28歲有85萬儲蓄 兩年內買500萬物業 如何部署｜龔成信箱
撰文：龔成 ｜圖片：新傳媒資料庫
1．買500萬下的單位
Hi 龔成老師你好，
我的理財觀念跟你相近，但是對於投資我還是新手，我希望30歲前能買到500萬下的單位，做8成按揭，然後以租金收入供樓（但是人工過不到壓測，首期可能要再多一點，我還希望多留半年供樓資金才入市）。希望你可以指點一下投資策略儘快達成目標。
小妹現時28歲，月入28k, 月儲17k, 儲蓄約85萬。其中包括以下股票：
0003, 10手
0005, 1手
0939, 12手
0388, 5手
0017, 5手
我應該怎樣改變投資策略以盡快達成目標？
先謝謝老師指點
龔成老師：
你有一個明確目標，相當好，我認為你可以達成這目標，不過，當中可以做一些調整的。
股票佔你的財富比例不多，其實你可以有效利用股票，略為加快財富滾存（但不用太多，因為你始終打算數年內置業）。
現時持有的股票，可以繼續持有，現金部分不要動用（除非出現股市大跌，有明顯機會出現才用）。
你反而可有效利用每月儲蓄$17000，你可以將部分，例如一半，分注買入股票，又或月供股票，這部分追求穩中求勝，所投資的是平穩增值股+收息股。加快你的財富累積。
這部分會令你的財富不斷累積，可以有效加大你的首期，到你的首期足夠後，就可以同時分析下當時的樓市。你不用一定定30歲前，這是一個很好的目標，但都可以有彈性，年齡不是最重點，「足夠的首期」，「樓市的時機」才是。（對照龔成信箱：Q5055）
2．月供股、基金派息還是定存
Hi..我月入有25000
想今年開始月草10000-15000
想4年後有舊錢諗買樓
我應該將d錢月供股，還是基金派息，還是做定存？
龔成老師：
如果有4年時間，可以有一點增值力都得，平穩地利用投資，以你的儲蓄，加上合理的回報，都能累積到一定的資金。
首先，儲蓄是初期資金，這部分十分重要，最好盡力儲多點。
假設你每月可儲$13000，你可以將其中的$7000-$10000，用於月供股票，不要用得太盡，要留一點現金，這些現金除了備用外，仲可以幫你在大跌市時把握機會買平貨。
你可以供平穩增值股，例如盈富（2800）、金沙（1928）、長建（1038）、中銀（2388）、領展（0823）、港鐵（0066）等，是適合你的類別。
你以這種一邊月儲儲股票，一邊儲現金的模式進行，最重要是長期進行。
當你不斷累積到足夠的財富，再睇下到時的樓市情況，有機會就不買入置業。（對照龔成信箱：Q5056）
3．選1房還是2房？
龔sir，有d野想請教你。本人人工18k + 老公10k底薪(另有佣金），暫無小朋友，但計劃中。
之前抽到屯門居屋，希望可以住幾年後再搵其他樓，現在煩惱中，不知選1房好定2房好？
因為計過我地應該可以買到330內的樓，但如果2房怕太吃力，1房又怕換樓難，請問你有沒有意見可參考下呢
龔成老師：
雖然我睇樓市長期向上，但現時的確不平，當中存有風險。居屋雖然不是理想的投資項目，但就是很好的自住項目，以你地的財務情況，我會建議不要太吃力，以自己的負擔能力行先會較好。
我會偏向1房，你地可以有較多資金剩，這些資金同樣可以滾大，同樣可以配合該居屋過幾年追其他樓，這是可行的。
因為從整體財富的角度，只要你懂得投資，善用資金，其實你投資那一度都可增值。因此，你要先考慮你地的負擔能力。（對照龔成信箱：Q5057）
4．福壽園（1448）
請問1448幾錢先合理?現價過高嗎？
另外小朋友有大約5000利是錢~應如果運用?可以買收息股(例如:405及2638)長渣及收息嗎？謝謝
龔成老師：
福壽園（1448）升左唔少呀，而家水位唔平。佢有質素，又有潛力，但市場都明呢樣野，所以估值唔平，一直唔肯跌落去。
要到$6以下，先會叫較合理，但未必見到，所以，你都可以等佢回5%，先小注買小小，到有較大回落時才真正出手。
$5000可考慮買港燈（2638），收少少息，長線投資。（對照龔成信箱：Q5058）
5．股票前景
你好，我想向你請教幾隻股票，分別係：石藥集團，愛康醫療，耐世特作長期持有，我以較高價格共約30萬平均買入，但見市場不斷下跌，加上美國增加關稅，想請問以上3隻前景如何？
龔成老師：
石藥集團（1093）正面，佢係國內主要醫藥製造商之一，以生產能力計算，均為上述部分原料藥全球最大製造商之一；除原料藥外，在國內亦為主要的抗生素成藥製造商之一。
這股有相當的實力，同時高毛利，前景正面。但由於現價不平，如果投資金額不多，就無問題。
愛康醫療（1789）唔係話佢無質素，但投機味太濃，我有少少保留，現時市值去到$40億，以佢的盈利情況來說，已經唔平，市場上比佢唔少概念價值，前景都有的，但股價一定好波動，這類股其實不宜大注。
