診所 電話 醫生 護士 診所職場事 寶豬趣聞 珍寶豬 經一專欄

診所職場事 【寶豬趣聞】好學唔學(下回)|珍寶豬|經一專欄

職場

廣告

【診所. 經一專欄上回講到,診所內有兩個家庭喺度等睇醫生,A媽媽向B媽媽投訴不果。A媽媽就梗係唔忿氣啦!於是…

撰文:珍寶豬funnyclinic)|圖片:電視截圖、unsplash

兩位媽媽喺診所互罵

A媽媽:「我同你講緊嘢呀,喂,你聾定啞呀?有冇反應俾吓我呀?你係咪佢阿媽嚟呀吓?」
B媽媽開聲:「收嗲啦白痴仔!」
A媽媽呆咗擰轉頭望住我,好似用眼神示意我幫拖咁,但係講真…呢啲情況我衝出去主持公道咪又係嘈~而且你哋係成年人啦,嘈起上嚟唔駛再搵大人解決㗎啦~不如你哋大家繼續玩電話算啦,打和啦SUPER!
A媽媽見我唔出聲,佢自己又唔敢再進一步炳人,於是佢好安靜咁坐低邊谷氣邊玩電話。

鬧人全家都係⋯⋯

A媽媽越諗越唔忿氣,佢又抵唔住頸,再次行去B媽媽前面:「我覺得你應該要同我哋道歉囉!」
B媽媽又唔出聲。
A媽媽再講:「我同緊你講嘢呀」
B媽媽繼續望住部電話:「你全家都白痴仔,全家都係呀」

A媽媽又再擘大口得個窿咁擰頭望住我…
我真係唔知點拆好呀大佬,唔好望我得唔得呀?

拉埋小朋友離開診所

小朋友B行去小朋友A度:「可唔可以俾我玩陣呀?白痴仔」
A小朋友回應:「唔可以呀白痴仔」
A媽媽聽到之後呆咗陣,拖住小朋友A,邊走邊講:「痴線,留喺度都有失身份呀,走呀,唔睇住呀!」
小朋友B向小朋友A揮手說再見:「BYEBYE白痴仔」

學好三年,學壞三秒原來係真啊~
小朋友好有禮貌回頭揮手:「BYEBYE白痴仔」
我聽到A媽媽咆哮:「杏家橙,全家都癲㗎!」