,但睇好前景兼龍頭唔想放,只有2手,放會蝕成皮野,我想擺下先,有冇其他意見?

 

龔成老師:

嘉里建設(0683)不差的,在香港賣物業當然好賺,佢係呢部分都算有一定的業務,不差的。佢的業務地區包括香港及中國,基本上都賺錢,但中短期收入上落總會有。

由於嘉里建設的中國項目延遲完工,所以佢黎緊一兩年的盈利都會減少,這因素亦令佢的股價受壓。整體上,這股都可以長期月供的。

至於你現時月供的組合,都是優質股,分配亦無問題,長期進行就得。

至於易鑫(2858),雖然有增長力,但估值是最大的問題,佢跌咁多的原因,是因為佢在上市時以一個好高的估值賣比投資者,其後回落至合理水平,所以股價跌了不少。所以我對新股半新股,一向都有相當的保留。

因為新股只需3年財務數據就可上市,同時一定會「整靚盤數」,根本就無法估值,加上新股一定利用該版塊熱炒時上市,所以散戶無可能買到平貨。

佢主要係中國,從事汽車交易平台業務及自營汽車融資業務,並利用線上渠道進行銷售,這業務有潛力,但這公司現時未有盈利,仲蝕緊錢。

但就算跌了不少,市值卻仍有$150億,市場只基於「概念價值」去比這個定價佢,而這個價值可以變得好大,所以風險不少。

佢有潛力的,但研究最終值幾多錢,根本無人知,所以你要明白,這股之後的變化可以好大,如果注碼唔算多,你可以守住當博佢日後好勁。

(對照龔成信箱:Q7977)

2.中電(0002)

龔成老師你好~ 我每個月有$10,000可儲蓄,想用$7,000作月供股票 分配為 0002中電 0003煤氣 0012恒基 1038長建 這組合可行嗎?

但中電股價比較高,是否等一等才供呢?
期待回覆

 

龔成老師:

你上述所選的,都是有質素的股票,都可以進行月供的。

中電(0002)、煤氣(0003)都處於略貴水平,但你用月供模式,其實是一個分注買入的策略,只要你時間夠長,就算這刻略貴都無問題。所以,上述月供的策略,已經可以開始進行。

最重要是你每月在月供之餘,能儲到一些現金,到大市大跌時有資金買平貨,咁就得。

(對照龔成信箱:Q7974)

3.博彩股

你好, 想問一問龔SIR 意見, 宜家HSI 跌市已>20%, 是否已到合理區底部?? 應該分注買入2800 (當PE11及3.5%股息時)大約$26.5 ??

另外, 1928及各澳門博彩股已愈趺愈低, 被大行吹淡, 是否已到合理區底部 (ref:Q6455)應該分注買入1928( 當6.5%股息時)大約$30.5 ??

但我本身月供7隻股票: 0001($1500), 0003($2000), 0066($2000), 1038($2000), 1211($500), 1928($500), 2800($3500), 是否太分散, 應該減少月供股票??

 

龔成老師:

RSI是無用的指標。

如果你有留意全世界最賺錢的投資者、基金經理,佢都無唔用這表示唔用這指標,甚至話這指標是錯的。而用這指標的,都是財演,原因好簡單,這指標令佢地好易有野吹。

恆指市盈率如果跌到10倍以下,可以初步理解為平宜,所以以現時水平,這刻處合理區中,可以分注買入。

至於賭業股,本身優質,中短期不利不用理會,集中長期分析就得,同埋大行唱淡,不要盡信。這類股近期處合理水平,可分注投資。

你本身所供的,都是有質素的股票,你保持月供就得,不用減少月供金額。

(對照龔成信箱:Q7973)

4.舜宇光學(2382)

你好呀老師,我係一名投資初哥最近先開始投資,並且係開始投資後先睇到你的分享,所以有幾個問題想問下

1.想問下你認為2382舜宇同522 ASM的前景如何?

2.想揀兩隻股月供,各$1000一個月,002中電,006電能實業,003媒氣,0823領展如果要排序你會如何選擇?想穩中求勝

3.月供股其實係咪唔太需要考慮何時入市呢?

4.潛力股如果升值到高位後,升值能力下降,而企業的環境有所改變的話係咪就應該要減持呢?
謝謝老師

 

龔成老師:

1)兩隻都不錯的,但舜宇光學(2382)是近年市場的焦點,我比較怕這類股。佢質素不錯,增長力不差,但現時估值不平(就算回左咁多都是)。業務前景正面的。

至於ASM PACIFIC(0522),佢多年前已係全球首個為半導體封裝及電子產品生產提供步驟技術和解決方案的設備製造商,包括從半導體封裝材料到後段等。

這企業有一定的增長力,財務數據正面,行業前景正面,因此有投資價值。但從過往的數據可見,業務都有略為波動的情況,始終這類科技行業的變化較大,存有不確定性,分注投資都可以的。

2)你可選擇:領展(0823)、煤氣(0003),但要留意手續費,因為如果金額太多,而佢手續費又好貴,咁會好影響你的回報。

3)一般都唔洗理大市,因為是一個長期平均的過往。但如果大市好貴,都會停一停的。

4)有可能的,但都要到時睇情況。而我地不單睇股價升了多少,而是睇佢業務,是否已無增長能力。

(對照龔成信箱:Q7975)

5.證券行

龔成先生您好, 本人和男友今年28歲,共同收入53.5k (扣MPF後),現時每月扣除所有支出剩下大約$19-20k,主要租金及雜費支出 $13k。

本人現時儲蓄只有港元$5萬, 加元$5000,人民幣$6000;
男友有現金 港元$5萬;
股票約$6萬,70% 騰訊、20%金山軟件、10%工行,無月供股票。

有幾條問題想請教您:
1)請問我們該如何整合現有的資本?
2)多少應該作儲蓄用途?

