「賣股買樓」還是「賣樓買股」?

樓市

廣告

呢期點可以唔講股票?過去一年,唔買樓、唔上車,就會畀人指指點點。最近幾天,唔炒股、唔講股,直頭係死罪﹗這就是香港的生態!

正如之前幾篇文講過,呢期大家都要睇「破頂」、「創新高」新聞,如果話樓市會有調整,是天理不容的,會被身邊朋友、網友圍插。

近日股市大升,又有傳媒報導說,乜乜花園、物物豪庭又破頂。點解?因為股市大升,股民賺到錢,可以畀更多首期,於是就追價,破頂!

唔好理啦!總之一定有辦法搵到破頂的理由。係咩?好多減價成交咩?當睇唔到啦,淨係講嗰一千零一單破頂成交咪得囉。

股票升三成 易過樓價升三成

幾個月前與幾位中環才俊聚會,討論到底應「賣股買樓」定係「賣樓買股」。

才俊甲:「舊年開始我已經同客戶轉緊倉,減持物業,增持股票。」

才俊乙:「我自己都係,樓價升到過晒籠,相反股票就冇郁過。」
筆者:「係咪真係得架?」
才俊丙:「計值博率啫,股票升三成,易過樓價再升三成好多。」

筆者心血少,又懶,唔想日炒夜炒,沒有買股票,只是開了一個戶口買股票基金,再請其中一位才俊幫我睇倉。近日中港股市大升,筆者的新倉,雖然沒有港交所(00388)升得那麼狠,但仍然錄得不錯增長。

講番今個星期的重點,到底應「賣股買樓」定係「賣樓買股」?從好友的角度,炒股賺了錢,可以付更多首期,應該賣股、買樓。樓價會繼續破頂,繼續創新高,繼續病態兼瘋狂。

從淡友的角度,股市賺到錢,樓價又升到不合理,應該賣樓、買股。資金會流入股市,樓價會適度調整,長遠更健康。

誰對?誰錯?兩方都有道理。作為一個理性投資者,絕不會迷信任何一方。非常贊成才俊其中一個Point,計值搏率啫!

如果你仍然未上車

一直以來,都為如何儲首期而煩惱,這次股市升浪你忽然賺了幾十萬元,首期的問題忽然搞定,筆者認同可在適當時機獲利,一圓上車夢。實不相瞞,十年前筆者上車的首期,也是炒股票賺回來的。

但是有一點一定要打12粒星星,千萬不要盲目高追,價值300萬元的樓,就俾300萬元,即使如何心頭好,最多畀到330萬元,唔好被代理說多幾說,就畀到380萬元、400萬元高追,唔識就先多睇、多學習,現在很多業主都是亂開價,我們俗稱「扑傻瓜」,唔識唔好亂買!

如果你已擁有好幾個物業

趁現在年輕人上車心切,筆者同意可以趁高位「扑傻瓜」,沽出一、兩間,將資金轉投股市或者基金,樓市不會無止境上升的,筆者已經身體力行,調整投資組合了。

不過亦有一點要打12粒星星,千萬不要盲目炒股,見邊隻升得多,阿乜水有秘密貼士,就瞓身買落去,股市調整唔講得笑,可以跌很多,甚至停牌。

唔識唔好亂咁買!如果自己唔熟,工作又忙,筆者建議可以買一些符合時勢國情的大藍籌,或者股票基金。是的!沒有兩天升五成的興奮與刺激,然而希望大家明白,這些資本是我們過去多年,辛辛苦苦經營物業投資賺回來的,萬一輸,點賺番?要等下次金融海嘯執平貨喎,有生之年都未必有機會。

筆者轉倉不是因為眼紅趙薇的阿里影業(01060)賺到幾十億,而是樓市實在升得太多,趁資金有出路,平衡風險,情願賺少啲,穩中求勝。

太古城上月最新放盤叫價是多少?

太古城上月最新放盤叫價大約…各區樓市買賣詳情請看

九龍區有哪些大型屋苑放盤呎價最低?

九龍區不少受歡迎的大型屋苑呎價對比上月都有回落…各區樓市買賣詳情請看