電子報稅教學｜個人稅務網站 ITP 開戶及網上報稅步驟

「稅務易」變成「個人稅務網站」？先搞清楚新平台

稅務局喺 2025 年 7 月 22 日正式推出「新稅務網站」，由三個互聯網站組成：供個人使用嘅「個人稅務網站」（Individual Tax Portal，簡稱 ITP）、供公司使用嘅「商業稅務網站」（BTP），以及供稅務代表使用嘅「稅務代表網站」（TRP）。原本嘅「稅務易」帳戶已無縫過渡至新平台，現有用戶毋須重新登記，用返舊有稅務編號同密碼、或用「智方便」直接登入即可。新平台仲提供專屬手機應用程式「eTAX」，方便用手機處理報稅、繳稅同查閱稅務狀況。詳情可參閱稅務局「個人稅務網站」官方頁面。

電子報稅有咩好處？

• 自動延長遞交限期一個月：一般人士報稅表限期通常喺發出日起一個月內，但透過網上報稅可以自動延期，毋須另行申請。
• 毋須擔心郵寄報稅表遺失，亦唔使親身跑一趟稅務局辦公室。
• 系統會自動帶入個人已有資料，減少重複填寫。
• 提交後即時獲得確認回執，可以隨時上網查閱報稅表同繳稅狀況。

開立「個人稅務網站（ITP）」戶口

根據稅務局官方指引，開戶主要有以下幾種途徑：

• 已有「智方便」戶口或數碼證書：可以直接登入 ITP，毋須再登記。
• 舊有「稅務易」用戶：直接沿用原有嘅稅務編號及密碼登入即可，帳戶已自動過渡。
• 全新用戶：可用稅務編號（載於報稅表或評稅通知書上）連同香港身份證號碼，網上申請啟動密碼，密碼會以郵遞方式寄到登記地址；亦可以直接提供個人資料開立戶口。

登入後可以處理個人稅務、物業稅、僱主相關事務，以及商業登記、印花稅、購買儲稅券等多項服務，亦可以透過「信息匣」接收電子通知同提示。

網上填報報稅表步驟

成功登入 ITP 或「稅務易」帳戶後，網上填報報稅表大致依以下步驟進行：

• 登入後點擊「稅務狀況」，系統會顯示尚未提交嘅報稅表。
• 點擊「檢視」／「報稅」開始填寫網上報稅表。
• 閱讀重要提示，系統會自動帶入已有嘅個人資料，核對並按需要更改。
• 按報稅表各部分逐一填寫，包括受僱工作資料、全年入息（薪金、花紅、租值等）。
• 填寫適用嘅免稅額（例如供養父母、子女免稅額）同扣除項目（例如自願醫保保費、可扣稅強積金自願性供款、合資格年金保費）。
• 覆核所有已填寫資料，確認無誤後提交，並保存電子回執以備日後查詢。

報稅表提交 vs 繳稅限期，一表分清

電子報稅常見出錯位

即使用網上系統，都有機會因為不熟悉條例而出錯，報稅前宜留意以下幾點：

• 漏報收入：兼職收入、租金收入等額外收入都需要如實申報，漏報有機會被追查甚至罰款。
• 扣除項目申報有誤：例如錯誤申報唔符合資格嘅免稅額，或者將「可扣稅強積金自願性供款」同一般強制性供款混淆。
• 錯過提交限期：即使網上報稅有多一個月寬限期，都應該預留時間，避免最後一刻因系統繁忙或資料唔齊而趕唔切。
• 報稅表提交咗但未交稅：提交報稅表同繳交稅款係兩個步驟，記得留意評稅通知書上嘅實際繳稅限期。

常見問題

「稅務易」同「個人稅務網站」係咪要分別登記？

唔需要。「個人稅務網站（ITP）」係「稅務易」升級後嘅新平台，現有「稅務易」用戶帳戶已自動過渡，用返原本嘅登入方式即可，唔使重新登記。

電子報稅真係可以自動遲交？

網上提交報稅表可享有額外一個月嘅遞交寬限期，但呢個係「報稅表提交限期」嘅延期，唔等於「繳稅限期」延後——實際繳稅日期仍然以評稅通知書首頁紅字列明嘅到期日為準。

冇「智方便」戶口可唔可以用電子報稅？

可以。除咗「智方便」，用戶亦可以用原有嘅稅務編號同密碼登入，或者以香港身份證號碼申請啟動密碼開立新戶口，並非一定要有「智方便」先可以用網上報稅服務。

網上報稅安唔安全？

稅務局網站表示系統採用加密技術保障個人及財務資料，並喺每次提交後提供即時確認回執，讀者亦可以自行妥善保管密碼同啟動密碼通知書，避免外洩。

📌 延伸閱讀：自願醫保扣稅方法｜上限 資格及報稅表填寫全攻略

📌 延伸閱讀：報稅三寶懶人包｜TVC QDAP VHIS 扣稅上限及計算方法