2020職場回顧 網民盤點返工做過最瘋狂嘅事 燒符水、開枱打麻雀、飲醉酒未算癲 仲有咩更瘋狂？
廣告
踏入2021年，不少人開始回顧往年的職場生活。日前，有網民開post分享過往在職場上做過最瘋狂的事情，引起其他人熱議。原來，沒有最瘋癲只有更瘋癲。
撰文：經一編輯部｜圖片：Unsplash
日前，有網民於連登討論區以「返工見過同事做過最X線嘅嘢係咩」為題開post，分享自己在職場上遇見過最瘋狂的事，引起網民熱議。
該樓主表示：「我暫時都係見過瞓， 瞓到有鼻鼾，畀老闆聽到，拍醒佢，問佢係咪有病？」
樓主發文後，引來不少網民分享所聞，有人表示曾在辦公室遇到類似事件。該網民指，有位同事經常在公司瞓覺，有次同老闆開會，該同事又瞓著。
- 「有次4個人開會，老細同佢一齊坐，我同其他同事一齊坐佢哋對面，張枱1米左右，佢瞓到有鼻鼾。我哋已經叫醒咗佢一次，之後佢繼續瞓。老闆叫咗佢請半日假去睇醫生，睇唔好唔需要再返嚟。」
當Office係廚房 煲湯煮飯 仲有人開會飲醉酒？
除了有同事瞓覺瞓到有鼻鼾，部分網民指有同事會在office煮食，不但打邊爐，更有人煲湯、煲涼茶、焗扒，令office充滿油煙味。
- 「好耐以前隔離team有個主任遞咗信之後，喺自己嗰位用焗爐仔，焗扒同配白酒，仲請埋其他同事食…成個office都係油煙味！補充返，連續煮咗幾日。」
- 「老闆唔喺公司，有個做咗好耐嘅阿姐拎個煎Pan出嚟煎雞翼，派畀同事食。」
- 「洗魚、洗雞、洗菜都見過！」
- 「每日lunch都要自己煮飯，唔會用微波爐叮飯，真係自己帶米同肉返嚟煮飯，仲要每日都一餸一湯，好識嘆！每日夠鐘11點就放低哂手頭上嘅工作，返茶水間拎砧板出嚟剁肉餅同滾湯。」
- 「喺個位度打邊爐，打到一半叫隔離嗰個幫手落去買兩包肥牛。」
網民指，不但有人會煮嘢食，仲有同事在辦公時間飲醉酒，成為office的經典。
- 「同事倒啤酒入保溫壺，開住會飲。本身都無咩嘢，點知開開吓會佢塊面開始有啲紅，阿姐問佢係咪唔舒服，使唔使請sick leave！我哋忍笑忍到！」
- 「星期五飲酒飲到醉晒，有條友喺公司除衫同嘔。」
趁上司無返工開枱打麻雀、玩遊戲
有人當公司是廚房，又有網民曾趁上司無返工，在辦公室與同事開枱打麻雀、玩遊戲等。
- 「經理同副經理WFH（在家工作），得返啲細嘅。4個夠腳就關門開枱打麻雀，打完唔夠喉，仲要玩埋啤牌，賭真錢！」
- 「阿姐放假，成team人一齊扮開會入房玩board game，玩足全日。」
曾遇奇葩同事 燒符水、用微波爐叮底褲等
有人食同瞓、玩遊戲，網民指辦公室內更有不少奇葩同事，例如會燒符水、用微波爐叮底褲等，甚至有人返工期間砌高達、同時返足兩份工、無錢交租要扮OT瞓公司等，令網民直言瘋狂。
- 「有位同事本身搵咗新工，但喺舊公司通知期未完，佢照返新工。舊公司就搵人幫佢打卡，個人就返新公司，有半個月同時返2份工。」
- 「真係會有人返工砌高達。舊公司有人2個月內完成咗5部，放到一枱都係。只係未癲到公司內上埋色」
- 「同事賭到無錢交租，扮OT瞓公司，喺公司廁所沖涼，最後老闆發現炒咗，仲笑佢係看更。」
- 「做做下嘢，突然有同事大叫，然後拎度符出嚟，即場燒符水飲！」
- 「我有個同事一打開個微波爐，見到條底褲，想嘔。原來落大雨，另一個同事條底褲濕曬，拎咗入去叮。」
- 「兩母子同一間公司（返工），阿仔畀阿媽鬧完，發脾氣走咗，一直都失去聯絡。嗰晚終於揾到佢，原來佢由尖沙咀行路入咗去沙田。」
網民公認放假返工先最癲
雖然辦公室內有種種瘋狂行為，但網民一致表示最瘋狂的並不是當公司是廚房、偷懶等行為，而是放假、無糧出仍自願返工。
- 「平日放工、星期六日、紅日、放緊大假出email同覆email，仲要唔係管理層！」
- 「同事last day自願OT到凌晨兩點先走，仲要係contract嚟！」
- 「放大假自願返工真係好癲，間間公司都有呢啲人！」
- 「放假自願返工。」
