冇料群主扮高手 新手跟足輸100萬身家 炒幣萬人群組遭踢爆終極陰謀

撰文：經一編輯部｜ 圖片：連登討論區、Unsplash

樓主：佢志在每月賺過百萬佣

日前，有網民以「踢爆幣界呃佣騙子」為題，在連登討論區發文，內容主要指向一個曾經接受過傳媒訪問而出名的Telegram投資群組群主（樓主以「柴狗」稱呼該群主）是「呃佣騙子」。

樓主表示，以為「柴狗」想透過傳媒報道推介自己的pateron或教班，點知「柴狗」志不在此，而是「志在每月賺過百萬佣」，樓主更分享一名Telegram群組苦主的慘痛經歷：

該名苦主聲稱在Facebook見過「柴狗」賣廣告，傳媒又有訪問，「佢廿幾歲好似做到day trade財自咁，我認我天真我蠢，我真係信咗」，然後該苦主在5月19日當晚，跟「柴狗」玩，嘗試撈底用50x ETH永續合約，在大約2,600美元水平撈底ETH，止蝕都跟佢擺在2,400美元左右，「 但沒諗過我個期貨戶口好快就爆左倉，我無咗過百萬！」

該名苦主續稱，後來搞清楚事情，原來「柴狗」落單用咗cross，苦主照跟，然後剛好binance死機沒有幫苦主止蝕，最終在大約1500美元價位，binance幫苦主斬倉，苦主就咁輸晒啲儲蓄，「用咗過百萬成功令我明白咗cross同isolated有咩分別」。

圖文並茂張貼「罪行」

樓主圖文並茂張貼「柴狗」的「罪行」後，進一步解釋為何Binance死機要遷怒於「柴狗」。

樓主認為有經驗的trader應該要知道極端市況下會有好多外圍因素導致交易風險大幅上升，並應該要知道交易所好大機會死機，但他沒有考慮當中風險就叫新手跟他開50倍槓桿，質疑是否想有人因為他而輸到跳樓。

「死罪」在於新人信「柴狗」是高手

由於Binance永續期貨有分逐倉模式（isolated）與全倉模式（cross），isolated是指開倉的margin輸清後，不會影響期貨戶口的剩餘資金，但cross是指一旦某一交易的margin而耗盡，期貨戶口的資金會自動用作償還該交易的虧損，直到清零為止。

樓主認為「柴狗」的「死罪」在於，新人信「柴狗」是高手，因此「自然跟足佢嘅setting」，更怒轟「你自己知自己廢，入少少錢玩我當然明，人地當你係高手，又因為信你而跟你落單嘅，畀你累死啦。」

總結而言，樓主質疑「柴狗」冇料扮高手的終極目的，是想賺取平台的referral fee，因此開Post的目的是想苦主不再讓「柴狗」賺referral。

網民：睇唔過眼好耐

帖文一出，網民反應兩極，有人認同樓主所言，並指「柴狗」吹得就吹：

• 「睇唔過眼呢條友好耐，個陣佢一開ig就吹到自己要月賺一球，笑大人個口，一睇就知個人吹得就吹，如果佢真係每個月都賺一球以上財自左好耐啦」
• 「無炒開真係唔會識咩isolated咩cross…不過扮高手然後爆倉仲好意思入金再玩過咁Ｘ厚面皮都講得出…騙子真係騙子，好野」
• 「之前大牛市免費果陣有跟過佢買股，的確係賺嘅，牛市Day trade邊個唔賺，之後收成千銀一個月，彩佢都傻」

網民：唔係應該你自己學完先玩？

但亦有網民不認同「柴狗」呃人，反指苦主連自己輸什麼都不知道，又質疑是否穩賺才不算呃人：

• 「你爆倉唔係因為cross，係因為用標記價格止蝕，輸左成球嘢衰咩都未知」
• 「真心問，binance個日死機都可以入人數？爆咗倉就怪人唔教你用逐倉？」
• 「唔係話幫佢，但呢d嘢唔係應該你自己學完先玩㗎咩？唔輸錢，穩賺先唔叫呃人？」

大家看完之後又覺得道理曾該站在哪一方？

延伸閱讀：重倉騰訊$600蟹貨 準新郎控訴跟財演炒中資股輸身家 驚結唔成婚上網求救

延伸閱讀：【牛市要繼續】美股泡沫論吹足半年冇料到 識玩要跟有錢人玩 大摩：百萬富翁第3季賭呢個行業