人工低到得$13,000 仲要俾人針對玩是非
廣告
文：Purple弟弟
香港人出名鍾意投訴，但往往投訴都唔係對事，而係出自不岔同妒忌。見到人有我冇，投訴！其實可能係先到先得形式；以為有折扣，點知埋單發現冇，投訴！原來自己睇錯宣傳單張，不過唔緊要，樣衰咗咪投訴職員態度差，得咗……
漸漸地，呢種因不岔同妒忌而引伸出嘅橫蠻思維，滲透入職場。例如護士咁，近年有唔少人詬病護士人工太高，都係執下屎屎尿尿嘅辛酸絕對對得住份人工，假如自己都咁高人工，絕對唔會呻辛苦。所以我幾時都說香港打工仔思維上係進步得最快，自己做緊基層，思維已經跳到管理層，唔係諗自己點加人工，而係諗其他人人工太高，要減一減先得。
不過唔好以為得高薪人士先會受害，低薪打工仔一樣走唔甩！筆者曾經做過一份文員，月入$13,000，工作量唔多，每日可能做半日咁上下就完成等收工。不過即使你做好本份，無影響到其他任何人，一樣會有同事為你加上標籤。
「你就好啦，日日都咁hea…我做到成隻狗咁啊！」
所以係我錯？我俾嘢你做嘅？而情況只會愈來愈嚴重，呢類同事好快會將自己工作量多嘅仇恨，全部灌輸晒係你身上。
「唔好問我嘢煩住我先啦，你估我好似你咁成日咁得閒。」
慢慢，你會發現自己已經莫名其妙地被憎恨，你諗極都唔明，老細出低人工兼俾高工作量佢，但點解呢類人走去將脾氣爆落自己身上？因為佢地同投訴心態一樣，純粹係出自不岔同妒忌，我唔要加人工減Workload，你咁hea，我要剝削你嘅hea！
你說打工仔點唔大壓力，自己友都唔團結鬼打鬼！要對付刻薄上司之餘，仲要得閒安撫智障同事，以免佢地心態爆炸，造成大規模傷亡。所以話，搵到間有好同事又少是非嘅公司真係要好好珍惜。