3)又該如何投資才能達到希望3年內能存到100萬的目標?或達到財務自由?
4)我本人未有任何股票戶口,請問您會建議使用哪間證券行或銀行?
5)如月供股票有什麼選擇建議?

非常感謝 祝身體健康一切順利!

 

龔成老師:

1)騰訊(0700)持有的比例太多,不過由於你初累積財富,所以不用減持,只要之暫時不要增持就得。同時,科網類佔了你股票組合的9成,暫時不要加這類。

2)暫時持有的$5萬現金不要動用,這部分作備用,以及等機會入市之用。

3)如果你要3年內有$100萬,就要更加努力。首先是每月要儲到$20000,要堅持去做,然後就是好好利用這些資金,合理增值。由於3年時間不是一個好長的年期,因此投資時不能進取,只能投資一些平穩增值類。

你可以將其中$1萬,去做月供股票,餘下的先儲現金,同時學習投資,強化選股、企業估值、投資時機等技巧,好好運用餘下的$1萬。

4)銀行或證券行都無問題的,你多比較手續費就得,匯豐、南洋商業銀行都可考慮。

5)你最好月供盈富,這是最平衡的方法。如果你有其他心水股,就將$6000供盈富,餘下$4000供這些心水股就得。

(對照龔成信箱:Q7976)

 

6.回購

想問聲上市公司係咪真係實際會在股票市場買返二手市場的股票呢,我記得你講過。

佢買完啲股票之後係會自己公司持有作為資產,定還是會怎樣呢?

 

龔成老師:

佢會在股票市場上,買翻自己的股票,例如之前的匯豐(0005)、騰訊(0700),都有做呢個動作。

佢會用公司內部的現金去買,買左之後就會註消左佢,這就會令總股數減少,從而提升每一股的價值。所以,這都是一個回饋股東的做法。好多時當公司見到自己的股價處較平水平,就會做這個動作。

(對照龔成信箱:Q7978)

7.恆指

老師。想請教一下現時恆指,股票市場,係唔係入市時機?

你預測下行最低幾多點?謝謝

 

龔成老師:

如果你明白真正的投資模式,就知我地不會用「預測」,即是說,我地唔預期大市會升跌到幾多點,可能你會奇怪,但全球投資最勁果D人,都從來唔會預測大市的,巴菲特就是一例。

我地只會分析大市冷熱、股價平貴,以買企業為重點。

現時可以理解大市處合理水平,可以分注買入優質股,但最好用「一邊入貨,一邊儲現金」作策略。

(對照龔成信箱:Q7979)

8.對沖基金

老師,有一件事情困擾了我差不多十年,在差不多十年前買了澳紙,因為當時利息高,我在高位入了澳紙。

之後澳元大跌,我便做了澳元對沖基金,希望用利息使我返家鄉,本來有望明年到達目的地,但近來因美元超強,再加上貿易戰,我應該怎?處理它呢?

我已經輸了時間值,不想再繼續下去。
希望老師教導

 

龔成老師:

好多人停留在「買入價」,但這只是一個心理因素,你試試用「長遠的總財富」去分析,你就知道點做。我地繼續持有一個項目與否,是基於這項目的長期回報,並不是買入價。

以長期來說,澳元只是貨幣,加上利息已不及過往的年代,長遠增長力有限。你最好先賣出一半,換成港幣,然後買入盈富(2800),至於餘下的,就再等澳元反彈多啲先賣,因為變數好多,咁樣是較好的方法,起碼同你平衡左風險先。

(對照龔成信箱:Q7980)

9.收息股

我仲有15年就退休,想打算開始學投資,去學買收息股,想請問當跌市時,怎樣可以做平衡對沖?

因為到時都60歲,無入息,如果現在買左啲股票到退休個時遇上跌市怎辦?

 

龔成老師:

如果你有15年時間,其實唔洗太快投資收息股,因為你仍有財富增長的能力,可以善用這段時間,之後慢慢先改變組合。

簡單來說,就是運用「先增值,後現金流」作方法,前期應投資較多增值類資產,而較年長的,則應投資較多保守類項目,因為前期財富系統未成形,可承受的風險度較高,所以會著重增值為先。

例如初期投資較有增長力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。

即是你現時仍可投資能增值的股票,但10年後,已開始接近退休,就不能投資這類股,只能投資收息股。同時,會利用退休前的5年時間,慢慢將原來的增值類股,轉為收息類股。

如果你未有選潛力股的能力,未有掌握投資時機的能力,這刻可以簡單地投資盈富基金(2800),利用月供模式都得。

(對照龔成信箱:Q7981)

10.增持

老師,我想問下,如果一間公司回購和增持該公司股份有甚麼不同,對股東有無影響?謝謝!

 

龔成老師:

你要睇翻佢邊個買入。如果是公司自己回購,即是公司買翻自己的股票,佢會動用公司資金,買入後會註消這些股票,這樣,總股數就會減少,從而提升了每一股的價值。

至於增持,一般指大股東買自己公司的股票,以提升持股的百份比,佢動用的是自己的資金,這動作不會你持有每股的權益。

(對照龔成信箱:Q7982)

免責聲明:本專頁刊載的所有投資分析技巧,只可作參考用途。市場瞬息萬變,讀者在作出投資決定前理應審慎,並主動掌握市場最新狀況。若不幸招致任何損失,概與本刊及相關作者無關。而本集團旗下網站或社交平台的網誌內容及觀點,僅屬筆者個人意見,與新傳媒立場無關。本集團旗下網站對因上述人士張貼之資訊內容所帶來之損失或損害概不負責。