樂悠咭申請｜60歲兩蚊兩折點計？資格／文件／流程一次睇晒（2026 更新）
樂悠咭是什麼？同長者咭有何分別？
樂悠咭是八達通卡有限公司發行嘅租用版個人八達通，卡面印有持卡人姓名同相片，專門用嚟享用政府「長者及合資格殘疾人士公共交通票價優惠計劃」（俗稱二元優惠計劃）。樂悠咭同社會福利署發出嘅「長者咭」係兩回事：
| 項目 | 樂悠咭 | 長者咭 |
| 發卡機構 | 八達通卡有限公司 | 社會福利署 |
| 申請年齡 | 60 歲或以上 | 65 歲或以上 |
| 核心用途 | 享兩蚊優惠計劃乘車 | 身份證明、商戶折扣 |
| 是否有儲值功能 | 有（可增值消費） | 沒有 |
兩張卡用途唔同，65 歲或以上人士可以同時申請兩張，樂悠咭用嚟搭車，長者咭用嚟出示享受生活優惠。
樂悠咭申請資格
- 60 歲或以上、持有效香港身份證嘅香港居民；或喺申請日起計 3 個月內就滿 60 歲嘅人士，可即時申請。
- 60 歲以下合資格殘疾人士（包括殘疾程度達 100% 嘅綜援受助人及傷殘津貼受惠人）：應繼續使用已加註「殘疾人士身分」嘅個人八達通，年滿 60 歲後須轉用樂悠咭以延續優惠。
- 每位合資格申請人只可獲發一張樂悠咭，切勿重複申請。
樂悠咭申請方法及所需文件
樂悠咭有兩種申請途徑：
- 方法一：八達通 App 電子申請（較快捷） — 下載「八達通App」，喺主頁「焦點服務」或「更多」選項入面點選「申請樂悠咭」，按指示掃描身份證、核對資料、輸入通訊地址並上傳證件相片後遞交即可。
- 方法二：郵寄表格申請 — 可到港鐵客務中心非付費區（土瓜灣、宋皇台、顯徑、啟德、海怡半島、利東、黃竹坑及馬場站除外）、輕鐵客務中心（元朗、天逸、良景、屯門碼頭站）、民政諮詢中心、運輸署牌照事務處、政府資助長者中心、社會福利署社會保障辦事處、房委會屋邨辦事處或房協轄下辦事處索取附免郵費回郵信封嘅申請表；亦可喺樂悠咭網頁下載表格自付郵費寄出。填妥後貼上身份證副本同六個月內拍攝嘅彩色護照證件相片（1.5吋 x 2吋，白色或純淺色背景），寄至「新界荃灣郵政局 945 號信箱 八達通卡有限公司 樂悠咭申請」。
兩種方法所需文件相同：有效香港智能身份證（只接受 2018 年 11 月 26 日起簽發嘅智能身份證；如獲豁免換證，須以郵寄方式申請並附上「豁免登記證明書」副本）及一張六個月內拍攝嘅彩色護照證件相。
申請費用同幾時攞到卡
首次申請樂悠咭嘅行政費由香港特區政府全額資助，申請人毋須繳付任何費用。收妥所需資料及文件後，樂悠咭一般會喺 4 星期內郵寄至申請人提供嘅香港通訊地址，並會以短訊通知。如喺收到短訊後 10 天內仍未收到樂悠咭，可致電八達通顧客服務熱線 2266 2222 查詢。
樂悠咭毋須額外啟動，首次於八達通增值渠道增值多於 $50 即可使用；當中 $50 為可退還按金（例如增值 $200，扣除按金後餘額為 $150；退卡辦理退款時按金會一併退還）。持卡人亦可透過「易轉服務」，將舊有個人八達通嘅餘額、按金、自動增值服務及有效嘅「殘疾人士身分」等，一次過轉移到樂悠咭。
「兩蚊兩折」優惠點計？
根據運輸署公佈，由 2026 年 4 月 3 日起，二元優惠計劃嘅收費方式由「每程劃一 $2」調整為「兩蚊兩折」：
| 成人票價 | 受惠人士須繳付嘅車／船費 |
| $10 或以下 | 劃一 $2 |
| 高於 $10 | 成人票價的兩折（以四捨五入方式調整至最接近的一毫） |
例如成人票價 $8，受惠人士仍付 $2；成人票價 $10.8，兩折後為 $2.2；成人票價 $20.2，兩折後為 $4.0。如適用於受惠人士嘅票價本身低於 $2，只需繳付該票價。「兩蚊兩折」優惠同樣適用於轉乘車程，後段車資會先扣減營辦商提供嘅轉乘優惠，再以「兩蚊兩折」原則計算；港鐵嘅轉乘優惠則會先計算「兩蚊兩折」應收費用，再扣減轉乘優惠。
邊啲交通工具適用？
| 交通工具 | 涵蓋範圍 |
| 港鐵 | 港鐵本地服務，包括輕鐵服務及港鐵巴士（新界西北）路線；不包括機場快線、往返羅湖／落馬洲及馬場站嘅東鐵線服務及東鐵線頭等服務 |
| 專營巴士 | 九巴、城巴、龍運巴士及新大嶼山巴士嘅專營巴士路線；不包括機場巴士「A」「NA」線、馬場路線等特別服務 |
| 電車 | 所有電車路線 |
| 渡輪 | 指定渡輪服務，不包括豪華位服務 |
| 綠色專線小巴 | 所有專綫小巴路線 |
| 紅色小巴／街渡／居民巴士 | 只限已展示二元優惠計劃標誌嘅指定路線 |
詳情可參閱運輸署「政府長者及合資格殘疾人士公共交通票價優惠計劃」官網。
遺失樂悠咭或失效點算？
若不幸遺失樂悠咭，應立即致電八達通報失熱線 2266 2266 報失，持卡人須承擔報失後 3 小時內嘅損失。報失後樂悠咭會自動註銷，公司會喺 3 個工作天內安排補發新卡，如原本設有自動增值服務亦會一併轉移。重新申請或補領均須繳付相關手續費，實際金額請以八達通公司公佈嘅收費附表為準。若樂悠咭失效（非人為損壞），可到就近港鐵客務中心尋求協助處理。
常見問題
60 歲人士是否一定要申請樂悠咭先可以用兩蚊優惠？
係。由 2024 年 8 月 25 日起，不記名長者八達通及一般個人八達通已不再適用於二元優惠計劃，60 歲或以上香港居民必須使用樂悠咭方可享用優惠。
未夠 60 歲可唔可以提早申請？
只有喺申請日起計 3 個月內就滿 60 歲嘅人士，方可提早遞交申請；未符合呢個條件嘅申請將不獲受理，須待符合資格後重新申請。
樂悠咭同長者咭可唔可以同時擁有？
可以。65 歲或以上人士可同時申請兩張卡，樂悠咭專責交通優惠，長者咭則用作身份證明同享用其他商戶生活優惠，兩者互不取代。
📌 延伸閱讀：九巴轉乘優惠｜八達通轉乘點計？電車／港鐵／小巴優惠一覽
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
