保險經紀佣金｜首年佣金上限70% 新規定生效時間表

咩係保險經紀佣金？代理與經紀有咩分別

香港嘅前線保險中介主要分兩類：

• 保險代理（Agent）：通常只代表一間保險公司銷售產品，收入來自新單首年佣金、續保佣金，以及擔任管理職級後嘅團隊管理收入；
• 保險經紀（Broker）：代表投保人喺市場上比較唔同保險公司嘅產品，理論上站喺客戶角度尋找合適計劃，收入同樣以佣金為主，部分經紀公司亦會向轉介人支付轉介費。

由於代理及經紀嘅收入均與保單銷售直接掛鈎，佣金結構點樣設計，會直接影響中介人推銷邊類產品、以及會否持續跟進舊客戶，因此近年成為保監局規管嘅重點。

保監局新規定：分紅保單首年佣金上限 70%（2026 年 1 月生效）

保監局於 2025 年 7 月 30 日發出《認可保險人向持牌保險中介人支付分紅保單酬勞結構之常規手冊》，補充 GL16（承保長期保險業務指引），規定定期繳付保費嘅分紅保單，保險公司支付予中介人嘅佣金須符合以下分攤要求，並由 2026 年 1 月 1 日起生效：

保監局並鼓勵保險公司採取更嚴格嘅安排，例如將首年佣金比例壓得更低、或將餘額分攤期拉長至超過 5 年。詳情可參閱保監局官方通函及指引一覽。

轉介費新規：經紀公司轉介費上限 50%（2025 年 9 月生效）

除咗保險公司直接支付嘅佣金，部分經紀公司會向轉介人（Referrer）支付轉介費以換取客源。保監局於 2025 年 9 月 1 日發出通函，就分紅保單嘅轉介費設下規管期望：持牌保險經紀公司支付予轉介人嘅轉介費，不得超過經紀公司就該保單向保險公司收取嘅總佣金／酬勞嘅 50%。今年（2026 年）1 月，保監局亦已規定保險公司向保險中介人（包括經紀與代理）支付嘅分紅保單首年佣金上限為總佣金嘅 70%，與上述常規手冊要求一致。

銀行銷售保單佣金規定：金管局分階段收緊（2027 至 2028 年）

金管局已致函銀行，就銀行以持牌保險中介人身分銷售定期繳費分紅保單嘅酬勞結構作出安排，與保險代理及經紀睇齊：

首年後嘅餘額佣金，須於未來至少 5 年（即第 2 至第 6 個保單年度）或保費繳付期內（以較短者為準）平均分攤發放。若銀行前線員工嘅酬勞以「平衡計分卡」等方式釐定，而非直接與佣金掛鈎，則可獲豁免上述分攤要求，惟須符合公平待客原則嘅相關準則。

點解要規管佣金結構？「全有全無」誘因風險

保監局喺 2023 年 12 月一期《監管通訊》指出：「將時間聚焦於銷售新保單的誘惑可能與為現有保單提供服務的職責相衝突。由於佣金本身『全有或全無』（賣出就有佣金，無法賣出就沒有佣金）的性質，佣金水平越高，推動銷售的內在壓力就越大」，並警告佣金結構調整不當，有機會令中介人將自身利益置於客戶利益之上。首年佣金過高、續保佣金偏低嘅「前重後輕」結構，容易誘使中介人專注開新單多於管理舊單，甚至游說客戶「Cut 舊單、開新單」以賺取新一輪首年佣金——因此保監局一直要求業界在新舊單替代時，必須向客戶遞交《重要資料聲明書 — 轉保》，講解潛在損失。

唔同保險產品佣金比率參考

⚠️ 以下為業界市場估算範圍（非保監局官方公布嘅數字），僅供參考，實際佣金比率因保險公司、產品及保單年期而異：

由於長供款期儲蓄／人壽保單首年佣金明顯高於醫療保單，市場人士普遍認為呢個差距，正正係保監局近年出手規管分紅保單佣金分攤嘅主要原因之一。

消費者可以點自保？

• 轉換保單前留意：如果中介建議「Cut 舊單、開新單」，應要求對方詳細解釋新舊單嘅實際差別，並仔細閱讀《重要資料聲明書 — 轉保》；
• 可主動向中介查詢佣金及分銷成本嘅一般性資料，了解產品嘅誘因結構；
• 留意保單嘅供款年期及退保條款，避免因中途停供而觸發大額損失；
• 核實中介人於保監局「持牌保險中介人登記冊」上嘅持牌狀態，確保透過合法途徑投保。

常見問題

保險回佣係咪合法？

唔合法。喺香港，中介人向客戶提供回佣（即將部分佣金退還畀客戶以吸引投保）屬違法行為，即使部分業界人士私下進行，一旦被發現亦要承擔法律後果。

保監局新規定係咪適用於所有保單？

現時嘅 70% 首年佣金上限規定，適用於定期繳付保費嘅分紅保單；投資相連壽險保單（ILAS，屬於 Class C 長期保險業務）本身已受另一套佣金分攤規定所規管，預付佣金同樣不得超過 50%。

點知道自己買嘅保單中介收幾多佣金？

現時香港法例未要求中介人主動向客戶披露具體佣金金額，但客戶可主動查詢；部分虛擬保險公司則以無代理模式營運，直接透過客服及索償專員提供服務。

📌 延伸閱讀：【長者270萬儲蓄保爭議】一年狂買五張儲蓄保 RM游說「高息隨時攞返」 金管局遭轟監管疏漏

📌 延伸閱讀：香港保險公司名單｜158 間認可保險公司分類及市佔率一覽

📌 延伸閱讀：家庭醫療保險比較｜6 大選購要點及自願醫保扣稅攻略