買樓

靠買樓發達仍未絕望 依家先入市 兩招變陣 | 樓市入門 | 香港樓市2018

樓市

廣告

【買樓】 中原城市領先指數CCL首次突破180點,連續兩星期上升。很多未買樓人士覺得在香港看不到機會,Anthony sir亦有一番見解。

撰文:1%Anthony |圖片:新傳媒資料庫

朋友A:    「有冇留意中原指數呀?」

朋友B:    「有呀…180幾點!痴線!」

朋友A:    「97年100點都話貴,而家仲高咗成倍!」

朋友B:    「政府好似已經冇晒辦法咁。」

筆者:    「冇辦法仲好啦,次次出招都不跌反升!」

朋友A:    「由2010年第一次SSD到而家,越出招越衰。」

朋友B:    「其實點解要出咁多招?以前自由市場咪幾仲好。」

朋友A:    「政府唔想有泡沫出現,希望市場穩定發展嘛。」

朋友B:    「其實泡沫有乜問題呢?泡沫吹大咗就會爆架啦!」

朋友A:    「泡沫爆破,經濟不景,失業、負資產…好痛苦喎!」

朋友B:    「而家唔痛苦咩?」

筆者:    「又好似有道理喎!」

朋友B:    「泡沫爆咗都係痛苦幾年之嘛。」

筆者:    「到時仲可以好似金融海嘯咁,出招救市。」

朋友A:    「咁可能衰一、兩年就復甦,又再浴火重生。」

朋友B:    「咪係囉,而家高樓價嘅痛苦,直頭睇唔到終點。」

筆者:    「又啱喎!有起跌,先有機會!」

朋友A:    「冇錯!所謂平穩發展,反而令樓價有升冇跌。」

朋友B:    「對我哋早年買落一堆樓嘅,咪叫平穩囉。」

筆者:    「但係對於未起步嘅人嚟講,係絕望!」

朋友A:    「真係戥班未起步嘅年青人慘。」

朋友B:    「你哋情願大起大落,定係平穩發展丫?」

泡沫爆破後總有機會

政策目的…是令市場避開泡沫,穩定發展。

回望過去8年…所謂的穩定發展,係咪真係咁好?

本來,樓市是有週期的!過去幾十年都有,經常聽前輩說,大概每十年就會出現一次週期。經濟好的時候,樓價跟隨瘋狂上升,很多人賺到很多錢,所謂魚翅撈飯。

升到某個臨界點,然後泡沫爆破,樓價大跌,走唔切的,輸到甩褲,入市機會又再來臨。

是的…泡沫爆破的時候有很多人輸錢,有幾年陣痛。

但是…陣痛之後,又有機會!

回望過去,97年泡沫爆破,造就了03年的史上最佳入市時機。07年泡沫爆破,造就了08年的入市機會。

錯過了一次,唔緊要!吸收經驗,好好裝備自己,下次機會來臨的時候,好好把握。眼見身邊的同學戰友,過去8年能把握機會的,閒閒哋都3、4層樓,10層以上的多不勝數,當然包括筆者自己。未來總有機會,有希望!

未買樓者需多變通

現在呢?如果你仍未起步,見到有機會嗎?有希望嗎?

在政策的扭曲下,確實沒有出現97年時候的過份借貸,10個煲得3個蓋,也沒有出現以前炒炒賣賣、左摸右摸。最容易引發泡沫的條件因素不存在了,泡沫爆破機會大減了,樓價穩定了嗎?沒有!

我們的生活過得比以前好嗎?沒有!

如果你早年買了很多很多樓,恭喜你,可以坐享樓價上升。

如果你只有一、兩層,唔恭喜你住,或許只能原地踏步。

如果你還未買樓,慘啦!起步都難,或許看不到機會、希望。

你是後兩者嗎?噢!慘啦!

還未絕望的,不過要多變通。

買樓
如果你仍未起步,還未絕望的,不過要多變通。

依家先入市 兩招變陣

第一,在香港看不到機會,可以到內地看看,大陸仍然有很多城市正處於高速增長期,很多樓都只是幾十萬,呎價都只是一、兩千元,還有機會可以發掘到倍翻機會,還有機會可以買多幾層樓。

第二,也可以看看非住宅,例如筆者與戰友在工廈方面的投資亦很瘋狂,最近團隊亦已完成一項收購,將重建商廈,透過增值、拆售,雖然比以前難,但仍可讓資產倍增。

市場人士經常說,現在的借貸率很低,很多人已不用供樓,持貨能力很強,所以沒有泡沫,不會爆破。

筆者並不同意,如果沙田第一城的上車盤,賣到1000萬呢?還不爆破嗎?那2000萬呢?3000萬呢?總有一個價是臨介點!持貨能力強,倒過來說,減價能力都強,例如你的單位10年前以100萬買回來,現市值500萬,萬一經濟有變,減價賣樓,減100萬仍然是面嗰浸。當然,若辣招不變,尤其15%不撤,個個不賣樓,想爆都難。

到底是誰想要穩定發展呢?

還是懷念以往大起大落的日子?

買樓
大陸仍然有很多城市正處於高速增長期,呎價都只是一、兩千元,還有機會可以發掘到倍翻機會,還有機會可以買多幾層樓。