分享至
    人哋話升你又信 盲搶高追蝕死你

    人哋話升你又信 盲搶高追蝕死你

    其實很多人買樓不想賺錢!

     

    朋友: 「我買咗樓呀…」

    筆者: 「幾時呀?」

    朋友: 「買咗冇耐,下個月成交,你點睇?仲會唔會升?」

    筆者: 「你買咗邊呀?」

    朋友: 「買咗河畔花園。」

    筆者: 「好貴喎,你唔係創新高嗰個丫嘛!」

    朋友: 「唔係…我呎價都係$1.7萬啫,好似有人買$1.8萬。」

    筆者: 「點解你會買呢?」

    朋友: 「$410萬,幾乎借到9成,首期少啲嘛。」

    筆者: 「市區好多單楝樓都係$400萬樓下,你又唔買?」

    朋友: 「係咩?…咁我同女朋友屋企人都係住呢頭嘛。」

    筆者: 「有冇諗過幾年後賣出街,可以賣到幾多錢?」

    朋友: 「冇諗過喎,你覺得會唔會升?

    筆者: 「如果會升,你覺得會升幾多?」

    朋友: 「冇諗過喎,三成?」

    筆者: 「呎價咪$2.34萬?」

    朋友: 「又好似冇乜可能喎,$2萬都唔合理。」

    筆者: 「就係囉,老實講,呢個價,難賺錢,甚至可能坐艇…」

    朋友: 「咁我都係自住啫,又唔係一定要賺咩錢…」

     

    文:1%Anthony

     

    很多人買樓,都不想賺錢!聽似荒謬,但卻是事實!

     

    投資者買樓,總是會計算成本,計算值搏率,計算自己買入的單位將來賣出的時候可以賣幾多錢,憑甚麼可以賣這個價錢等等,即使遇上自己喜歡的單位,如果價錢唔啱,賺唔到錢,就會放棄。

    相反現時很多買家,尤其是首置的年青人,買樓的時候都會先考慮主觀因素,例如就近家人,就近朋友,喜歡這個環境等等。

     

    如果你中了六合彩,有$500萬現金…

    單位A: 新樓,新界區的大型屋苑,會所勁靚,個個朋友都話型,呎價近$2萬,擺明貴過附近二手樓一截,將貨就價,你只能買一個250呎的開放式單位,市值租金大約只有$1.1萬元…

    單位B:舊樓,市區單幢樓,樓齡近40年,講出來朋友都未聽過,冇裝修、冇會所、冇商場,呎價僅$8,000,擺明平過附近一截,你可以買近700呎,可以間三房空間感十足,市值租金約$1.8萬…

    你會揀哪一個?

     

    以前投資者主導市場,多數買家會選擇後者,幾年後執靚賣出街,可以賺價,甚至分間出租,可以賺現金流。現在首置客主導市場,多數買家會選擇前者,甚麼賺價?甚麼賺租?不懂計,亦不會計,領導人不是說,房子是用來住的,不是用來賺錢的嗎?

    所以現時市場上出現了很多奇怪現象…

    很多時候我們買樓會考慮Location…

    然而,傳統以來被認為比較偏遠的新界區,買家瘋狂追捧,例如不久前的報道說,河畔花園被搶到呎價$1.8萬,同期九龍市區質素相若的單幢樓,呎價只需$1.3萬~$1.4萬,港島區呢?呎價約$1.5萬~$1.6萬,怎麼看後兩者的值搏率比較高,為甚麼買家仍然會買那個單位?

     

    又有很多時候,投資者會考慮物業的租金回報,可攻,也可守…

    以上述的例子為例,河畔花園的租金大約是$1.1萬,九龍質素相若的單幢樓約租$1.2萬~$1.3萬,港島約租$1.4萬~$1.5萬,怎麼看都是後兩者的攻守能力更強,更適合投資,為甚麼買家仍然去創新高?

    可能是…根本沒想過!

    也可能是…根本不懂!

    身邊的人說該買,就買;代理說會升,就信。

    今天盲目高追、創新高的朋友們……

    祝好運!

    作者為1%投資培訓的地產課程總監,著有《買樓上車防中伏》、《上車又住又賺》、《樓。轉命運》、《工商舖小本投資入門》、《50 萬上車》、《投資買樓賺錢筆記》等等,其博客《第一桶金》總瀏覽量逾300萬人次,曾接受多間傳媒專訪及出任電台地產節目嘉賓主持,並擔任TVB節目「有樓萬事足」顧問。2000年科網股爆破,曾欠下近一年薪金卡數。經債務重組後,2004年股樓雙線出擊,短短四年由滿身卡數打工仔,變出六層樓。其後與投資兵團大舉出擊投資物業,並進軍商鋪、工廈市場,以穩健投資策略,成功變出雙位數物業。

    關鍵詞
    經一專欄