職場制勝 工作 時間 畢業 收入 三無工作 前途

「三無工作」 用寶貴時光換卑微收入 「受騙的那個比騙徒更混賬」|Purple弟弟|職場制勝

職場

廣告

工作職場制勝】消費,大家都試過!不過世界上最值得花錢買嘅嘢,往往就係時間。每個女人都會明白青春無價,年紀每大一歲就仿似貶值一截,25歲就開始擔心嫁唔出。回望自己畢業後出社會工作,手上果張印住$13,000月薪嘅糧單,你恍然大悟,其實青春係有價嘅!

撰文:Purple弟弟 |圖片:unsplashPhotoAC

「三無工作」嘅定義

大家先唔好誤會,筆者意思唔係話打工就等於出賣青春,要符合「出賣青春」必先要有一個條件!

就係做緊一份「三無」工作!

1. 無前途

2. 無錢!

3. 無嘢學!

世上最愚蠢嘅人

如果你做緊一份「三無工作」又不思進取,咁你就係世上最愚蠢嘅人。

因為你用緊人生最寶貴嘅時光換取最卑微嘅收入

但可惜呢類人都有個通病,就係會畀好多理由同藉口自己,連掙扎都懶得出力。

同事Mary今日食Lunch又同我呻「公司係咪低能,咁多嘢做死人咩,人工又雞碎咁多!唉,我都係搵定工走!」

「係囉,一定要啦」

「不過就到年尾好難搵工,幾時先走到啊!」

我暗笑一下,心諗你上年開始已經話走,唔好話我睇死你都係得個講字,根本一份CV都未Send過出去啦!

「咁你Send咗CV未?」

「未啊,都話呢個時期難搵,遲啲先!」

相信每個人係職場上都遇到過Mary呢類人,公司多嘢做、人工低又無得著。

但就口裡說不,身體卻很誠實為公司賣命!

每次我見到呢類人都會諗起張智霖首《妳太善良》,當中有一句歌詞用嚟形容佢地真係好貼切!

「受騙的那個比騙徒更混賬」

公司係混賬,但你又唔肯走,即係點?抵死囉!

大部分人嘅青春都係無價嘅,而呢類人嘅青春,咪只係值糧單上果5位數囉。

到大家知道已經無咗幾多青春嘅時候,就知道回頭走天已暗,所付出嘅時和分,又有幾多可以換到十寸金呢?