耐世特（1316）本質唔差的，前景不差的，唔洗太擔心，只是之前估值太高，現時股價返回合理水平，相信再跌有限。這股有得守的，暫時持有就可以。（對照龔成信箱：Q5053）
6．港交所（0388）
你好 龔先生
本人是個投資新手 本金不多
最近有意入手港交所
但龔先生認為現在這高價才買入是否不明智之舉呢
謝謝
龔成老師：
港交所（0388）是優質股，如有貨，持有無問題。
不過，這股現價不便宜，現價才買入，時機上未必是最好，因為這股是週期性的股票，市旺的時候股價一定會偏高（佢$200以下才是較好的買入區）。
現時股市開始旺，但未到真正的狂熱期。所以佢又不算太貴，如果你要入，我會建議用月供模式，同時月供的金額這刻不要太多，或等佢回落先開始入。（對照龔成信箱：Q5060）
7．月供股票
龔sir你好！小妹今年29了，剛學投資，有啲遲起步，所以想請教你：
– 早幾年出來工作時，年少無知，只join了銀行儲蓄計劃 … 已儲30多萬現金，但要hold多3年半先動用到
– 現時可用現金只有20萬，另每月可儲1.8萬
– 暫時想法係，每月除儲 $2000 現金外，其餘會月供股票。這樣的組合 (各月供$2000) 可以嗎？定還是放棄1、2隻，提升盈富比例好啲？
盈富基金 2800
金沙 1928
港鐵 0066
中銀 2388
合和公路 0737
香港電訊 6823
領展 0823
置富 0778
龔成老師：
如果你$20萬在中短期內無特別用途，其實可以將大部分作投資股票，因為你現時的財富組合，太集中在現金，令你無增值力。你就算用盡$20萬分配至股票，你的組合股票比例仍不多，因為仍有$30萬未能動用的資金。
$20萬可以買入收息股，例如置富（0778）、陽光（0435）、香港電訊（6823）、港燈（2638）、工行（1398）等，合和公路（0737）等一等先，佢易左手，未知派息政策，等出全年業績先決定。
至於月供部分，其實可以進取一點，因為你29歲，財富仍可以有一定的增值力。
你可以投資盈富（2800）、金沙（1928）、中銀（2388）、港鐵（0066）、領展（0823）、比亞迪（1211），當中以盈富供較多就可以。（對照龔成信箱：Q5061）
8．金沙（1928）
龔成老師~本人$36.2購入1928金沙,去到$50應否放出擭利，然後再等低位再入？還是等較高價位再放出？
龔成老師：
如果你是中短線，都可以獲利。但我是長線，會繼續持有。
金沙（1928）是優質股，持有愈耐愈會增值。先行賣出，等跌再入，知易行難，所以，無人知賣出後，能否買得翻。
所以我會用長線的策略。首先，現時估值過了合理買入區，所以我停止買入，但以持有作策略，因為無算太貴。我會見到「真係好貴」，才有足夠的理由，比我賣出一隻優質股，所以會等$6X以上，我才考慮賣。（對照龔成信箱：Q5062）
9．華人置業（0127）
龔sir，你好，請問0127(華人置業)，現在可買入？ 作為收息及資產增值之用？ 謝謝
龔成老師：
華人置業（0127）是有質素的股票，但不是不隻理想的收息股。
佢近年有好高的股息，但睇翻記錄，當中包左好多特別股息，不少都是由賣資產賣業務而得來的，這些賣資產的行為，之後不能持續。
因此，雖然佢過往股息好高，但將來必然能持續，加上賣了業務後，之後的盈利就會減少，派息自然減。
這股投資作財富增值，可以的。（對照龔成信箱：Q5063）
10．人民幣
你好, 我有一事請教你. 我媽有30萬人民幣, 都係幾年前最高位買入,但佢一直都放定期3.5 – 4 厘, 所以我計返, 經過呢5至6 年, 佢其實都係賺嘅, 因為啲息都已經抵左個差浮動差價
近呢兩年我負責幫佢找定期的, 定期到了, 我就將佢啲息欏出來, 大約有1萬1, 咁佢就可以係哥年用。因為我地都有時會在內地買野, 咁就唔洗理人民幣嘅升跌,長遠有得用
而家我媽又儲到澳門幣10萬, 佢話不如再買人仔做定期. 請問我點樣有效有系統咁儲蓄人仔, 做到一世有自動生出嘅人仔用. 我本來打算長遠睇到有較低嘅位先買
暫時先繼續滾現有的30 萬, 新儲的等有靚價買入優質股先..請指教,謝謝!
龔成老師：
如果你地有長期用人民幣的需要，就可以將資金存人仔定期，長期收息，這是最好的方法，對你屋企來說最穩健的。
但如果可以承受一點風險，可以買一些在港上市，以人民幣報價的收息股，又或人民幣債券，都可以長期收到利息，只要小心分析，其實都可以好穩健。
不過這行為要睇你家人的風險承受能力，有時項目的風險不高，但佢個人好擔心呢類項目的話，都不是好的策略。
至於佢的澳門幣是否買人民幣，其中一個分析點係佢現時人民幣的比例，如果人仔已佔佢財富的大部分，太集中唔係一件好事，始終人民幣都會有升跌。（對照龔成信箱：Q5064）
