350萬以下盤源邊度最多

不過，依家二手樓周圍劈價，350萬元以下的盤源開始出現，部分市區樓更加唔洗300萬元有交易。有地產經紀指，不少業主自願減價，以低於市價出售，令這些筍盤再次出現。

小編今次搜羅全港各區多個屋苑資料，睇下邊區最多350萬元以下的筍盤，竟然發現市區盤仲多過新界盤，九龍區原來係最多低價筍盤，新界西其次，最估唔到最少盤的區除左一直樓價高企的港島外，新界東區都係冇乜。大家一齊搵樓時，識揀啦？！

280萬至300萬之選

鑽石山

咪以為唔洗300萬元的盤，就一定是位於偏遠地區，市區鑽石山都可以搵到300萬元以下的筍盤，就好似嘉華大廈和嘉喜大廈，中層單位實用面積255至286呎，叫價都是285萬至298萬元。低層隨時可以280萬元有交易。代理仲話淨係呢兩幢樓就，起碼有8個盤。

300萬至320萬之選

屯門

呢區350萬以下的盤最多位於兆康，初步統計大約有六個，或者係多居屋關係，叫價大多是320萬元，實用面積約563呎，都算寬僘。雖然地方偏離市區，但只需步行5分鐘便到西鐵兆康站。

元朗

相對之下，元朗樓價仍然較硬淨，平樓主要集中在天水圍，冇錯，就係近期成日聽到劈價的嘉湖山莊。最近就有一個低層單位叫價係313萬元，實用面積都有449呎，呎價唔洗7,000元，算幾吸引。

至於元朗市區，目前只係發現近朗屏站一個盤係350萬元以下，就係富來花園，呢個盤實呢都係270呎左右，叫價320萬元，計起上黎呎價都唔平。

上水

估唔到新界東樓價同新界西相差咁遠，呢個350萬元以下的樓盤真係寥寥可數，依家搵到最平一個，要去到上水，就係華麗花園低層，叫價310萬，但實呎都有427呎，呎價7,260元，算係咁啦。

320至350萬元之選

紅磡

紅磡係香港的中心點，交通極度方便，未來仲有港鐵通車，估唔到係度竟然可以搵到唔少320至350萬元之間的盤，當中仲有新樓添。

2011年入伙的御悅，最近就有個盤，叫價335萬元，低層實用面積251呎，雖然計返呎價都要13,347元，但市區新樓算唔錯了。據代理講，呢個屋苑差不多面積及價位的盤，都仲有四至五間，盤源都叫做多啦。

筲箕灣

港島要搵350萬元以下的樓真係好難，小編打左好耐電話，唯一搵到就係筲箕灣東強大廈，叫價328萬，低層實用面積224呎，呎價唔洗15,000元，港島細價盤算罕有。

沙田

唔知點解，沙田雖然係新界，但樓價就好似市區咁高，就算近期成日聽到劈價新聞的沙田第一城，暫時都仲未有350萬元以下盤。要搵，暫時只得主攻細單位的河畔花園，最近有一個盤，實用面積242呎，剛好叫價踩中350萬，不過地產經紀透露，買家有誠意的話，業主隨時願意減價至約340萬元，各位準買家要留意啦！

荃灣
荃灣同樣好少3字頭盤，暫時畀小編搵到一個，位於荃灣中心低層，實用面積329呎，叫價345萬元，呎價都只係10,488萬元，仲要連裝修，抵過沙田好多。